Scholarship leh Income Certificate

Central sorkarin hnam hnufual (Tribal) te tan zirlaiin an zir­laite ṭha taka an zir zawh theih nan scholarship chi hrang hrang a pe ṭhin a. Mizoramin kan hriat lar scholarship chu Tribal Scholarship leh Minority Scholarship tih hi a ni.

Minority Scholar­ship hi Christian, Muslim, Buddhist, Sikh leh Parsi te tan tih a niin pawl khat Cl-I aṭanga Ph.D zirlai thleng tan pek theih a ni a. India ram State leh UT te chu Seat Quota pek vek niin Mizoram tan pawh kum 2015-2016 atan seat 13240 (Fresh) pek a ni. Dil thei chin class I - X zirlai kum khata Family Annual Income Rs. 1,00,000/- pel lo zirlai promotion exam a marks 50% chin chunglam hmute tan dil theih a ni a. Cl-XI - Ph.D zirlai tan pawh mark 50% leh a chunglam hmu tan dil theih a nih rualin zirlai Family Annual Income in Rs. 2,00,000/- a pel tur a ni lo.

Tribal Scholarship hi class XI - Ph.D zir­laite hnenah pek ṭhin a ni a. He Scholarship hi Tribal nih vang ringawta hmuh theih a ni chuang lo. Zirlai nu leh pa (family) Annual Income Rs. 2,50,000/- pel lote tan chauh dil theih a ni. Sorkar hnathawk leh Corporation a thawk thlatin a hlawh late tan chuan a dil theih loh.

Hetiang a nih lai hian zirlai zawng zawng deuhthawin scho­larship dilna atan family annual income dik lo taka siamtirin, scholarship an dil ṭhin hi thuneituten ngaih­ven a hun takzet mai.

Rawtna - 1) Mizo­ram chhunga District Headquarters tina Income Certificate pechhuaktute hian tunhma zawng aiin uluk lehzualin an pekchhuak danah fimkhur se.

2) Institution tin hian an zirlaite Family background hre vek tura ngaih an nih avangin an zirlaite uluk takin scholarship dil thei chin hrilh fiah ṭhin se.

3) Kan sorkar chak tak pawh hian Deputy Commissioner ṭheuh­te Income Certi­ficate pekchhuah chungchangah hian fimkhur turin instruction khauh tak pe se.

Kan hriat ṭheuh angin tunlai hian Zoram pumah keini Mizote chuan thlarau lama harhtharhna kan chang mek a. Nitin a sang tel teh meuhten thlarau harhna beiseiin Kelkang kan pan mup mup reng a. He tih rual hian a kal tawhten mahni lawina kohhran ṭheuhah hlimna leh lawmna thar kan chawlut mek bawk.

Kan piantharna hian nitina kan khawsakna leh kan nunphungah a tak ram min hruai thleng se. Tichuan, dik leh rinawmna in mitinte kan inthuam tawh ang a, chu chuan he Zoram khawvelah hian nghawng ṭha tak a rawn thlen ngei dawn a ni.