Hla leh a phuahtu

Vanglaini chan­chinbu dt.2.6.2015 chhuakah khan Pu K.L.Liana, thu leh hla lama miril tak khan hla leh a phuahtu chungchang a rawn ziak a. Pu K.L.Liana hian hla leh a phuahtute chung­chang hi a lo tuipui thin a, chanchinbua a thu rawn ziak te hi chhiar a nuamin a ngaihnawm thin hle a.

Mahse Vanglaini ni 2.6.2015 a hla leh a phuahtu tiha “Hringhniang an liamna thlafam khua chu e” phuahtu chungchang a rawn sawi kha tlem a han sawi ve ka duh a. He hla hi Pu Saihnuna, Leng Lal phuah a ni a, a phuah chhan leh a phuah dan pawh hetiang hi a ni.

Pu Saihnuna nau Pu Lallura leh Pi Vankungi te chuan fanu Saikhumi leh Lalrumi an neih hnuah fapa duhawm tak Lalhnuna an nei ve leh a. Lalhnuna chu naupang duhawm tak a nih laiin a thi ta mai a, a nu leh a pa leh a chhungte chuan an tuar em em a. Chumi hrereng chuan Pu Saihnuna hian he hla hi a phuah ta a ni.

Pi Vankungi, Pu Lallura nupui khan a damlai in he hla an sak ka hriat apiang hi chuan ka mittui a tla ziah a ni a ti thin a. Tun hma zawng zawng khan Tuichangral lamah chuan Pu Saihnuna phuah ah pawm vek a ni a, midang hming sawi rik a ni ngai lo.

Lengkhawm hlabu chhuak hmasa zawng zawng ah khan Pu Saihnuna phuah vek a ziak a ni thin a, a hla pawh hi chang thum leh a thunawn a ni a. Pu Saihnuna kutziak hlabu ah pawh hetiang hian ziah a ni. Mahse tunlai hian chang lina (4-na) hi a lo tel ta tlat a, midangin an phuah belh a ni thei ang em? Pu K.L.Lianan Pastor Chhawna phuah anga a sawi pawh hi a chang lina hi a phuah belh ang a, a phuah angin a sawi ta mai em ni ang.

Nu leh Pa tam tak rambuai hma lam a he hla lo sa thin te hi chuan chang thum leh a thunawn chin chiah hi an hriat dan a ni tlat. Pu Saihnunan a phuah dan takah chuan ‘Hringhniang’ tih hi ‘Hrinhniang’ a ti zawk a ni.