Google Play Store a him chiah em?

Google Play Store hi Google official digital distribution platform lian tak mai, Android leh ChromeOS devices (smartphone, tablet, TV, camera, computer, etc) hmangtute tana software download-na hmunpui ber a ni. A tirah mobile apps tlemte chauh an dah a, a hming pawh Android Market a ni. October 22, 2008 khan Android smartphone TC Dream (T-Mobile G1)-ah a hmasa ber atan an install a. Kum 2012 kum tirah Android Market chu an upgrade a, software application mai bakah, games, productivity tools, educational software, entertainment apps leh digital content hrang hrang (movies, TV shows, eBooks, leh audiobooks) ṭhahnem tak an chhûng khawm a; Google Play tiin a hming an thlak bawk. Tichuan, March 6, 2012 khan tuna kan hmelhriat Google Play Store chu a rawn piang ta a ni.

Software dangte ang bawkin security a nei thei bik lo a, harsatna a nei ve reng ṭhin. Google chuan Play Store him nan Google Play Protect leh stricter developer verification process hmangin Google chuan security khauh tak a siam a. Built-in malware protection service hmangin Play Store-a apps upload reng rengte hi uluk takin a lo scan ṭhin. Automated system leh manual review hmangin virus kai apps ṭhahnem tak a paih ṭhin. Kum 2024-ah hian apps maktaduai 3.5 lai upload a ni a, khawvela mobile apps sumdawnna lian ber, software awm tam berna, tlawhtu leh download-tu ngah ber a ni. Cyber criminal ho pawikhawihna hmun lian ber zinga mi a ni bawk.

Apps him lo an download loh nan developer registration leh ID verification process khauh tak a hmang mek bawk. Heti chung pawh hian Google Play Store-ah hian virus hlauhawm tak tak an la awm reng tho mai. Kum 2024-ah ringawt pawh Play Store apps 200 laiin virus an kai tih hmuh chhuah a ni a, chungte chu maktaduai 8 lai download a ni. Hengte hian security protocol an paltlang theih loh vangin an hlauhawm hle.

Play Store personalisation, photography, productivity and lifestyle category-ahte hian malware a tam ṭhin hle. Education apps-te hi an target lian ber a ni. Milem (JPG)-ahte virus an thun ṭhin bawk. Advertisement kit-te hi virus an dah tamna ber pakhat a ni. Heng ads-te hi Minecraft, Stumble Guys, Car Parking leh Melon Sandbox modify apps hmangin an thehdarh ṭhin. Tun hnaiah hetiang apps hlauhawm tak hi 90 lai hmuh a ni a, Google Play hmanga maktaduai 5 chuang lai download-a install a ni bawk.

September 2015 khan BrainTest apps siamtute chuan Google security tibuaiin Android device maktaduai zetah malware a thehdarh chiam a. Google-in an hriat chhuah veleh Google Play Store aṭangin an paih nghal. March 2020 khan researcher-te chuan Google Play Store apps 56 laiah Tekya Malware an hmu chhuak a; paih thuai mah se, maktaduai zetah malware a thehdarh hman tho.

July 2021 khan Play Store-a Trojan virus kai apps pakuate chuan Facebook login ID leh passward an ru chhuak ṭhin tih hriat a ni. Paih thuai mah se, maktaduai 5 aia tam download hman a ni. September 2021 khan Play Store hmangtu ram hrang hrang 70 zetah GriftHorse Trojan a darh chiam a; he virus hian user hriat lohvin virus kai apps 200 aia tam a subcribe tir a ni. November 2021 khan Play Store-ah fitness, QR code, PDF scanning tool leh cryptocurrency apps lem siam hmangin Banking Trojan Droppers thehdarh a ni a; May 2023 khan third-party Cloud services vangin Play Store hmangtu maktaduai 100 data ruk chhuah a ni.

May 2024 khan internet banking document pawimawh ruk chhuahna atana siam malware leh adware thehdarhna Anatsa Banking Trojan an tih chu apps 90 aia tamah hmuh chhuah a ni a, mi 5.5-te’n an lo install hman. The Hindu Bureau (Updated–May 29, 2024 03:43 pm IST) chuan malware, adware leh banking trojan virus kai Andoid apps 100 dawn lai mai Google Play Store-ah hmuh chhuah a nih thu a tarlang bawk. Heng apps hmang hian Europe, US, UK leh Asia financial institution-ah thehdarh a ni a, bank hrang hrang application 650 user ID leh password ruk chhuah ṭhin a ni. October 2024 khan Play Store apps-ah virus hlauhawm tak a awm tih hmuh chhuah a ni a, maktaduai 8 lai download a ni.

September 2024 khan hmanraw hrang hrang a rûka access thei tura an siam Necro malware chuan Wuta Camera apps leh a dangte hmangin device maktaduai 11 lai a chawk buai a. November 2024 khan McAfee chuan virus hlauhawm tak thehdarhna apps 15 lai an hmu chhuak. Heng apps-te hi vawi maktaduai 8 lai download a nik. Hengte hian banking leh financial an target ber a, loan îtawm tak tak hmangin mi an thlêm a, loan pek chu sawi loh, an document pawimawh tak tak an rûksak a, an sum ṭhahnem tak an khawih chingpensak ṭhin.

Fimkhurna turte :

Tunlaiah banking, sorkar, sumdawng leh kohhran thlengin attendance, e-office, financial transaction, confidential document, etc. atan mobile apps kan hmang uar zel a. Kan fimkhur loh vangin keimahni bakah mi dangte’n an tuar thei tawh a; fimkhur a ṭul hle. App developer, permission leh user review-te hi download hmain uluk taka chhiar ṭhin a ṭha. Regular taka apps leh operating system update leh antivirus application ṭha tak pakhat tal install a ṭha. A him a ni tih kan hriat loh video/photo editor leh games ang chi phei chu install loh a ṭha lehzual.

Aw le, Google Play Store hi mi fimkhur lo tan a him lo hle, mi fimkhur tak tan erawh chuan a him thung. Play Store-a software-ah hian ads a tam em em a, hengte hi virus thehdarhna a nih avangin a theih hram chuan ads tel lo license leh paid version hmang ila a ṭha khawp mai. True caller, Photo editor, QR code scanner, document scanner, webcam, etc. mobile apps ṭangkai leh pawimawh tak tak ang chi phei chu lei a, subcribe thlap a fuh ber. Regular takin kan mobile apps leh operating system update ila, antivirus application ṭha tak pakhat tal install bawk ila, him leh ṭangkai takin hmang zel phawt ang u.

- Er. Chhungpuia Renthlei

Senior Technical Officer, NIELIT Aizawl