Digital India leh a kaihhnawih

July 1, 2015 khan Digital India hi khuhhawn a ni a, hei hi India ram kil tin mai, keini Mizoram ngei pawh digital-ah nasa takin hma min sâwntir a. Langsar taka kan hmuh theih leh kan hriat lar em em chu, loh theih lohin dawrkaite’n gpay/phonepe theihna QR code an tar a ngai ta hial mai; hei hi Digital India hrin chhuah pakhat a ni. IT lama thiamna nei ka ni lo va, technical taka ziah ka thiam lo bawk nen, keini ang mi mâwl tê pawhina kan hriatthiam theih dan ber mi tin milin i ziak ang aw. A thiam zawkte pawh a cho chhuak mahna.

DigiLocker

He application hi digital india chawikan nan kum 2015 vêk khan khuhhawn a ni a, a ṭha ang reng hle. A thupui ‘Ka document-te engtik hunah pawh khawi hmunah pawh’ tih a ni. He app. aṭang hian kan Aadhaar card, Covid vaccine certificate, driving license, PAN card, motor registration card, insurance certificate, zirna marksheet, ration card leh LPG document-te bakah thil tam tak mahni phone-ah a tak keng kher lova hman theih a ni (as per IT Act, 2000).

Aadhaar

Aadhaar hi document pawimawh berte zinga mi a ni chho ta. Naupang kum tling lo thlengin neih a lo ngai ta a, kan fate Aadhaar kan siamsak a nih pawhin kum 5 leh kum 15 an tlinin update a ngai ṭhin. Hetiang tih loh vanga buaina leh harsatna kan tawh loh nan kan tihmakmawh a ni tih i hre thar leh ang u. Kan hming leh pian kumte kan document dang nen a inang lo a nih phei chuan mutmawh hnarmawhah kan nei tur a ni.

Common service centre kaltlang loin address hi hun eng emaw chen aṭang khan mahnia thlak mai theih turin phalrai a ni a (an phalrai rei vak lo mahna). Kan address a lo dik tawh lo a nih chuan an website kaltlanga thlak mai theih a ni. Aadhaar hi kan birth certificate tluk zeta pawimawh chu a ni lo mai thei a; mahse, a nei lo tan erawh buaina a tamin a luhaithlak ngawt ang. Tin, Aadhaar hmang hian awlsam takin PAN Card a dil theih a, awlsam tak bawkin Aadhaar leh PAN card-te hi a thlun zawm theih bawk (a free-a thlun zawm hun hi a tawp tawhin a rinawm, late fee chawi a ngaih tawh hmel).

Bank lam

SBI hi an branch tlawh kher lova dawr theih dan eng emaw zat a awm; chung zingah chuan internet banking te, YONO (You Only Need One) te, ATM keng kher lova ATM booth aṭanga pawisa lak theih dan YONO Cash te, an customer-te duhsak taka SBI Rewardz an siamte–point kan neih tam dan azira chumi hmanga kan pawisa hmang ṭhen lova mobile recharge/bill pek te, electric bill pek theihte a ṭha hle. Tunlai khawvelah Whatsapp kan khawih nasa a, chumi hmanga balance en dan thlengin an siam. Heng lo pawh hi a la tam âwm e.

MRB pawh hian customer-te tana remchang zawk an siam thar ve zel a, internet banking bakah, mobile banking thlengin a tih theih a. Hma kan sawn zel ang a, heng aia ṭha leh changtlung zawk min la hlui zel ang; chutiangin bank dangte pawh.

Google kaihhnawih

Google kutchhuak heng–gmail, google drive, google maps, google chrome, adt. hi kan hmang nasa ta hle mai. Smart phone nei tawh phawt chuan gmail kan neih a ngai ta zel, kum upa lamte’n ‘Ka nei lo, ka hre lo’ kan ti pawh a âwm viau. Mahse, tu emaw chuan min lo siamsak deuh zel a, password kan hre zui lo tlangpui bawk. Hei tak hi a pawi lai a ni ta a ni. Kan gmail password kan hriat loh chuan kan phone a buai zui tlangpui a, gpay pawh a nghawng nghal.

Google Photos hi hmang kan awm ta fur a, a lawmawm hle mai. Hei hian kan thlalak min lo dahṭhatsak a, kan phone kan tichhe palh emaw, a thar kan hmang emaw a nih pawhin kan gmail hmanga kan han luh leh khan kan nei let leh nghal thei vek a ni. Chutih rualin, kan duh tur ni lo kan thlalakte chu kan paih (delete) nghal zel a ngai, chuti lo chuan a free-a kan hman theih (15GB) kan pêl thuai mai. Kan duh chiah thlalak kan dahṭhat erawh chuan hman full a har ang reng hle. Maps hi khawpui ṭhenkhatah chuan taxi laka kal duh chin hriat nan leh pawisa pek tur zat en nan ṭangkai taka hman a ni a, keini Mizoramah chuan state dangte ang emin kan la hmang ṭangkai lo deuh niin a lang.

Scholarship

Kum chhirin high school aṭanga post graduate zirlaite’n tribal scholarship kan dil a, social media leh games kan khawih nasat ang aiin mahni scho. buaipui thei kan tlem; he lamah hian kan ngawng tlat. Scho. hi dil thei chin an awm a, dil thei lo hi chuan dil lo ngam mai ila a ṭhat zawk a rinawm; fate rinawm loh kan zirtir nghal ringawt tihna a ni. Chutih rualin, a dil tur ngawih ngawihte erawh chuan hmu ngei turin dil a ṭha hle. Kum tin a tlangpuiin September thla aṭang hi chuan scho. hi a dil theih ṭhin a, hun tiam pelh hnua document ngai la khawm ṭan chauh kan la awmte hi ngaihthah vang a ni thei ang em?

Scholarship dilnaah hian zirlaite’n bank account anmahni hming ngeia neih a ngai. Hei vang hian zirlaite’n loh theih lohin bank account an neih a ngai a, a ṭha hle. Chutiang ni lovin a pawisaa lak la ni ta se, bank account nei chuang lo tur hi kan tam awm mang e.

ABHA

SRHF-ZMC-a inentir tur tan ABHA application hi mahni phone-ah lo install hmasak a, registration lo tih hmasak a finthlak hle; hemi ti lo tan hian inentir a theih tawh loh. Hetiang ti tur hian thil harsa a awm lo va, social media leh games kan tih thiam chuan kan thiam tura ngaih a ni. Registration kan tih tawh chuan QR code scan-na tur an tarah scan a ni tawh mai, chutiang thiam lo tan puitu an awm tho bawk.

PMJJBY & PMSBY

Digital India khuhhawn a nih kum 2015 vêk khan khan Prime Minister Narendra Modi-a chuan Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY)–life insurance-te hi Kolkata-ah a hawng a nih kha. PMJJBY hi kum 18-50 inkarte tan a ni a, bank account kan neihnaah tih mai theih a ni a, tunah hian kum khatah Rs 436 a ni mek a. Hei hian eng vang pawha boralin a chhungte’n Rs 2,00,000 an la thei a ni.

PMSBY hi accident-a thi tan a ni a, kum 18-70 inkarte tan tih theih a ni. Kum khat atan Rs 20 a ni mek, he insurance ti mi tu pawh accident avanga a boralin a chhungte’n Rs 2,00,000 an dawng thei a; accident vanga ramtuileilo/rualbanloten Rs 1,00,000 an dawng thei bawk.

PMJJBY leh PMSBY-te hi tih kawp theih a ni a, bank account hmun hrang hrangah kan nei a nih pawhin pakhata tih a tawk. Pakhatah bak a hmuh let theih loh a, bank danga kan lo ti a nih chuan tihtawptir a ṭha; kan chawi thlawn mai mai a ni.

Heng life insurance, mi tin ban phaka a awm hi tih ve a ṭha hle. Mihringin a chhe ber kan tâwk lo thei lo, vanduaithlak taka kan lo boral a nih pawhin kan chhungte tana kan tihsak theih hnuhnung ber a ni.

Kan phone number hman lai hi hlut lo kan awm ve leh zel. Password siam thar dawn pawhin ‘Ka phone number hmasa kha a thi daih tawh, kha phone number kha ka hmang tawh lo,’ ti thei a za tel kan awm zel bawk. Kan phone number hman laite hi i hlut thar leh teh ang u. Hei hian kan buai lohna turah buaina min siam a, kan hun leh tha mai bakah, kan sum a lothlâwnin a liam bawk.

Amazon, Flipkart, Myntra, adt. lama bazar nasa hle si, heng kan sawi hrang hrang hmang hlei thei si lo kan awm ṭeuh ang em? Khawvel a changkang zel dawn a, chumi rual tala ke lo pên ve theih hi kan tihmakmawh pakhat chu a ni ngei mai.

- Lalthanpuia Fanai