Sorkar fa duat sual doctor leh engineer

Sorkar hnathawk­ah chuan doctor leh engineer-te hi Mizo­ram sorkar fa duat sual ti ila thu kan uar lutuk lo ang. Tun hma kha chuan hetiang lama mithiam an tlem a, mamawhna a san avangin duhsak an hlawh a, tu mahin thik enah kan en lo. Hetih lai hian sorkar leh mipui sum ei nasa ber an ni thung a, vawiin thlengin engineer te eiruk thubuai chu ram mipui titi a la nih hi!

Engineer leh doc­tor te hi kan state sorkar hian an zirna tur thlengin state pawnah a ngaihtuah­sak a, mipui sum hmang­in an zirna senso ṭhenkhat a tum­sak a, zirna line danga kal te pawhin thik phakah an dah lo. Mahse hemirual hian sorkar leh mipuite tan hna ṭha takin thawk se tih hi an laka kan thil phut a ni. Mahni post-a awm ṭha duh lo doctor te, mahni hna mipui rawngbawlnaa ngai lo lehkhathiamte hian ram an tibuai a ni.

Tunah chuan mi­thiam an tam tawh a, tribal ṭheuh ṭheuh duhsak phu bik kan awm ta lo. Kan sorkar pawh hian doctor leh engineer te laka a policy hi ennawn se a duhawm hle. Zoram mipuite tana hna thawk ṭha duh lo tur chu mipui sum senga zirna seat leh senso ngaihtuahsak hi a ṭul lo.

Sorkarin mipui sum senga state pawna zirna seat a hauh­sak leh an senso ṭhenkhat a ngaihtuah­sak chunga mahni hna thawk ṭha duh lote hian mifel leh midikte intichep a, doctor leh engineer hna zahawmna an tibawrhbang a ni.

Tun hnaiah Tri­pura HC-chuan state chhunga doctor private-a practice an tam em avangin suo moto case siamin, state sorkar hnuaia doctor te chu an mimal clinic hawn hun a bithliahsak tih kan hmu. Private hospital, nursing home leh private laboratory-ah chuan working days-ah darkar thum thleng hna thawh a phalsak a, sorkar chawlhah darkar ruk thleng mimal clinic-ah hna thawh a phalsak a ni. (Vanglaini, May 31 & June 1, page 8).

Kan state sorkar pawh hian a hnuaia doctor private-a prac­tice te leh practice lote chungchangah dan leh khuahkhirhna mumal tak nei se a duhawm hle. Mipuiin doctor kan mamawhna a sang a, hei vang hian damlote'n doctor ṭhiam leh ṭhate enkawl­na intluktlang taka an dawn theih nan sorkarin ruahmanna fel tak siam rawh se.

Tun hnaiah thing­tlanga doctor awmte chu thla hlawh leh thildangah hamṭhat­na a siamsak dawn niin tualchhung chan­chintharah kan hmu a, hetianga thil kalpui a ṭul ta hi a lungchhiatthlak rualin, mipuiin kan mamawh miau chuan a ṭul ve taah a ngaih theih a, mahse doctor leh mithiamte hian an thiamna hi mipui eihek (exploit) tumna hmanraw remchangah hmang lo se a duhawm hle.

Doctor pakhatin a thawhna sorkar damdawi-ina opera­tion a tih theih loh mahse a thawhna private hospital-a tih theih tho si ang harsatna hi damlote'n an tawh loh nan kan sorkar chak tak hi han chechhuak teh se.