Krismas ni–December 25 hi milem betute aṭanga Kristiante’n an copy a ni em?

Sawi dan tlanglawn berah chuan: Roman Emperor Constantine-a Kristiana a lo inleh khan, ama hovin AD 336 khan December 25-ah Krismas an lo hmang ṭan a. He ni hi Rom-ho ni pathian hneh theih loh Sol Invictus-a birthday an lo chawimawina ni luahlan nana Kristiante’n remchang taka an lo lak chhawn ve a ni a. Rom-ho pawh chuan hmasang Babulon lal ropui, khawvela milem biakna tichhuaktu Nimrod-a fapa Tammuz-a birthday an lak chhawn a ni.

Tichuan, Babulon-ho aṭanga inṭanin, a hnua Rom-hovin ni pathian biakna ni atana an lo lak chhawn chu Kristiante’n an Isua pian cham lawmna ni atan an lo hmang ve ta a. Chuvangin, December 25-a Krismas lo chhuahna ṭobul chu milem betute tih dan copy chhawn a ni, tih hi khawvel mithiamte min zirtir dan, Kristian mithiam tam takin thu dik emaw tia min zirtir ve ṭhin tho a ni. Mahse, heng hi dâwt thu maia puhna, thu dik lo ‘bogus’ a ni tlat mai.

He thu hi Kristian zinga Krismas dotute zingah December 25-a Krismas ni serh hi milem betute nena inthlun zawmna a nih avanga hman tlak loh angin kohhran pawl ṭhenkhatte’n Krismas an hman duh loh phah ta a. Ringlo mite’n Kristiante leh kan Krismas min chirhtheh nan an hmang bawk a; mi rilru an tihnual ṭhin a ni.

Chutia Kristiante kût ni hlimawm leh nghahhlelhawm berin sawisel a tawh a, thil hre ril leh hre thûka inngai mithiamte’n ‘Masi hman tuiawm lo rawih khawpa an sawi chhiatna chu eng nge a awmzia tiin Christian Research Centre chuan 2022 kum aṭang khan a lo chhui ṭan a. Media Evangelical channel-ah leh tun hnaiah Gospel & World News channel-ah Krismas chungchanga dâwt thu leh thu tak thliar hrangin chipchiarin post darh a ni tawh a. Tunah chuan a tlangpui chauhin Krismas hman ṭan dan history dik tarlan kan tum ve a ni.

Puhna 1-na: December 25 hi Rom-ho ni pathian Sol Invictus birthday leh Babulon pathian Tammuz-a birthday, Kristiante’n an copy chhawn mai anga lo sawi chhuaktu hmasa leh mite’n Krismas sawi bawrhbân phah nana an hman chu hmasang mi pawh ni lo, tun hnai, 19th century laia Scotland rama Free Church pastor Alexander Hislop-a a lo ni reng a. A lehkhabu ziah tunlaia mi tam berin Luka ziak tluka an rin The Two Babylons, 1858 chu rinthu leh phuahchawp thil, fact check dâwl lo, Krismas sawihnâwmtute thu leh hla mai a lo ni. Chuvangin, Krismas leh Babulon milem pathian Tammuz-a khan inzawmna an nei lo.

Puhna 2-na: December 25 Krismas ni hi Rom hovin an ni pathian biakna ni atana an hman hma kum za zet kal tawhah khan Kristian hmasate’n an lo hmang daih tawh tih kohhran pate record hlui ber berte aṭangin ziaka finfiahna (documentary evidence) awm vek a lo ni a. Hippolytus of Rome (AD 170-235) te, Sextus Julius Africanus-a (AD 160-240) te leh Clement of Alexandria (AD 150-215) te khan an lehkhabu ziahah AD 200 vel khan December 25 hi Isua pian ni a ni tiin, ringtu hmasate’n chhût chhuakin Krismas ni atan an lo hmang daih tawh tih pawh an thuziak chhiar theih a ni, tih hriat chhuah a ni. An hman ṭan hun phei chu hemi hma hi a ni thei ang.

Engtiangin nge Rom hovin December 25 hi an ni pathian (sun god) biak nan an lo hman? Kristiante nge hmang hmasa Rom-ho? Hengte hi chu Roman history aṭanga chhui tur a ni. Kum zabi 3-na lai vel khan Rom lalram chhungah Kristiante an pung chak em em a, Rom khua leh tui mi tam takin an milem sakhua kalsanin Kristianah an inlet nasa a. Roman magistrate hmingthang Pliny the Younger-a phei chuan milem biakna temple-te chu a ruak hiai huai mai, tiin Epistle to Trajan-ah a ziak a ni. Roman Emperor Juliana phei chuan Kristian sakhuaa mi an inleh tam vang a ni tih hriain, Rom sorkar khan tihduhdahna an ti nasa sauh rêng a ni.

AD 270 khan Roman emperor thiltithei tak Aurelian-a’n lalna a rawn chang a, Rom lalram leh an sakhaw tluchhe mek tundin nan an ni pathian chu a ram mipui inpumkhat nan ‘State religion’ atan AD 274 khan a puang a. Temple thar a din hlanna ni atan pawh Kristiante Krismas ni pawimawh December 25 ni luahlan nan ni pathian hneh theih loh (Sol Invictus) birthday ni-ah a puang ve ta ṭhuai mai a ni, tih hi Rom-ho history-in a tarlan dan chu a ni. Chumi awmzia chu Rom hovin an ni pathian biakna ni atana December 25 an rawn hman ve hma kum 100 dawn lai kal tawhah khan Kristiante’n December 25 hi AD 200 vel khan Krismas ni atan an lo hmang tawh a. Khami hma khan ni pathian emaw, Saturnalia – Saturn pathian emaw, Persia-ho Mithra pathian emaw chawimawi nan December 25 hi an la hmang ngai lo. Chuti chung chuan, a leha lingin Rom-ho tih dan Kristiante’n la chhawng ve angin thu a thang chho ta zawk hlauh mai chu, thu veivirtu an awm tihna a ni. Kristiante leh an Krismas sawiselna hi Krismas dotute’n hahîpa an theh darh duh dan a lo ni bawk si. Mahse, tunah chuan Krismas hi Babulon leh Rom-ho hnena mi copy chhawn ang leka dâwt thu lo sawi chhuaktu – a kaikuang hi man chhuah a ni ta; tu nge a nih a hming leh a dâwt sawina lehkhabu ngei pawh laihlanin a awm ta a ni.

Mithiam ṭhenkhat aṭanga hnialna awm leh pakhat chu, berampute’n thlasik laiin ramhnuaiah beram an riah chilh ngai lo, a huanga an khung lai a ni; chuvangin, Isua pian lai hi December a ni thei lo; ṭhâl lai emaw, favâng emaw a ni ang, an ti ṭhin. He hnialna phei hi chu a lo rinthu viau mai, ṭanchhan a nei chau hle lehnghal a. A chhan chu, Bethlehem hi Israel ram chhim ni sa lama awm, vûr tlakna khawpa vawt a ni lo. Beramte hi khawvawt tuar thei tura hmul chhah leh lum tak nei an ni bawk si. Beram huang hi Israel ramah chuan lung pala hung, khuh hulna mumal pawh nei nei lo a ni. Thlasik chhung zawngin beram rualte hi huangah khung ta se, châwm a hautak viau ang. Helai, berampute ram ṭuanna hmun hi hman laia Boaza thlawhhma awmna hlui kha a lo ni a, Boaz’ Field an la ti reng. Bethlehem khaw mawng, mual pâwng hmun rem tak a ni a; a chhungah hian pûk zau ṭha zet zet, beramte leh a vengtute riahna remchang tak, beram dah khawmna remchang tak a lo awm reng mai bawk a. Chuvangin, thlasik khawvawtah berampute’n beram an riah chilh ngai lo tia Isua pian hun December 25 sawi bona ṭanfung chu pheh thluk a har awm lo ve.

Krismas tree pawh hi Babulon milem betute chîn chhuahah bawk Hislop-a hian a puh leh a. Hei pawh hi rinthu leh suangtuahna thil bawk a nih hmel. A pian hma kum sang li dawn lai liam tawha Babulon-ho chin dan kha ziaka inhlan chhawn a awm bawk si lo va, engtin nge a hriat bik, suangtuahna rama a phuah chhuah a nih ngawt loh chuan. Dik takin Kristiante’n Krismas tree an hman ṭhin chîng chhuaktu chu reformer ropui Martin Luthera kha a ni tih a chanchin chiang taka chhui theih a ni thung.

Bible-ah Krismas hman tur tih thu emaw, Isua pian ni hi December 25 emaw, ni dang emaw a sawi lo va; lawm ve duh lo chuan lawm ve lo mai se a pawina ka hre lem lo. Keini misual bo hnute min chhandam tura Pathian Fapa hringmia a rawn chan ni hi a lawmawm em a, lawm nachang hriate chuan Lalpa chawimawina ni atan hlim takin Krismas hi i hmang zel ang u. 

- Dr PC Biaksiama, CRC