Sum thianghlim lo chu Synod chuan a dawng thei tawh dawn lo maw?

Kohhran hian a tih tur dik tak thuchhuah a siamah hian, belh tur a la nei a ni. Kohhran dan zawm kim chhunga mite’n nupui, pasal a rûkin an nei a, thla ruk zet a thunun a. Ngati nge ruihhlo zuarte hi a thunun ve si loh? An inkhawm a, thawhlawm an thawh a, an buhfaiṭham kan khawn a, target hrang hrang kan khawn a bâng chuang si lo. Eng chu nge sum thianghlim lo chu ni ta ang?

Ruihhlo zuarte chungah action la turin sawrkhar leh VDP, YMA, etc. kan beisei a. Kohhran hian nupui ru pawh a thunun si chuan, ruihhlo zuarte hi a thunun ve tur a ni dawn lawm ni? Kut kuangkuahin kan thlir liam a, kohhran sum bawm a kiam kan hlauh luatah hian sual kan vulh liam mek a ni. Buh lem leh buh tak chu kan ṭo za ngei mai, kohhran berin a thunun ngam si loh ruihhlo zuarte hian hnung lamah min nuih tet tet hian ka ring ṭhin.

Zu leh KS kan vai a, Kristian rama awm atan a mawi lo ve, kan ti a. A mawi kan zawng a, kan mawi chuang si lo. KS an pung a, zu a tlem phah chuang lo. Damdawi a tam tial tial a, kan ṭhalaite innghahna tlak loh an va tam ta em. Do tur ngah ram, do hlawhchham state kan ni a; a huhoin kan do a, mimalin kan do leh si lo. Eng vanga heti tak maia HIV/AIDS pung chak bik ta em em nge kan nih? Nawhchizawrhna hmun kan nei lo va, a remchan dan danin, hmanhmawh takin sex kan hmang a, chu chuan kan ram min suat mek a nih hi.

Ram dang leh state dang angin nawhchi zawrhna hmun kan neih loh vang a ni. Kohhran kan vengthâwng a, nawhchizuar kan neih loh phah chuang si lo. Khawvel tharah kan chuangkai ta. Ram dang, state dangte nunphung angin kan khawsak thiam a ngai ta a ni lo maw? Heti reng reng chuan kan hnam hian ral lam a pan zel ang a, HIV vei kan pung zel dawn.

Sawrkhar pawhin kohhran hi a ṭul chuan maimitchhinsanin, beng hupsan châng a neih a ngai. Kan dinhmun hi a ṭha lo tak zet tawh a ni. Ram inrêlbâwlnaah hian kohhran pawh inrawlh buai lutuk lo se la. Kan ṭhalaite sûkthlêk thlir chungin kan khap rêm theih si loh lakah hian kanin ham buai rei ta lua e.

Mimal zalenna kan zahsak a hun ve tain ka hria. Zu awm lohna hmuna zu in lo mi nih ai chuan, zu awmna hmuna zu in lo mi nih hi a Pathian thu em em. KS awm loh vanga KS mutpui lo mai chauh nih ai chuan KS kal pêl thei mi ringtu kan ram hian a mamawh. Sualna hi kan ding leh veiah kal se la, Pathian mi chu ngil takin a kal mai tur a ni.

Thlêmna tâwk lo ringtu chu a chak ngai lo va, thlêmna karah ding nghet turin Pathian chakna chu kan chakna lo ni zel rawh se.

- Zothansanga, Chhiahtlang Kawnveng.

Phone, 9612333536