GREEN MIZORAM NGE BLUE MIZORAM?

Media hrang hrangah Green Mizoram chungchang a lang leh ṭan ta. Sum tam tak sengin Mizoram sorkar chuan kumtin Green Mizoram a buaipui a, hei hian a tum ber chu kan leilung venhim leh leilung aṭanga tui leh boruak ṭha malsawmna kan dawn zel theihna a ni. Kumtin Green Mizoram denchhenin thing kan phun a, chanchinbuah leh TV-ah uar takin kan puangzar bawk a, kum hnih kal taa kan thing phunte chauh pawh kha Mizoram tihring dup thei tur chu an ni tawh asin maw le.

Kan sum senral ngaihtuah chuan Mizoram pum hi thingkung mawi tak takin a khuh hrin dup a hun viau tawh laiin fur lai ngat phei chuan Green Mizoram ni loin Blue Mizoram kan ni mah mah zawk. Silpouline-in ram pum deuhthaw kan tuam a, a bikin Aizawl ngat phei hi chu kei chuan 'blue city' emaw, 'silpauline city' tia vuah law law mai a fuh berin ka hria!

Kumtin mai, a bikin furpui laia chhiatna nasa tak kan tawk fo ta mai te hi kan in enfiah a ngai hle mai. Lirnghing leh thlipui ang chi te hi chu Congress emaw MNF emaw phaw sorkar se, Pu Hawla leh Pu Zoramthanga sorkar vanga pumpelh theih an ni lo. Hetih lai hian, chhiatna tam zawk kan tawhte hi chu kan pumpelh theih leh kan inven lawk theih, leilung dan kalha kan chet vang vek a ni a, chhiatna a ni zawk.

Mizoram, changkha ang maia rualrem loah, rem leh rem loa insak leh kawngpui sial a tam em em avangin lei a min a, thingkung a tlu a, Green Mizoram tuipui viau mahila ruah a sur dek deka sorkarin silpouline bawk a sem leh a, a tawpah Blue Mizoram bawk kan ni leh si ṭhin.

Thing ṭiak aiin silpouline hi sorkarin a sem hnem zawk lo maw? Green Mizoram hlawhtlinna tur hian kan zavaia kan ṭanrual a ngai e.

A bikin Aizawl leh district khawpui dang ṭhenkhatah leilungin a dawl loh tura insak te, tui luan kawr (drainage system) ṭha tawk lo te a tam mai. Kan khawpui hi khawpui mangkhawngah kan chantir a ni ber mai. Mahni ngam zawngte chunga zak kau meuha action an lak theih laia midang tana chhiatna thlentir thei in ṭhiah mai tur tamzia hre reng sia kan sorkar thuneituten an vei pet a, an mit an siai khum ringawt ṭhinte hi an bansan a hun ta. AMC te pawh hian motor parking leh a behbawm aṭanga mipui laka sum lakluhna lam ringawt buaipui lo hian chhiatnaa kan inbarh luh theihna lak ata hi kan invenna lam hi buaipui nasat zawk hi a hun hle mai.

Chhiatrupna laka ram venhimna kawnga sorkar hmalakna thlawpin kan zavaiin ṭangrual ila, kan khawsak inthlahdah ṭhin avanga kan chung ngeia chhiatna lo thleng ṭhin hi Green Mizoram denchhen hian pumpelh i tum ang u. Sun glass leh midum nihliap dum nen meuha kan minister zahawm tak takten TV a lang ngei tura Green Mizoram an hman hi a thlawn mai atan chuan a pamhmai lua e.

Kan ram zimte hi Green Mizoramah nge Blue Mizoramah kan siam dawn le?