NGO te fimkhur se

Tun hma aṭang tawhin kan NGO te'n politics-ah awn lam leh tih bik an lo neih fo tawh avangin kan nih tur ang hi kan pha lo deuh em aw a tih theih. Neutral taka awm tura mipui lamin kan beisei laiin hruaitu ṭhenkhat avangin kan NGO te an zahawm tawk lo ṭhin a ni.

Mihring chuan kan thinlung lamah chuan ṭan lam a nei thei tehmeuh mai, mah se chu kan thinlunga awm kan pawl zah­awm tak takte hmanga kan tilang ta ṭhin hi chu a zia lo lam deuh chu a ni e. NGO a inhmangte hi chuan kan dinchhan hi ti mai i la, thil dik loah chuan sorkar nawrin, a ṭha lamah chuan thawhpui mai i la a fuh berin a lang. Tuna kan NGO kalphungah hi chuan ruling lamin an duh duha an tih kawi theih leh opposition lamin an fuihpawrh theih hi kan ang tlat a, a nihna chen pawh a awm.

Kan inthlang te reng reng pawh hi, eng pawl pawh nise ruling lam an chak kan tih loh leh opposition-in hnehna an chang kan tih theih tur hian political party-te pawh inthlanah an inrawlh ta fo mai. Sum leh paiin ruling lamin an mi duhte an pui ṭhin niin a lang a, chutiang chiah chuan opposition lam paw'n an mi duhte an pui bang chuang lo. NGO inthlan result ruling leh opposition lamin an ngaihven viau ṭhin pawh hi a awm lo lem lo ve.

Tuna kan NGO neih lenho YMA, MSU, MZP leh MHIP te hi political insti­tution ṭha tak, Leadership a prac­tical a hman theihna hmun ṭha berte an ni. Chutihlai chuan hruaitu kan nih laiin politics-ah kan inhnamhnawih nasa lutuk ṭhin a, tute emaw ball-ah tangin lam ṭanga siam kan nuam lutuk ṭhin hian kan NGO te hi a ti zahawm lo ṭhin a ni.

Tunlaiah mi kan fing tawlh tawlh a, thil kan chik peih a, kan NGO te hian an tih awm an ti em, an kuang lo an nawr em tih te hi kan ngaihtuah zawng a ni chho ta. Social media a chak tawh si a, tute pawl emaw chet chhiatna pawh a darh zung zung zel ta mai. Engpawh mai hi insiamṭhat nana kan hman thiam loh chuan kan inhmanna pawl mai ni lo keimahni ngei pawh kan chhe vek thei tih hi hriat a ṭha khawp mai.

NGO hruaitu zawng zawngte hi an din chhanah chiang se, an tih awm tiin, an kuang lo hi nawr fo lo se a ṭha hle ang. Tin, hruaitu an nih laiin pawn lam aṭanga tih buai fo theihin awm lo se tih hi mipui lam duh dan a ni bawkin ka ring. Kan NGO te hi innghahna tlak, kan ram leh hnam tana chhenfakawm ni se tih hi ka duhpui khawp mai.

Engpawhnise, hmasawn mek Zoram hian hruaitu ṭha a neih belh zel ang tih hi ring i la. Kan NGO te pawh hian an lo kal tawh dan leh an nihphungte hi ngun takin zir chiang peih se, mipui sukthlek ngaihtuah chungin engkim hi fimkhur nan hmang se a ṭha hle ang.