TUNLAI TITI : Ṭhalaite laka kan beiseite hi

Tunlai hian sawrkar laka beiseina sáng tak kan nei ang tho hian ṭhalaite lakah beiseina eng eng emaw kan nei a; chungte chu thlûr thum angin han sawi dawn ila.

FA NEIH TAM

Khawvelah hian data hnuhnung berin a tarlan ang chuan mihring tluklehdingawn (tld) riat chuang kan awm mek a (8.12 billion); heng zinga mihring tld 1.45 chu India rama cheng kan ni a, khawvela mihring tamna ber kan ni mek. Heti chung hian Hindu kulmûk RSS hotupa chuan fa nei tam turin Hindu sakhaw betute chu a fuih mek a; keini pawh kan Chief Minister Pu Lalduhoma chuan Mizo mipui fa nei tam turin min fuih mek bawk.

Fa nei tam tura infuih lar zual ramte chu Japan leh South Korea an ni ve mek a; nau piang thar aiin upa lam an pung chak zawk chu an buaina ber a ni.

Nikum khan Delhi-a Japan Embassy aṭangin min rawn be nawlh mai a. India-a an palai pakhatin Mizoram a rawn tlawh dawn a, keimah min kawm duh thu min rawn hrilh a. Kei chuan chanchin thar buaipui ṭhin ka nih avanga min rawn kâwm duh tura ngaiin, “Chanchin thar lak khawm lam hi ka chawlhsan tawh a, biak tlâk ka awm lo ang; mi dang ka khawhmuh ang che u,” ka ti a. Embassy lam chuan, “Ni lo e, nangmah kha a kâwm duh che a ni,” an rawn tih ṭâlh avangin Aizawlah darkar khat vel kan inkâwm ta a. A thu rawn sawi ber chu – Japan rama tar enkawl tur Mizo ṭhalai an mamawh thu a ni. Japan sawrkar chu tar enkawl lamah a buai tak zet a ni, a rawn ti a. Mi a mamawhna lama puih vak ngaihna ka hriat loh avangin a ṭul dan azira inbe chhunzawm turin kan inthlah ta a. Tunah hi chuan ṭhalai eng emaw zat, chhungkuate pawh heti ang lama hnathawk hi Japan ramah an awm tawh niin ka hria.

Mithiamte chhût danin hmeichhe pakhat hian nau 2.1 zel a hrin loh chuan chu hnam chu boral mai tura chhût a ni. Japan-ah hian tun dinhmunah chuan 1.2 chauh a ni a, an tan chuan ṭan lak pawh a ngai hle ang. South Korea-ah hian nau piang an tlem lehzual a, anni-ah hian 0.7 chauh a ni. India tan chuan hlauthawn vak tur a la awm lo, 2.0-ah kan awm mek. Mizoram hi National Family Health Survey hnuhnung berah 2.09-ah kan awm mek a, inthlah punna rate hi a chhe lem lo a, mahse, ngaihthah chi chu a ni chuang lo.

Mizote hi kan pun a ṭul hle lain, pung ta hluai ila, engtin nge kan khawsak zel ang tih hi ngaihtuah tham a tling. Mipui sum leh pai (socio-economic) dinhmun hian lei rem a rah hma hi chuan pun hluai hi kan tlinin a rinawm loh. Japan leh South Korea ramte hi economic dinhmun ṭha taka awm tawh an nih avangin inthlah pung tura innawr hian ram mipui chhiatna a thlenin a rinawm loh. Keini Mizoram angah hi chuan khawsak harsa leh rethei punna mai a nih rih dawn avangin tam hi kan la tlin lo ang. Mipui sum dinhmun ṭhaa awm phawt a, eizawnna kawng mumal tak a awm hma hi chuan inthlah pung tura infuih hian awmzia a nei tam theiin a rinawm lo a, mipui pawhin kan ûksâk vak lo mai thei. Lehkhathiam, hna thawh tur, eizawnna hmu leh tur mang si lo fa neih ṭeuh hi tu mahin an duhin a rinawm loh.

DRUGS LEH ZU

Ruihlo vanga harsatna tâwk hi chhungkua chu sawi loh, a ram ang pawhin khawvelah hian an tam êm êm a. Tunlai phei chuan ‘fentanyl’ an tih, ruihhlo siam chawp, thawk chak êm êm mai a hluar hle tawh a, USA pawhin an buaipui ber a ni tawh. He ruihhlo hi chemical niin, number 4 kan tih mai, heroin aiin a lêt 20-40 vela chak a ni a, cancer natna veite nachhâwkna atana hman ber, morphine aiin a lêt 100-in a chak a ni. He damdawi hlauhawm tak hi No. 4 tihchakna atan a zuartu ṭhenkhat chuan No. 4-ah an telh ṭhin a, hei avang hian mi tam tak an thih phah tawh a ni. He damdawi hlauhawm uchuak hian kan ṭhalaite suat nghauh nghauh turin min hlat tawh lovin a rinawm.

Zu a tam hian ruihhlo (drugs) a tlem em tih hi zirchianna a la awm chiah lo nâin, Congress sawrkarin zu zawrh phalna a pek khan ruihhlo hi a tam sawt a, a tláwm bawk nia sawi a ni. Hei hi a dik theihna a awm. Ruihhloa sumdawngte tum ber chu thlah thei lo khawpa ruihhlo chìn dawklaktir a ni. Zu man tlawm, awlsam taka lei tur awm khan tleirawl leh rawlthar, thil tih ve chhin duh hrim hrimte kha a hîp zawk a, ruihhloa sumdawngte sum hnár a chah phah lo thei lo a. Ruihhlo lama thlèm luh leh nan ruihhlo kha tlâwm têtêa zuarin, addict siam belh zel kha an ṭan lakna a ni tih ngaihtuahna hi a sual lutukin a rinawm lo.

Hei hi ruihhlo leh zua kan dinhmun a nih si chuan, khap bur ve ve mai hi thil tih chi ber a ni lo’m ni a tih theih. Tunah pawh hian kan khap bur ve ve chu a ni a, mahse, engual kan anpui lem lo chu a nih hi maw!

Zu leh drugs kan tihte hi anmahni ngau ngauah chuan sual an ni hran lo. Kan hman danin a zir loh chuan sualah an chang ṭhin a, hei tak hi kan buaipui chu a ni. ‘Hman sual’ emaw, ‘hmang sual’ emaw tih hi Sap ṭawngah chuan ‘abuse’ tih hi a tlukpui hnai ber a ni mai thei a. ‘Drug abuse’, ‘alcohol abuse’ te an ti a. ‘Damdawi hmang sual’, ‘zu hmang sual’ tih hi Mizo ṭawnga a lehlinna chu a ni mai awm e. Heng ruih theih thil avanga harsatna tâwktute/siamtute sawi nana ṭawngkam kan hman hi a dik tawk lo em ni? ‘Zu ngawl vei’ emaw, ‘drugs ngawl vei’ emaw tih aiin, ‘zu hmang sualtu/damdawi hmang sualtu’ te ti ta ila, a hmang sualtute rilru lamah a thawk na zawk ang em?

Ruihhlo (drugs) hi khawi ramah mah a zalen lo a, eng sawrkar pawhin an khap vek a. Zu erawh chu ram bung ang chuan Islam sakhaw zuitute lalna ramah chauh a zalen lo a, hengah pawh hian zu zawrh leh in phalna an pêk bîkna a awm tho. Hemiin a kawh ber chu – zu hi thil ṭha ni lo mah se, a tel loa awm theih loh thil (necessary evil) a nih avangin ngaihhnatthiamna a awm a ni.

Mizoramah chuan a bilh aṭanga a thawh loh vang (hei pawh hi zu aṭanga ṭawng kauchheh lo chhuak a ni) nge ni dawn, Bible-in a sawi pêl dâwrha zu hi ‘sual tinreng bul’ anga kan ngai ta hian zu hi kan hmelma lian berah min ngaihtir? He thilah hian kan kohhrante an pawimawh khawp mai. Kan bul hnaia Setana a awm reng anga kan ngaih ang bawk hian zu hi thil ṭha lo, mahse, kan bula khawsa reng a ni tia kohhran hian a ngaih a ngai a. Khawsa lo turin eng ang pawhin duh lo mah ila, a awm reng tho si. Setana do hneh tura min fuih reng ang hian zu leh ruihhlote pawh hi rilru lam zawk a do hneh turin min fuih ta se, heng thil ṭha lote hi hmang sual lo turin auhla chhep danglam ta se; tuna control a tum dan ai chuan a hlawhtling zawk mai lo’ng maw?

Ruihhlo (drugs) bikah hi chuan hmang sual lo tura infuih hi awmze awm lo a ni a. A chhan pawh eng dang ni loin, ruihhlo hi ‘tih chhin’ awm hleitheilo, tih tawh chuan awlsam taka a thanga awhna a nih vang a ni. Zu erawh chu khawvel ram hrang hrang en hian ram tam zawk, changkang zawkahte chuan mawhphurhna nei (responsibly)-in an in tih kan hmuin kan hre thei. Wine leh lekte phei chu an chaw fâknaa hmaih ngai loh a ni. Chuvangin, he ruih theih thilah hi chuan hmang sual lo tura inzirtirna leh mawhphurhna nei taka in tura inzirtirna hi an uar hle a ni.

“Zu hi thil ṭha a ni lo a, in loh tluk a awm lo. Kan lo in a nih pawhin zu hi hmang sual lo ila, mawhphurhna nei rânin i in ang u,” tih auhla hi nei ta ila, indona chanve chu kan ta a ni mai lo’ng maw (half the battle is won)?

HALPUAH LEH HALMAWI

Tun hnai deuh tih mai lohah chuan ka hriat theih chinah Krismas leh kum thar hi hâlpuah leh hâlmawi nen hman ziah a ni. Sum nei deuhin an sêng hnem deuh a, sum nei loin an sêng tlêm deuh a ni mai a; hlimpui em emtu an awm lain, ning em emtu an awm bawk. Ka kumte a la upat ve deuh hma kha chuan a hlimpui em emtute zinga tel mai ni loin, hâlpuah kuta keng puak ngat ṭhin ka ni a; tlema kumte a’n upat hnu chuan a ning em emtute zingah ka tel ve leh thung. Aizawla hâlpuah hâl lohna veng Kulikawna riah phei ve maite pawh châk châng ka nei rum rum ṭhin.

Kulikawn veng hian engtik chiah aṭang khan nge hâlpuah an khap hi ka hre lo a, hetia an khap erawh chu damlo leh upate tan malsawmna hlu tak a ni. Kulikawnah hâlpuah khap a ni tih miin an hriat khan damlote pawh Kulikawn lamah hâlpuah hâl hun lai hi chuan an insuan phei ṭhin a ni.

Tuna hâlpuah leh hâlmawi ilo sawrkarin a khap chhan ber nia lang chu boruak chhia (air pollution) a awm lohna tur a ni a. Khawpui a ni emaw, khawtê a ni emaw, khaw chhunga boruak ṭha lo a awm hian mihring leh ranin kan tuar ṭhin a. Krismas leh kum thar lawm nana hâlpuah leh hâlmawi sawrkarin a khap hi keimahni tan bawk a nih vangin kan zawm ngei hi a ṭha. Chutih rual erawh chuan, thil lawmna rêng rêng hi pui tak ni tur chuan eng emaw puak ri dur dur hi a ngai a, chutiang a awm lo a nih chuan a ho duh viau. Kan pipute’n an thil lawmna rêng rênga silai an neih ang ang an kap puak ṭhinte khan an thil lawm kha a tiropui a, ngaihhlut pawh a hlawh phah a ni.

Krismas leh kum thar lawmna thil a nih avangin puak thei leh hâla mawi thei khap a ni hi a lehlam zawng tak chuan ka ui hle mai a. Kan lawm Krismas leh kum tharte hi a nêp phah riau a hriatnate ka nei ṭhin. Mahse, a ṭha lo lam thlir erawh chuan thil tih loh tawp tur a ni tih a chiang bawk si. Engtin emaw ‘compromise’ dan a awm lo maw tih hi kan rilru hian a dap a dap ṭhin a. Khua aṭanga hmuh phâk, a thâwm ring lutuk ni loa hriat phak si, ram palailêngahte hian Krismas leh kum thar lawmna de chuai chuai a, puah dup dupna hmun tur a hranpa deuh siam hi a ṭha lo maw tihte ka ngaihtuah. Khawpuiahte hi chuan ram palailêng kan hlat deuh avangin hetiang hmun tur hi ngaihtuah chhuah mai a har deuh. Thingtlang lamah erawh chuan ram ruak zau pui pui, khua aṭanga hla lutuk lo an la ngah a, hengahte hi chuan thawm neihna hmun leh hun bituk han siam se, chung khuate tan chuan Krismas leh kum thar hi a hlu zual ngawtin ka ring. Khawpui mi, heti ang hun chhim duh chuan an pan ve mai ang a, nuam an ti phian bawkin a rinawm. 

- David M. Thangliana