Office tlai an la awm chuan Chief Secretary mualphona!

Ti ve leh tlat teh ang, designation plate tar loh vanga fak hlawh leh kei pawhin ka fak em em Chief Secretary thar hian office kal tlai loh thupek a chhuah hi a taka a bawhzui chuan CS fakawm takah ka chhuah ang a, a nih loh chuan mahni thusawi um pha lo midangho ang bawkin a mualpho ve dawn a ni mai.

Office hour kan vawng dik thei lo hi chu a office kal ṭhin sorkar hnathawk hniam zawkte thiam lohah kei chuan ka ngai ve lo. A chunga awmte thiam loh niin ka hre tlat. Hei hi inhnial pawh ka cho tân tân hle a ni.

Sipai hi an dis­cipline a ṭha ṭhin a, sipai chu an punctual a, hun an vawn dik chhan chu a vawng dik lote an hrem ṭhin vang a ni. Mizo tlangval zu nam ve ther ther rengte pawh hi police an nih chuan an ṭawn ngaia an la ṭawng reng chungin hun hi chu an vawng dik tlangpui - a chhan chu police department-ah chuan hun vawng dik lote chu an 'sazai' ṭhin a, hrem an hlauh vangin a hunah an thleng mai ṭhin a ni. Hei hian ka sawi tum hi a tichiang viau.

Mizoram sorkar hnuaia hnathawkte hi office tlai reng mai, office aṭanga duh hun huna bang ṭhin, chu mai pawh ni lova office hour chhunga inneihnaa kal, lungphunnaa kal, zaikhawm hman, committee hman an ni a, mahse hrem an ni ngai lo.

Miin hlauh tur a neih loh chuan dan a bawhchhe mai ṭhin a ni lawm ni, Sapramah chuan lirthei an khalh fimkhur a, fimkhur lo chu man a, pawisa tam tak an chawitir ṭhin an tih kha maw!

Chief Secretary hi sorkar hnathawk lal ber leh thu nei ber a ni a, office hun vawn dikah kher kher hi chuan sorkar hian 100% in a thlawp dawn bawk si a, chuvangin khauh takin thuchhuah a siam hi bawhzui se, office tlai hi hrem zel rawh se.

Sikul kal pawh mi ṭhenkhat duh lo chung dar 8:00-ah sawn a ni a, office hnathawkte pawh hian an hnathawh hun tura bituk hi dik takin zawm rawh se, hei hi Chief Sec­retary hian a tihhlawhtlin theih a rinawm a, ani thuneihna hnuai vek a nih vangin office hun vawn dik hi ama mualphonaah chantir loin a hmingṭhatnaah chantir thei turin theihna a nei a. Hemi ti hlawhtling tur hian huaisenna pawh a neih ngei ka ring tlat a ni.