Chanhaite tana thilpek a hlu

Kristiante hunpui leh thlakhlelh ber zinga mi Krismas leh kum thar kan hmachhawn leh ta vûng mai. Mi hausa ber aṭanga a rethei bakberh thlengin thawmhnaw thar nen he kan hunpui hi hman kan tum ṭheuh a, kan phe suau suau mai a ni. Heng hunpui lo thleng turah hian ngaihtuah ngai chu chhuanchham leh rethei lungngai fate an ni; mahni intuituah ringawtah tawp loin, an tan engtin emaw tal luanchhuah ve a ṭha khawp mai.

Kan hriat miah loh hian mi tam tak chuan an neih bak bak mi chhumchhia tan an lo thawh nghek nghek a lo ni a. A taima leh khawngaihna ngah fâlte phei chuan mi neinung zawkte hnenah an campaign a, an sum leh thil hlu tam tak tak an thawh phah ngeiin a rinawm. Ṭhenkhat chuan ṭhian zaho angin chanhaite an ṭanpui a, pawl anga ṭanpui te, kohhran anga ṭanpuina semte pawh tam tak an awm.

Mirethei zawkte hi, "Engvangin nge an thawh chhuah ve mai loh a, ṭanpui an ngaih bik ṭhin ziah," kan ti mai thei; a mawh lem lo e. Amaherawhchu, mi chhumchhia, rahbi tleu laklawh tan chuan dinchhuahna a vâng ve em a ni. Tun hnai khan pawl pakhat lian vak lem lo hian an kum tin tihdan angin an luang chhuak a; khua/veng pakhatah chhungkaw 10 thlang turin YMA-te an ngen a, YMA chuan a âwm hliah hliah an lo thlang chhuak a, an hlan ta a ni. An ṭanpuiate tan khan an va hlu em.

Chung ṭanpuina pawisa fai an pekte chu an âwm hliah hliah hian a hriat a, a aia tam pawh pek/sem an châk viau ang. Mahse ṭhian hoa thawh khawm a nih miau avangin limit chin a awm lo thei si lo.

Tarlan tawh ang hian, kan milian hote hlei hlei hi an luang chhuak nasa viau niin ka hria. Tam tak chu an inpuangzar duh kher lo a, a dawng âwm takin lungawi taka an dawn chu an lawmna ber a nih hmel.

Sumdawng dawr lian nei ho tak hi a luang chhuak nasa an nih ngei a rinawm. Hman kum khan thawmhnaw dawr pakhat chuan thingtlang khaw pakhatah thawmhnaw tam tak mai an thawn a, chung chu YMA lamin an lo buaipui leh a ni awm e. Khatiang khan kum tin an tih ngei pawh a rinawm. Heng mi inphalte hi chunglam hian a let tam takin a rûl ve zel ngeiin a rinawm.

Sorkar hnathawkte zingah pawh mi harsate tana luang chhuak an tam viau awm e. Mipui mimirte hian kan hre vek lo zawk a. Puanzar loh hian mi hi an neih chhun chhunah an lo thilphal khawp mai tih kan hriat a ṭha ang.

Hei erawh ka sawi tel hram duh: Mi chanhaite tana mi inphalte inphalna turin kawng hawng ila, media hrang hrangah tarlan ni se chuan hei aiin luang chhuak duh an tam ang maw le.

A tawp nan: Kan ramah, kan khawpuiah ngei pawh mirethei leh chanhai tak tak tam tak an awm a ni tih hria ila; a tlem emaw, a tam emaw, kan neih ang tawk zelin he Krismas lo thleng tur pual hian luanchhuah i uar zel teh ang u.

- Lal Rinmawia