Kha nausen tak kha aw...! (Mi nunna tiderthâwngtu i ni lo ang u)

Hman ni deuh lawk khan lung lam fel lote inentirna hmun pakhata ka kal chu nausên, lung lam ṭha lo entir tur hi an lo awm a. Ka awm lai tak chuan nausên chu a ṭap ta chiam mai a, a ṭap ri chu a ring lo, a chhan chu a ṭap ri chhuak ring thei lo a ni.

A nu chuan a naute ṭah chhan chu sarâng an tihrîk vang a nih thu leh, ri eng emaw deuh a hriat chuan a hlau a, a ṭah ṭhin thu a sawi. Nausen ṭah chhan, sarâng an tihrîk lah chu a ring tehchiam si lo. Ring viau lo mah se, kha nautê tan khan hlauh tham leh ṭah phah chiam chhan tling a ni tlat si. Nausên mai a la ni a, a hmabak a ko hle hian ka hria a, lung a tichhe lek lek hial mai! A lung lam pawh daktawr thiam tak takte'n an la enkawl dam ngei ka duhsak hle.

Nausen ṭah chhan an sawi hian rilru a tikal thui hle. A nute'n sarâng an tihrîk mai mai pawh hlaua a ṭahpui a nih chuan, kan hma lawka hunpui lo thleng turah hi an tan chuan a va han huphurhawm dawn em! Kum dang angin halpuah ri leh ṭhuai ṭhuai ta se, angtin nge a awm ang le, khawiah nge an tlanchhiatpui ang le, tih ringawt chu rilruin ka inzawt tlut tlut mai a. An tan tlanchhiatna a váng duh dawn mang e, thingtlang pilril takah tlanchhiat daihna turte an nei ang em, tihte rilruah a awm vang vang a!

Hrisel tâwk loh vanga (a bikin lung lam fel lo) kha nausên ang thoa thil ri ring deuh leh ri dur dur ang chite an hriata buai ta tlat, hlau em em hi Mizoramah hian mi eng emaw zat an awm a rinawm. Civil Hospital-a Cardiology OPD leh cardiologist-te clinic-ahte hian han kal teh u, lung lam fel lo Mizo zingah an tamzia a hriat theih. Chung mite tan chuan kum hlui thlah zan leh kum thar lawmna halpuah ri dur dur mai ṭhin hi a lo va hrehawm ṭhin dawn tak em! Ṭam tak chuan an nat zual phah hial rêng a ni.

Halpuah leh a kaihhnawih thil hâl hian boruak a tibawlhhlawh nasa an ti si a; lung lam ṭha lo chauh ni lo, thâwk lama harsatna neite tan pawh December ni 31 zan hi a lo va hrehawm dawn ṭhin tam em!

Ka Mizopui duh tak, hâlpuah leh hâlmawi ten mi tam tak tan harsatna a thlen nasatzia hi lo ngaituah ve teh. Darkar khat pawh tling lo chhung lek hlâwkna, ṭhatna leh ṭangkaina awm miah lo - halpuah hâl a nuam, a hmuhnawm, a hlimawm i tih avang ringawta i thil tih avang khan mi tam takin harsatna an tâwk dawn a ni tih hria la; kumin chu hâlpuah hmangin kum hlui thlah lo tur lerh kum thar lawm lo turin i rilru lo siam ve hrâm teh khai. Mi tana harsatna thlentu, hriselna tichhetu leh mi nunna derthâwnga dahtu nih i duh bik loh ngei ka beisei tlat a ni.

- Lalmawipuii