HLIM TAKIN KRISMAS
Hun hi a kal duak duak a, fûr tuihâwk kan buaipui zo chauh emaw tih laiin kum tin kum a lo tawp dawna thing leh mau hnah chungahte chuan thlasik chhinchhiahna daifim an tle leh sur hlawm a. Van sang lam han thlir ila, van boruak hmun tin leh kil tinah thlasik tum kawng an kal paw chiai chuai ta.
He hun a lo thlen hian nun kawng dai sual vanga mahni in chhung lum pawh thlahlel hlei thei lova daitamah leh an thlen tawpa thlasik zan khaw vawt vîn tûk hnuaia zan hun khawhar taka hmang liam mekte hi thinlungah an lo thar leh ṭhin.
"Awmlai vei leh lusûn fate chan tâwk hi dawn ve teh, hnutiang mualliam hnu ngaiin an ṭap e. Par ang kan lawm hnu he ni ropui lo thlen hian, chhung kim dar ang lên lai kha ngai zualin, ṭapin luaithlipui an nûl ngei ang," hla phuahtute’n an lo ti mathlâwn lovin, heng nun kawng dai pelh mekte hi tu mah nausen lai aṭanga he nun kawng hrehawm tak hi zawh an awm lo. Chhungkuaa hlim taka hun lo hmang tawhtute vek an ni a, an thinlung hi a va rûm nasa ve ṭhin dawn em, tite'n ngaihtuah châng a awm ṭhin.
Hetiang khawpa nun kawng dai sual vanga Kristiante kan hunpui ber laia nun khawhar leh baihvai reng renga hun hmang mekte hre reng chung hian ṭhalaite u, he khawvelah hian kan nu leh pate áng chhung ai nuam hi hmun a awm ngai lo tih hriain, sum leh paiah emaw, thil dangah pawh kan nu leh pate hnena kan beisei (demand) ka hmu lo a nih pawhin, vui leh vaiah la lo ila; rual awt taka kan awm ve chângte hian kan nu leh pate hian hrehawm an ti ngawih ngawih a, min lainat avangin an rûm ṭhin asin.
Chuvangin, Kristiante hunpui Krismas leh kum thar vuakvêtah hian kan chhungte leh ṭhiante min zawnna hmun atan biak-in leh zai khawmna hmun lo ni fo se; kan chhungkua chu a va nuamin, kan nu leh pa, unaute an va thlamuang dawn em.
Hawh u, ṭhalaite u, ‘Min tlantu lal ber thar lo pianga chu a hming Lal Krista, Emmanuela, Hosana chungnung berah khian ropui takin awm rawh se, remna thu leng se khawvelah hian,’ tia kan Chhandamtu lo piang lawma zai khawm turin i inbuatsaih ang u le. Chu hmunah chuan, chu hmun ngeiah chuan kan chhungkaw tan damna leh lawmna famkim chu a awm si a. Chu hmunah chuan rualawhna leh kohhran leh khawtlang duh loh sual lam thil reng reng a awm si lo.
- Lawta Khiangte