Book of the Year chungchang PUTE U INDIK VEK, MAHSE...

Vanglaini Ngaihdan leh Thlirna huanga kan mithiamten Book of the Year an thlan dan leh an ngaihdan chungchang an ziah kha nguntakin phak ang tawk tawk in ka lo chik ve a, a mak ka ti!

Keini Literature huanga pian pawh la piang pha lo, tuiril mai hian kan entawn mek leh la entawn tur puitlingte hi kan chhang teh ang! Pu Mafaa ṭhahnemngaihna te, thuziak a chhiar peih leh chik peih dan te, hnam ropui zawkte literature a hriat dan leh Mizo literature hmasawn nana a rawn sengluh thiam dante hi ropui ka ti a. A lehkhabu chhiar hmun sawmhniha ṭhena hmun khat pawh chhiar pha lo hian a thuziah ṭhenkhat hi 'mah se' tiin kan sel teh ang.

Kumtin lehkhabu ziak ṭha chik takin a lo thlir a, ngaihdan fel tak a siam a. A duh ber ni lo MAL-in Book of the Year-ah an thlang ta fo si a, tun hunah hian a entawntlakna kan hmu reng chung hian a ṭhahnemngaih luata a ṭawng hlek hi han thlir ang aw.

“Ni 17 April-a a thu ziah “Vawihnih khat han thlan fuh loh palh te chu a awm ngai alawm, mahse an thlan fuh loh a ni kumtin deuh mai ni ber khan a lang a...” An thlang fulo kumtin ni loin mimal ngaihdan ni lo pawlin chik taka an ngaihdan lungrual taka an thlan hi ama ngaihdan dah lal hian a ṭang na mah mah lo’ng maw? A chhunzawmnaah vek hian “Pawl tlemte a mi tlemte in an duh zawng leh duhsak zawng an thur chhuak a ni ber mai lo maw, a tih theih ang...” hemi a ṭawngkam hi chu a chhiar nawn ang a, a ṭha ber lo tih a hre ngei ang. MAL-a a tlaktlum tak loh dan a sawi te hi pawmawm viau mah se phatna han sawi hi chuan tu pawn sawi se ṭawngkam thiam apiang phatna hi a awmang si a! A thlangtute a kah dan mawlh mai hi - MAL member hi Politician ṭha lo miah a chhuah vek lo chauh a, a zialo lam deuh chu a ni.

15 May-ah Book of the Year a pahnihna OPA ziah “Rambuai Literature” a sep rawtuina chu kan chhiar a, kan hria! Hei erawh ṭan lam a neih hi a tilang nasa mah mah. Tunhnai 5 June a thu ziah chungchang chhanglet deuhtuho laka zawhna a siam te hi lo en thuak ila (min chhanlet vaih zawngin khaw eng hmu ngam mang lo khawpin min siamthiam ngei ang!)” Anmahni an inhmuh len ang hian lehkha chhiar ṭhin mipuite hian an hmu lian ve em? Chhiartu eng ang fakauvin nge maw an ngah le...? a fu leh ta lo! Midang a chhuk en ta run mai, chhanglet lotu leh a ei zawngte fak ar-ek in amah chhangtute lungtuma vawm tum a ang lek lek! Kan sawi ve tak chiamho te leh a dangte pawh hi critics-ho mita hnial hrat leh fu lo lam thlir ching, sel tum mit lam zawk ka hmang mai a ni a, a ṭanna dik ve thozia leh a ṭhahnemngaihna hi ka hriat hmaih bik lo.

Midang hote hi...

Pu Lalzuia Colney-in ni 25 April-a Book of the Year thlandan chungchang felfai taka a rawn sawi kara a thu zeh fuh tawk loa ka ngaih pakhat chu “Kela be be suh, an talh tho tho dawn che” tih midang kah nana a hmang hi huat turin sawi lo mah se ka chan nise ka huat loh vek chuan ka zah viau ka ring! Tichuan, midang sawi pawh hmer telin “Mizo hnam nuai 10 chuanga inchhiar leh ṭawng hlawm hran nei, ziak leh chhiar kan thiamna pawh kum 100 chuang ni tawh. Min enkawl hmasatute zara hmasawn chak em em mai hian khuarel chhiatna te kan tawk ta thut te a nih em loh chuan Book of the Year a thlan tlak awm lo khawpa lehkhabu chhuak a chhiat ṭum awmin kei ka ring lo tlat nia!”

6 May ah Pu Lalngaihawma Khiangte (Beiseina Run)-in ‘The Pulitzer Prize’ leh ‘The man Booker Prize’ te nen a khaikhin thawthang a, a thlangtute miin an rin em vanga ropui niin a tarlang bawk. MAL ropui a tih karah hian a sitna a lang lek lek ta mai. A ṭhehnemngaihna leh thildangte hi ka hmuh hmaih hauh lo.

10&11 May a Pu Ram­hmangaihna ziak erawh Pu Mafaa tehna kum 5 dana thlan tur ang deuha a kaihlek sakna tih loh chu a tawi fiah phian mai. Ni 19 May a Pi K.Vanlalruati’n Book of the Year chungchang a ziah hi exam beitu an tam chuan topper nih pawh a hlu tiin kumtin thlan hi a thlawp vak lem lo a, a thusawi tam zawk erawh hi chu Book of the Year chungchangah ka kailut hleithei lo! A tawpa a ngaihdan a sawi erawh a chiang angreng viau.

Thlirna tlang dang aṭang...

Book of the Year chung­chang hian kumin chanchinbu chu a luah hnem ta bik khawp mai a, kan selna leh a chungchang kan sawina te hi amah bik kher kan sawina ni lo mah se kumina kan thlan hian nuam lo a tih phah viau ang em tih te hi kan ngaihtuah tel turah ka ngai ringawt a! Mahse a lak nat ka ring miah lo, a essay khungkhawm bu hi a hralh a kal sawt ang! Ka chhiar a ka chhiar nawn leh ṭhin a, mi pakhat ziak vek chu a ni si a maw? A ropui a, a ṭha a, a thiam ka ti a, a phu ka ti! Sel tuma chhiarchhuak phawt chuan a tawpah a fak daih ka ring!

Mahni nu leh pa leh Pi leh pute rualpui thuziak kan lo tuihnih ve vak chu a ni si a, min chhanlet vaih zawngin in chanchin chhuiin ka fak ar-ek vak ang che u! Rawtna tlem nen aw - Vanglaini pawh hian Book of the Year meuh an thlan hi chuan 'tun kum chu essay khungkhawm emaw fiction chumi khami chungchang a ni’ tiin sentence hnihkhat lekin han tuihnih ṭhin se a duhawm hle ang.

Engpawh nise MAL hian kawng dik zawh zelin kan thu leh hla tih hmasawnna kawnga ke an enna ah hian rah ṭha chhuah zel mawlh rawh se.