Written by
Lalmuanpuia
Tutenge rak ve vak vak?
Citizenship Ammendment Bill do intiam ṭhiau Lok Sabha MP candidate an intlar pût kha hman ni lawk a ni a, an do tum ber thlawp (support) leh ta thut si MP kan neih avanga Mizo ṭhalaite an thinur viau hun lai hi chuan BJP hlauh tlawn avanga vote lo thei lote pawh hi lo ngawi ta mai mai se ṭha tur. Ṭawngkam hriam taka CAA dotute beihna MNF Vice President Pu Lalthlengliana ka aṭanga a chhuak ta mai hi a vanduaithlak ka tiin ani ang pa zahawm hi chuan ngaihtuah nawn leh se he thu a sawi hi chu a inchhir ka ring a ni.
Mizo ṭhalai pawi sawi loten an hre reng tur ringawt pawh hi a inchhirna tham a nih a rinawm. MNF Press Release siam, Mizo National Front Memo No.MNF/Media/01/2020/02 Dt.13.01.2020 tihah he thu hi kan hmu. MNF Vice President Pu Lalthlengliana chuan, "Tunlai kan politics boruak pakhat CAA 2019 hi MNF chuan kan duh lova kan do a, kan do zel ang. Kohhran zawng zawng, NGO leh Party zawng zawngin kan duh lo a, kan Chief Minister leh MP Pu C.Lalrosanga pawhin Prime Minister, Home Minister-ah nasa takin an bei a nih kha. Kan duh loh ang ngei leh kan ngen angin Mizoram chu min huam ve ta lo a, kan lawm hle a ni. Heti khawpa min duhsak a, min telh tak loh avangin kan Party duhdan angin MP pawh kan vote-tir a ni. Engmah thil hre chiang lo, ram tana ni khat pawh pen chhuak ve lo, powder inhnawih paw chawpa lo rak ve vak vakte hi engah mah lo ngai suh u," a ti.
MNF Vice President hian, "Engmah thil hre chiang lo," a tih hi tute nge a kawh keini ang ak zat hnih hnuai lam chuan kan hre ve lo. Vanapa Hall kawta ṭhalai lehkhathiam rual pungkhawm kha a kawhtir a nih vaih chuan nghawng a la nei lian viauin a rinawm tlat. Kum li hnu leka inthlang leh tur kan nihlaia kan ṭhalai, ram vei em avanga party pawh sawi lova CAA duh lova pungkhawmte chu engmah hre chiang lova kan lo puh palh a nih chuan ngaihdam dilna khua a la tlai lova, inphah hniam thiam hi a tlo nge nge ṭhin a nia.
Politician na na na chu khawi party pawh ni se thu an sawi tak tak hi chuan ṭawngkam hriam deuh an hman changte a awm ṭhin ngai a, hei hi Lunglei Hnam Run lama sawi a nih vangin Pu Thlenga pawh hi a inhâmpuar ve deuh a, an party-in BJP a thlawp tak avanga boruak han siam danglam tumna lam a nih pawhin ngaihdam theih loh tur a awm lo. A thusawi zawng zawng hi Press Release-ah chhuah lo ta mai se, tuna mi ang chi ṭawngkam hriam tak tak hi chu Ruling Party Official Press Release-ah dah lo se a inhmeh zawk awm asin.
A sawi tel zinga mi, "Engmah thil hre chiang lo, ram tana ni khat pawh pen chhuak ve lo, powder inhnawih paw chawpa lo rak ve vak vakte hi engah mah lo ngai suh u," a tiha ‘rak ve vak vak’ a tih takte hi sawifiah zui a ṭha a ni. Rak ve vak vak theihna ‘Freedom of Speech’ kan neih piah lamah rak ve vak vak lo thei lovin kan MP leh MNF Party-in CAB/CAA-ah Mizo mipuia an intiamna an phatsan miau si a nih hi. CAA hi a ṭha thar ta thut lova, kan duh loh em em kha a ni a, min huam loh pawhin, "E, a lawmawm hle mai," tih a tawk nen kan va ‘support’ chiah hi chuan a ṭha kan ti tihna a ni ta a. Parliament-a Bill inchuh reng rengin tumahin an duh loh thil an vote ngai lo, ṭha an tih loh an thlawp ngai lo, tun hma deuhva MP Pu Vanlalzawma pawh kha dinhmun harsa takah dingin a hai (abstain) mai a, hai ve mai tur a nih laia kan MP-in MNF party thu anga a support leh si avangin an rak ta vak vak a ni. An la rak ring dawn chauhvin ka ring.
- Lalmuanpuia