Aizawl bazar seat

Aizawl chawhmeh bazara seat hmuh hi Millennium Centre-a a hmun biru deuha dawr neih aiin a hlawk zawk an tih tlat chu le! A taka finfiahna nei mah suh ila Aizawl bazar pui bera chawhmeh zuar hian an hlawh chhe lo ang tih hi chu kei pawhin ka rin dan a ni a, seat an insem dante hi hre ve kilh kelh lo mah ila an chet dan boruak leh kan kalpui dan hi sawi chhuah ngai loh thil a nih vangin sawi chhuah ve hrim hrim chakna ka nei tlat a ni.

Chawhmehah hian anhnah leh thlai chauh ka sawi lo, sa pawh hi sawi ve law law ila. Sa te phei hi chu a pawimawh hlei hlei a, a sum hrawm a lian a, ram economy khawih che thei tham khawpa lian a ni.

Mizoram mipuiin kan sa ei tur hi khawi aṭanga kan neih nge, hriselna atan a thianghlim tawk em, kawng sirah tho leh kawr rim chhe tak tak bula an zuar mai te hi thil inhmeh lo tak, hriselna atan a hlauhawm thei hial em tihte thleng hian buaipui tham a tling viau a ni.

Sa thianghlim neih theih beiseiin sum tam tak sengin sorkarin sa talhna in slaughter house a sa a, khawl man to pui pui a dah bawk a. Mahse mipui tam zawkin sa kan leina hmun erawh chu new market bazara sa dawrah sawn a ni tho si. Sa thianghlim leh thianghlim lo endiktuho te kha an la dam em aw. A tirah an rawn che ṭha dawn viauin a lang hman a, mah se tunah chuan tang thawm pawh an tluk ta lo a ni ber e - hei hi Mizoram a ni a, kan thil tih duh dan leh kan hmalakna te hi a va ho-lam ṭhin ve aw...

Ka sawi tum chu bazar seat te tak te te thleng sawn mumal taka enkawl an ni em, a huai huaiin seat an nei ṭha mai nge, Trade & Commerce hian mumal taka seat semin an in ṭhut thleng tir ṭhin tih te hi a ni ka hriat chak chu - a chhan chu chhungkaw tam tak nghawng thei thil a ni tlat. Hotute tlawn thiam thiamin seat an chang ṭha a ni mai em tih te hi a hre zawkten rawn sawi ula a ṭha awm mang e. Bazar seat hi thil ho te anga lang siin nghawng lian tak nei a ni tlat.