Officer-te room chhung hi
Mizoram sorkar hnuaia officer-te office room chhung leh state dangte officer-te room chhung furnishing inan loh dan hi a danglam viau mai.
Tun hnai khan Sikkim lamah press tour-in kan kal a, a khawpui Gangtok-ah chuan Information & Public Relations Secretary leh Director room-ah kan inkawm; an room furnishing dan ka en a, thil hlu leh man to ang chi zu awm hauh lo a maw le!
Mizoramah chuan department lian emaw, department tê emaw, office room chu a turu mah mah hlawm chu a ni. TV man to a inhûng riau hlawm a, furniture lah a man to chi ni awm tak tak nen, a ropui mah mah chuan ka hria.
Sikkim sorkara an secretary room chhung chu a fai ṭha em em a, mahse, thil man to tak tak a awm ve lo. An Director room pawh chuti tho chu a ni. Mizorama kan officer-te room chhung nen chuan dang tak a ni.
Hman ni khan Pu Lalmalsawma Pachuau, IRS, Planning Secretary room ka lut ve mial a, file enfiah tur leh zir tur a inchhawp nual a. Mahse, a room chhung chu office room pakhat ve mai niin a lang.
Director te, state sorkar hnuai service (MCS, etc) laite ang chuan IRS val room chu a ropui lem lo. Mahse, kan thlêk kual ngial pawhin thil man to a inhûng lo tih ka hmuh a; a hnathawh leh department enkawl a hautak sizia ka hmu a, ka ngaisang letling hle.
Duh chu ni se, a department enkawl aṭang pawhin bungrua leh neuh neuh eng eng emaw man to leh mawi tak tak a tihtir thei ang tih a lang reng mai. Mahse, chutiang chu a ti ve lo a, ka ngaisang khawp mai.
Kan ṭhianpa Vanlalchhuanga, IAAS pawh kha Finance Secretary-in Mizoramah hun eng emaw chen a rawn awm a, a room pawh a chuti lua bik lo. Duh se chuan department hrang hrang aṭangin a room chu mawi leh man to tak takin a cheitir thei reng. Mahse, a ni pawhin a ti lo ve tlat; ka ngaisang ru hle.
Kan Mizo officer, central service tam zawk hian lei ropuina aiin an zahawmna, an dikna leh an mawina an humhim hle a ni.
State sorkar hnuaia officer tam tak chuan ropuina an mamawh a, sum an mamawh ang bawkin eirûk lamah tîmna nei aih loin an che bawrh bawrh ni ber hian a hriat a ni. An vua leh vângte an enkawl department-ah an thun theih theih an thun a, an zak map lo.
Mizorama department pakhat phei chu an Director chu sawi loh, cashier leh thil ti thei deuhte chuan an chhungte MR-in an thun mawlh mawlh a, an ngheh theih nan theihtawp an chhuah leh ta ṭhin a, family department a ni ringawt mai!
Department tê a piangah chhungte duhsakna an la na thiam a, sorkar hna a vân leh a harsat tehreng nen, zak miah loin an vua leh vâng an thun miah miah mai zawng a nih hi!!
- Lal Rinmawia