Zû, zûk leh Hmuam

He kan chênna khawvel hi a zauvin ram hrang, hnam hrang, sakhaw hrang hrang vuantu pawh kan ṭhahnem hle a. Chutih rual chuan thil ṭha leh nun kawng dik min kawhhmuhtu tur sakhua, Dan Bu kan nei hrang thliah vek a. Chumi zingah chuan Kristiante innghahna Dan Bu chu Bible a ni a, a nih rualin chhiar tam lo, hre tam lo leh inlungrual lo hnam tun dinhmunah kan ni bîk mai ang em? A chhan ni thei chu zûk leh hmuam, Vaihlo leh a kaihhnawih do kawngah hma nasa taka lâk a nih mek lai a, zu zawrh phalrai a ni ta hian thu leh hla a titamin Mizote kan lungrual lohzia tilangsartu niin a lang.

Ni e, zu chungchangah hian ngaihdan a tamin pawm dan pawh a tam hle a. Zêp thu chêng suh, zu zawrh duhtu lam leh duh lotu lamten ṭanchhan neih leh hriat ang angte an auchhuahpui dum dum a ni ber a. A eng lam zawk hi nge dik a, pawma pawm loh tur thilah mi ṭhenkhat tan hriatthiam har tak tur pawh a ni âwm e. Zu zawrh duhtu lam ṭanchhan leh ngaihdante chipchiar deuh zawkin tilang dawn teh ang.

Zu hi chu kan pi leh pute hunlai aṭang tawh khan kûtni vangthla, hlimhlawpna hmunah an lo chelek leh hlimpui ṭhin ber a ni a. Mizote nun phunga bet tlat a ni, tih te, zu khapna dan hman mek hi a hlawhchham, zu lei tur, in tur a awm reng tho, tih te, zu hi chu ram lian leh changkang zawkte pawhin an lo khap hleihtheih loh a ni tih te, mi ramahte pawh zu an zuarin an hung sen tiar tuar a, rui buai hmuh tur pawh an awm lo, tih te, zu in aiin in loin zu an buaipui zawk, tih te leh zu hi khap lovin dawrte hawngin zawrh ni se, zu ṭha kan in theih phah zawk ang, tih te a ni.

Heng ngaihdan, pawm dan te hi kan sawrkar chak takin thlawpin zu dawr hawngin zawrh a ni ta ngei a, zu ṭha kan in tâk aṭang khan kan êng sawt sawt mai. Taksain a lo mamawhin kan ngeih hle a ni ang, inchhungkhur ni se kan phuisui phah a, nu leh pa, nupui fanaute an hlimin an lawm a, Kohhranah kan tlatlumin ṭhenawm khawvengte pawhin min ngaihsan phah tia sawi rîk hriat tur erawh a awm lêm lo.

A chunga zu in aiin in loin zu an buaipui zawk tih hi thudik tak a ni. A dikna chhan erawh entirna hman a ngai. Dam loin dam lo buaipui ta se awmzia a nei ang em? Misualin misual vêk simtir tumin buaipui ta se awmzia a nei ang em? Mitdelin mitdel vek kaihruai ta se awmzia a nei ang em? Zu in miin zu khaprêm tumin buaipui ta se awmzia a nei ang em? He entirna aṭang hian zu in loin zu an buaipui zawk chhan chu a hriat theih mai âwm e. Tin, sawrkar thuneitute chuan heng an tiltih leh hmalak dante hi Pathian râwn chung zela kal an nih thute leh zu dawr hawnga zawrh a ni hi a dik lo a, a lo ṭha lo viau a nih chuan tihtawp leh mai theih a nih thute sawi rîk a ni ve tho bawk a.

A ni tak a, ‘Pathian râwn’ tih lai tak mai hi a pawimawh hle. Eng hi nge? Tu nge Pathian chu? Eng tiang hawia râwn tur nge? tia bangbo ve tak tak awm theih a ni a. Chung tena râwn dan tur an hriat theih zawk nan Chanchinṭha Johana ziak hmasa berah chuan, ‘A tirin thu a awm, thu chu Pathian hnenah a awm, thu chu Pathian a ni,’ a ti tlat mai! Râwn ber tur chu a hriat theih mai âwm e.

Zu zawrh duh lotute ngaihdan, pawm dan leh ṭanchhan ve thung chu Bible a ni a, a nih angin Bible-in zu hi a lo buaipuiin a khel ve reng em? Luhchilhin finfiah dawn teh ang. ‘A ṭhenawm hnena zu in tur petu chu a chung a pik e.’ (Habakuka 2:15). ‘Fimkhur rawh u, chuti lo chuan ei puar lutuk nen, zu ruih nen dam chhung khawsak ngaihtuah nen, in rilru a khat lutuk hlauh ang a, chumi ni chuan thang âwk angin thawk-leh-khatan in chungah a lo thleng phut ang,’ (Luka 2:34). ‘Chhuna awm angin mawi takin i awm ang u. Zu in buai leh zu ruia awm lovin, hur leh inngaih hmang awm lovin, insual leh initsika awm lovin, ruk hmangte emaw, mi duhâmte emaw zu ruih hmangte emaw mi hauh hmangte emaw hlep rute emawin Pathian ram an luah lovang, (I Kor. 6:10). ‘Itsikna te, zu ruihna te, zu hmun hlimna te, chutiangte chu chung kawngah chuan tunhmaa chutiang thiltih hmangte chuan Pathian ram an chang lo vang,’ (Galatia 5:21).

Hla siamtu chuan, ‘Pawisa khelh chîngte leh zu ruih leh a zuartu inngaih hmang, mi bawlhhlawh, amah ring duh lote hremhmunah an liam ang,’ a lo ti ve bawk a.

Zu siamna hmanrua pawimawh tak, dawidim chungchang hmun­khat ami chauh tilang ve teh ang: ‘Dawidim tel lo in ni ang bawkin chhang hlawm thar in lo nih theih nan Dawidim hlui chu thianfai rawh u. Kan kalhlen kûtna tur pawh an talh tawh si a, Krista ngei chu. Chuvangin i kût ang u; Dawidim hluia kût lovin, nun chhiat leh sualna Dawidima kût hek lovin, takna leh dikna chhang dawidim telh lovin i kût zâwk ang u,’ (I Kor. 5:7-8).

Heng Bible chang tihlan aṭangte hian Engkim Siamtu hian zu hi a lo buaipui ve hle a ni tih a lang chiang âwm e. Zu in thiam inzirtir aiin in loh thiam inzirtir a ṭha zâwkin a rinawm.