Khawvel thim ên tura chu!

Kan thupui han en vang vang hi chuan, khawvel tiêng ṭhintu chu, zanah thla, chhunah ní a ni mai alawm, a tih ve mai theih bawk. Nia, Pathian hian chhun lama tiêng turin ni a ruat a, zan lama atan thla a ruat tih Bible-ah khan kan hmu hlawm ngei ang. Heng ni êngte hi hnim, thlai, thingkung, etc. te tan hian a lo pawimawh khawp mai tihte pawh kan hre hlawmin ka ring. Zanah thla an êng ruih mai hi chu a nuam ve a nia; Arkaiden zan (October fullmoon) kan tihte phei hi chu ropui ve deuh mai a ni. Pathian pawh hian a thil siamte hi a en a, ṭha a ti em em, tih kan hria ang.

Han mitthla ta ila; leilung hring dup, lui mawi tak tak, thing leh nungcha chi hrang hrang – a hahdamthlakin mi a tilungawi viau ngei ang. Rin lohna lamah suala thlêm thlukin kan lo awm ta hlauh mai a, khawvel leh a chhunga chengte chu sual fate kan lo ni ta. Pathian thinurna chu eng tin nge ni ta zel ang le. A entir nan khawvel chu a lo thim ta vek a, chumi tiêng leh tur chuan kan hma lawka mi, Krismas kan tih hi a lo awm ta a ni ber mai e.

Mihringte dinhmun

Mi hausa pawh a la boral dawn a, mi fing ber pawh, rethei pawh, kan chan tur chu a inang vek a ni. Mithiamte sawi kan hre ṭhin ang a, mihring hian Pathian a zawng ṭhin, hmânlai chanchinte kan chhiar chuan; Bible-ah ngei pawh hian kan hmu. Mihring hian amah ṭanpui thei tur zawngin pathian chi hrang hrang a be ṭhin a ni. Kan pipute pawh khan Pathian awm hi an lo ring ve viau tawh a ni.

Mi pangngai, tungchhoa nung ṭêk ṭêk tawh hi chuan engtik ni-ah emaw chuan mual kan liam ve hun a la thleng dawn, chumi hunah chuan eng thil nge thleng dawn le? Pialralah nge, meidil lamah? Meidila tlak chu kan duh lo hlawm ngei ang, mahse, kan kal ngei ngei a ngai. Hei hi kan dinhmun chu a ni a, a rapthlak hle, Pathian kan tilawm zo tawh lo a, tihngaihna a awm tawh lo. Thuthlung hlui lamte kha han en mah teh, inthawi nana ran an hman zozai ṭhinte kha a tam thei khawp mai. A tira nuam tak leh hlim taka Pathian nena lêng dun ṭhin kha vawiinah chuan natna rapthlak pui pui, chhiatna leh chetsualna (accident) rapthlak tak takte’n min chên chilh ni tin ta mai a nih hi.

Khawvel thim ên tura chu

Johana (Bible) ziak aṭanga kan hmuh chu, ”Pathianin khawvel a hmangaih em em a, chuti chuan a fapa mal neih chhun a pe a,” tih a ni. Ka hriat ve dan chuan he châng hi khawvela thu mawi leh ropui ber an ti ṭhin. Judate beisei leh rin dan chuan, Mesia a lo kal ang a, heng lei lal hote hi a thuhnuaiah a dah ang a, lalram ropui tak rawn din tur angin an beisei a ni. Mahse, a lo ni lo a; heng khawvel lalte ni lovin Setana, min phuar bet tlattu zawk hi a lo ni a, sual chu kan thihpui si chuan kan chan tur chu lei lalram hi a nih loh chuan hriat thiamte pawh a har ang reng hle awm e.

Eng nga ti nge lei lalram chu a lo nih loh le? A chhannaah chuan - hengte hi chu pawimawh ve em em mah se, dam chhung tawitê bak a ni lo. A lalram rawn din chu chatuan atan, dam chhung bakah thlanmual piah lam, hriat phâk tawh loh thlengin a ni. Chutiang rawn ti thei tur chuan lei leh vanah tu mah an awm lo. Chutih lai tak chuan mi pakhat a lo kal a, Pathian fapa mal neih chhun a ni. Ani hian eng mah phût lêt nei lovin (free of cost) khawvel chhun êng turin Bethlehem-ah a lo piang ta a ni.

Krismas programme

Keini hun lai chuan pawisate kan khâwl a, ‘bâr’ thla a lo thlen hi chuan hmanpui tur lam hi rilruah a lo lang nghal ṭhin. A changkang deuhin party-te an siam a, zu nen, hmeichhia nen an ri map map ṭhin. Kohhran ṭhalai lam hman ṭhin dan hi chu ka hre chiang vak lo. Tunah chuan kâwn cheite kan ti a, kan fang kual a, zanlai pawh awm em em lovin kan lêng kual ṭhin. Hei bak hi chu ka hre vak lo a, eng emaw deuh lai kha chuan World Bank Road, Tlawng kam leh hmun fianrial ṭhenkhat laiah chuan mit tikham khawpa khawsate an awm ṭhin an ti.

Awle, engtin nge hman dan tur (programme) chu siam ṭha ber ang? Hmeichhe tan thianghlimna hloh phah nana han hman chu fel lo hle, rawltharte tan pawh zu leh ruihhlo tih ṭanna atana han hman chu - a va pawi dawn ve. Kan hriat ve reng atana ka duh chu, Krismas leh kumthar hi hun rei lo tê, ni 2/1 emaw vel lek a ni a; kan hun hman chhoh leh zel tur atana pawi thei tur, nun/nungchang hloh phah nan hman tum lo ila, thil ṭha lo rêng rêng tih chhin nan hmang lo ila, keimahni bawk lawm hle tur kan ni.

Intihhlimna lam hi kan nei ve vak lo, chuvang chuan, uar takin, nuam takin hman tur alawm, kan ti ṭhin. Ni e, a dik viau a, kan hman dan tam zawkte hi chu a ni mai thei. Ngun taka han ngaihtuah hi chuan kan hman ṭhin dan tam zawk hi chuan a ṭhelh ve deuh, awmze nei lote pawh a tih theih ang. Kan hriat loh vang hian hmangtu tam zawkte hi chuan biakin pawn lamah kan hmang a, hre chianga ngaihtuah peih chuan kohhran progamme baka han tih vak hi chu thil tih chi ni lem lo, inrem lo tak a ni tih kan hre thei ang.

Awle, nang, khawvel êntu chu i ni ve thei ang em? Thisen pek te, ṭanpuina pek te, nun fimkhur taka hmante hian vantirhkohte an lawm a, i nu leh pate an lawm em em; i nunah Isua hmel an hmu, a rûkin an ngaisang che, chu chu a lo kal chhan a ni.

‘Khawvel thim ên tura chu, hmangaih puan nên sinin’ fak hlain a lo tih ang khan, umm, hlim takin i hmang ang. Chibai bûkna ka hlan che.

- Lalchhandama Colney,

Chaltlang Lily Veng. Ph - 9862982321