Designation plate chungchang

Nikum khan Guja­rat High Court chuan official ni lo, an mo­tor-a designation plate tar vete chu a dik lo e, tiin sorkar hnenah lakthlaktir vek turin a hriattir a; hei hi designation plate tarten lansarh an tum vang te, politics thila hamṭhatna dawn an tum vangtea court-a thu thlen aṭanga court-in a rem a ni.

Mizoramah hi chuan designation plate hi hetianga lan­sarh a, thiltihtheihna phochhuahna ai mah chuan kha motor kha tu hman nge tih hriat nan kan hmang a nih hmel mah zawk. Intihtheihna emaw, thuneihna tar­lanna a ni lutuk lem lo. Sorkar a ni emaw, kohhran leh pawlah pawh designation plate hi a chhunga chuangin eng thuneihna nge a neih tih tarlan tum ai chuan kha motor-ah khan tunge chuang tih kha tarlan tum a ni zawk. Thiltihtheihna phochhuahna emaw, power eng emaw riau a nei tih tarlan nana hman chu a awm lo ang, chutianga ngai tlat kan awm a nih chuan rilru dik loh vang a ni ang.

Kohhran ṭhenkhat chuan an motor-ah a motor hmangtu bik nihna an tarlang. Hetiang hi Mizoramah hian phal a ni mai thei a, kan hmang nasa viau. Ṭangkaina tam tak a awm a, mipui tan remchanna a tam viau. Entir nan khaw pakhat kohhran chu Synod Moderator-in a tlawh dawn a, an lo hmuak

ṭhap a, designation plate intar a awm loh chuan a hmuaktute tan emaw, lo chhâwn tur tan eng motor berah nge a rawn chuan dawn hriat a har viau. Designation plate a awm khan awl­samna tam tak a awm a, designation plate awm loin harsatna a thlen theih nen bûk ila a awlsamna leh a ṭhatna hi a tam rih zawkin ka hria.

Amaherawhchu, designation plate tar dan turah hian inrualkhai deuhte chu awm ta mah se a pawi hauh lo a, kalphung kan nei lo a nih chuan siam vat chi a ni mai thei. Amaherawhchu kalphung mumal tak kan nei turah ngai ila. A duh leh remhre deuhte duh dan leh mawi tihdan ringawt chu a fel ber lo thei.

Ram ṭhenkhat leh India-ah ngei pawh hian an number plate-a number awm dan aṭangin eng mi enkawl leh neih nge tih a hriat a, designation plate a hranpaa tar ngai lo a awm nual. India rama ram dang palai awmte number ziak dan a dang a, sipai motor ziak dan a dang bawk; an ziak dan aṭangin tute motor nge tih a hriat mai a ni. An number plate-a CD emaw CC emaw a lan chuan ramdang palai motor a ni tih a hriat mai a, CD emaw CC emaw hmaa number a awm chuan a awmna ram hriatna a ni leh. 77 CD xxxx a nih chuan US palai emaw, US Embassy-a thawk motor tihna a ni. Ministry of Defence hnuaia sipai motor a nih chuan fei lem, chunglam kawk a awm ṭhin. Heng motor-ah te hi chuan a hranpaa designation plate tar em em loh pawhin a neitute kan hre mai ṭhin a ni. 109 CD a nih chuan Israel palai hnuaiaa thawk emaw, an thawhpui motor tihna a ni.