Winter Festival laiin traffic jam a nêp theih nan ruahmanna siam lawk a ṭul

Winter Festival 2024 chu December ni 16-21 chhung khian Lammualah hman a ni dawn a, a hnai leh ta hle. He Festival hi nikum lamah hlawhtling takin Lammualah buatsaih a lo ni tawh a, kuminah pawh a hlawhtlin leh viau a rinawm. Krismas boruak - huau huau leh phâwklêkna rilruin mipui, a bik takin ṭhalaite a chiah hneh tawh a, zan lama tei chhuahna remchang a ni bawk nen, kuminah pawh mipui an tam leh viau âwm e.

Winter Festival hi hlawhtling takin hmang leh ngei se, tiin duhsakna ka hlan a. Mipui intihthawvenna leh intâwllênna buatsaiha hlimna thlen hi a ṭha a, sum leh paiah mi tam takin an hlâwkpui ṭhin pawh a ṭha em em. Chutih rualin, mi dangte tana harsatna thlentu a nih ve theihna lai erawh ngaihtuah thlen a ṭul bawk.

Hâlpuah, hâlmawi leh a kaihhnawih thilte sorkarin a khap a, a ṭha em em. Hâlpuah leh hâlmawite an han hâl a, a'n puak ri dur dur mai te, khawpui chhung mawi tak taka a'n êng chuai chuaite hi mi tam tak tan chuan hmuhnawm leh hlimawm tak mai a ni a. Mahse, mi dang tam tak tana harsatna thlentu, hriselna atana ṭha lo a nih bawk si avangin sawrkarin a khap a ni.

Khawpui chhung laili tak maia Winter Festival buatsaih pawh hi mi tam tak tana remchanna leh intihhlimna, intihthawvenna leh sumdawnna remchang em em mai a ni a; a ṭha em em. Chutih lai chuan, mi dang tam tak tana harsatna thlentu a ni ve bawk tih hriat tel a ṭha.

Nikuma Winter Festival anga thoin kumina Winter Festival neih turah hian mi an tam leh a nih chuan traffic a jam nasa leh hle ngei dawn. Nikum khan lirthei (two wheeler pawh telin) tlân thei mang lo hial khawpin traffic a jam nasa a, Zarkawt leh Treasury Square inkarah pawh darkar 1 chuang fé thang a ngai ṭhin. Khatiang taka traffic jam nasa khan mi tam tak tan harsatna a thlen nasa hle; a bik takin dam lohna thilah.

Chuvangin, Winter Fest huaihawttute hian traffic movement chungchangah mumal takin ruahmanna an siam ngei tur a ni a; hei hi an mawhphurhna, an tihmakmawh a ni. Mipui pumkhawmna bul kawngpuiah chuan traffic han jam deuhte chu a awm ang, hriatthiam loh tur a awm lo; mahse, lirthei tlan theih mang loh hian khawpa traffic jam thlentir erawh a dik lo. Dam lohna thil leh chhiatna dangah rîkrum thil (emergency) thleng palh ta se, ambulance a ni emaw, kângṭhelh motor a ni emaw, tlân tlang bik theih loh hial khawpa traffic tih-jam a ṭha lo a, chhiatnaa chhiat lehzualna thlentu a ni thei.

Mipui punkhawmnaah traffic jam-te chu a ken tel alawm, ti liam puat mai loin, traffic a jam loh nan ruahmanna an siam lawk tur a ni. Traffic jam miah lo chuan hmalak theih a ni kher lo ang, mahse, jam nasa lutuk, emergency thilah pawh kal tlang theih loh hial khawp erawh an thlentir tur a ni lo. Winter Festival buatsaihtute hian mumal tak leh ṭha takin ruahmanna an nei lâwk ngei tur a ni. Mi dang tana harsatna thlen lo thei ang ber turin aw...

- Kezo