Mizoram House khumah thosilen zar vek ni se
LPS Comedian Search-a tel ve pakhat khan, "Mami Varte room chu nuam tak a ni," tih ang deuhva a sawi khan, "Engtin nge a room nawm leh nawm lohte i hriat a," tiin an zawt let a; "Thosi ka kâp a," tih angin a chhang a. Thu dik a ni emaw, ni lo emaw, fiamthu thianghlim thawh ṭhinte hian mawi si, a lo hretu tana lawmawm leh nuihzatthlak deuh tak si logical deuh hian fiamthu hi an phuahchawp thiam a; an rilru hi a chak a, fiamthu phuah thiamah chuan mi vantlang chunglam an ni e.
Nia, thosiin malaria a thlen avanga mihring thihna tamzia ngaihtuah hi chuan thosi hi chu a huatthlala a, râlpui phiara phiar chi a ni ngei mai; HFW Deptt HS hian thosi kah hna pui pakhata an nei pawh hi tih awm tak a ni reng a ni.
VIP thlenna chinah hian India rama Mizoram House room-a khumahte hian thosilen an zar vek em tih chu ka hre chiah lo; chutih laiin , sawrkar Circuit House leh Tourism Deptt enkawl house khumahte hi chuan keini ang mi tê thlen phâkna angah hi chuan hriat theih chinah thosi lên an zar vek àwm mang e, ka ti a, a ṭha khawp mai. Tin, thosi kah hrim hrim hi a ṭha. Kei chuan room leh khum mawi tak thosi awmna khuma mut ai chuan, thosi kahna hnuhma lang, thosi awm lo khuma mut ka thlang zawk.
Hriat theih chinah kan Mizoram House hoah hian thosi an kahtir lo ṭhin nge, thosi awm loh hun deuh nia kan hriat thlasik (December)-ahte hian thosi a awm leh ṭhin a. Zana switch-a vuah chi Goodnight hian thosi a hnawt bo chuang lo tih hi kan tawnhriat a ni. India hmarchhakah hian thosi a tam bik nge tih chu ka hre lo, a hre zawkte sawiah dah ila.
Eng pawh ni se, room chhung thosi kah chu a ṭha ber a, kah pawh ni se, Health Services lam chuan thosilen zar chu an duhthusam a la ni tho ngei ang; mihring nun hi a hlu êm mai. Chuvangin, duhthusam chuan Goodnight vuah/chhit tur awm mah se, thosi len hi chu house-a khum zawng zawngah hian zar ni vek thei se la, a duhin hmang se, duh lo erawh chuan hmang lo mai se. Kan house enkawl dah hi chu a tlangpuiin a ṭha thawkhat chuan ka hria.
Tikhian a caption-ah kan han dah nâin, tih kher ngaih lohna hmun pawh a awm thei ang. Famkim lohna khawvelah hian hotêah pawh hmasawn zel chu a ṭha e tih thuah kan han thai lang ve a ni e.
- J.T. Vanlalngheta