ZPM sawrkar leh VC term tihtawi : ‘VC term hi sawrkâr thuneihna a ni’ – CM

Tûn hnai khân Mizoram village council leh local council ding lai term chu ZPM sawrkâr chuan pawt tâwiin, kum 2025 February ni 19-ah he term kal lai hi a lo tâwp dâwn ta a. Hemi chungchângah hian eptu lam chuan nasa takin an sawisêl a; ZPM member ṭhenkhatte takngial pawhin VC/LC term pawh tâwi hi ṭha an tih loh thu social media-ah an tlângaupui hial a ni. He thu ziah lai hian All Mizoram Village Council Association (AMVCA) chuan court-ah khin tumin hma an la mêk bawk. Kan Chief Minister bera lah chuan, “VC term hi sawrkâr thuneihna a ni; an buai peih chuan min khing rawh se,” a ti thlâwt mai si a. A lehpek pawh awm chuang lovin sawrkâr thu chu thu tâwp a nih hmêl hle mai le.

Ni e, sawrkâr thu chu thu tâwp a ni a; saphûngah pawh kûi ngai se, sawrkâr thuchhuah a nih miau chuan tu nge dâl thei ang? MNF hun lai pawh khân anti-defection law case-in tûna kan chief minister Pu Lalduhoma kha a tih sual âwm hriat lohvah pawh a MLA nihna an hlihsak hmiah mai a nih kha! Sawrkâr thu chu thu vet vet tak a ni – thu tak!

Kei hian dân leh hrai eng mah ka hre lo va, dân ṭanchhanin eng mah ziah tûr ka nei lo bawk. Chutih rual chuan, ZPM sawrkârin an thuneihna leh thil tih theihna (power) hmanga VC/LC term kal a pawh tâwi ta mai hi hriat thiam harsa chu ka ti a ni.

Eng vânga ZPM sawrkâr tih ngai ta kher nge a nih?

India ram inthlanpui rêng rêng hi pawh seia pawh tâwi theih chu a ni nameuh mai. Mahse, loh theih loh thil (special case) a nih loh chuan duh duha pawh seia pawh tâwi ngawt tûr a ni hran lo. Chu pawh a vai huap lovin, hmun ṭhenkhatah, term kal laiin harsatna a tawh emaw, sawrkâr inlumlehna a thlen thulhah dân pângngai anga executive body a pian theih loh emaw a nih chauhvin an titâwp (dissolve) ṭhîn chauh zâwk a ni. Tûna ZPM sawrkârin an han pawh tâwi ngawt mai hi chu thu neihna an chelek mah mah em aw (?) a tih theih hial a ni. Kan sawrkâr hmasa Mizo Union, MPC, Congress leh MNF hun lai zawng zawng khân a ram pum huapin VC term kal lai pawh tâwi hi a thleng tawh em maw chu?

Minister-te thu sawi a inmil lo tlat

He VC/LC term pawh tâwi a nih thu mipui hriata puanzâr a nih hma hian minister Pi Lalrinpuii chuan, “VC-te’n min thawhpui duh lo,” a ti a. Term pawh tâwi a nih thu puanzâr a nih hnûah minister Pu K. Sâpdanga chuan VC/LC term pawh tâwi a nih chhan chu, “VC/LC member-te zîngah ZPM ni lo an tam lutuk avângin hna thawh a har,” a ti mauh mai. Anmahni zâwk hian VC/LC member-te hi an thawhpui duh lo zâwk a ni mai ang em?

Minister Pu C. Lalsawivunga ve thung chuan, “Inthlanpui hmachhawn tûr ṭum lî lai kan nei a; sum a hautak ṭhin avângin budget hluiah VC/LC inthlanpui hi neih a ṭûl a ni,” tiin a lo thlûk daih mai. Kan minister pathumte thu sawi hi a dik ber hriat a har hle mai a; an duh duh an sawi mai nge, Zoram mipuite hi min bâwl?

Pu Sawivunga sawi hi tuihnih lawk ila. Heta inthlanpui ṭum lî hmachhawn tûr anga a sawi hi village council leh local council a thliar hran vâng mai niin a lang. A nihna takah chuan thliar hran hi thil dik a ni lo. Ṭhuang khat zêla kal a nih avângin kan khaw dang sial en leh lutuk hi kan tih loh tawp tûr a ni. Municipal Council/Corporation a pian avânga local council hming pu ve chauh kha a ni a; village council phîrpui a ni tih hi kan hriat nawn a pawimawh. A dang pahnih inthlanpui hmachhawn tûr chu, nakkum kum tâwp lamah Lai Autonomous District Council (LADC) inthlan leh a kum leh 2026 kum tîr lamah Aizawl Municipal Corporation (AMC) inthlan a awm leh dâwn a ni.

An MLA, CM adviser (political) Pu Lalmuanpuia Punte-ina ZONET Studio-a VC/LC term tihtâwi chungchâng sawi honaah, “VC term kum thum tih hi party zawng zawngin kan titi khâwm chuan kan duh vek. Chumi a nih laia thla ruk chauh pawh tâwi heti tak maia helh lawi si hi chu a mak a ni,” a tih kha ka’n chhâng lawk ang e. Dânin, “Kum thum ni se,” a tih khân kan pawm tlâng a, dân vêkin kum hnih dang pawt seiin, “Kum nga ni se,” a ti leh ta a. Kan lungâwi loh chhan chu, dânina kum nga a tih laia ZPM sawrkârin a thuneihna chak tak hmanga thla ruk zeta a pawh tâwi vâng a ni. Hemi chungchâng hi chu sawi mâm theih a ni lo vang. Term hmang zo tûra an inngaih laia pawh tâwisak chu tu pa nge maw lungâwi ang le? Inthlanpui lo awm tûrah hian tûna ZPM VC/LC member ni mêkte hi tling zo ta lo an awm ngei dâwn a; an tân tak hian a nia lungâwithlâk loh dâwn ni. Party dang an engto luatah anmahni party mi leh sa ngeite an zuah dâwn bîk lo chu a ni a. Dân mitah, “Pawi sawi lo pakhat hrem ai chuan mi sual pakua chhuah zalên a ṭha zâwk,” tihte chu an hlat deuh.

ZPM sawrkâr hi mipui sawrkâr a ni rêng em?

‘Mipui sawrkâr’ tih awmzia chu ‘Thleia thliar bîk nei lo, ZPM e, M lo e, sawi lova zalên taka tualchai, eng party pawh angkhat renga awm’ sawina mai kha a ni a. Mahse, ngai teh, an han lal ta chêng a, “ZPM ni lo an tam lutuk a, hna thawh a harsat avângin VC/LC term pawh tâwi a ni,” an ti leh si! Mipui sawrkâr rim chu a va nam si lo ve! Ni e, ZPM sawrkâr ni miau hek le! ‘Kalphung thar’ tih lam kha chu sawi rih lo mai teh ang.

Ti hian ngaihdân ka nei ta! Plastic surgery hmangin beram vun an sin ni berin a lang a. Mipui sawrkâr tih aiah ‘Plastic surgery sawrkâr’ ti ila a dik ber âwm mang e.

– V. Kûngtea, West Saizawh, Awmhar Cabin