Tun Krismas chu

Mizote hunpui, Kristiante hunpui, khawvel leh thil siam zawng zawngte hunpui, kan nghahhlelh em em chu kan lo thleng dawn hnai leh ta; a va lawmawm em, kan phû lo hle mai. Nikum lam kha chuan State Assembly member turte thlanna kha kan nei a, tun kumah chuan kan rilru la pêng tur thil eng em em kan nei lovin ka hria. Lusûn chhungte tan erawh mittui tlakna ni, a rûka mittui hrûkna ni a lo ni ve reng bawk a. Chutiang bawkin kum upa leh natna khirh tak tak neite tan chuan a dawt leha mi hi chu kan thleng zo ve tawh lo vang a, tihna rilru nen, rilru a pangkhing viau mai thei bawk. He lei hi kan kumhlunna tur a ni lo tih hi hria ila, hlim takin hmang ṭheuh ila, chu chu Pathian duh dan zawk a ni ang. Indawm kun, phûr loh, hlauh ang chite hi chu a duh dan a ni lo zawk ngei ang.

Ṭhalaite

A nghakhlel ber kan nih ka ring. Kan nghahhlelh chhan erawh a tlangpui thuin, a huau huau, nawmchen lam hawi a nih ka ring. Hetih lai hian, ṭhalai, invawng thianghlim tlat, rinawm tlat tam tak an awm ve ṭeuh tho. Nia, ṭhalaite tan chuan han invawn ûp, khûnkhân taka han hman chu a harsa mai thei. Chuvang chuan, programme zângkhai takte hi siam ve ṭhin a ni a, kan siam ve ngai lem lo a nih pawn ngaihtuahna kan sen a hun ve tawh viau awm e.

Ṭhalai ka nih ve hun zawng hian, zêp ta lo mai ila, kei chu intihhlimna hmun lam leh hmanpui tur tih vel ringawt hian ka khat ve ṭhin. Ka chhungte hian min ṭawngṭaisak fo a nih ka ring, chu bâwih ata chu vawiinah chuan ka lo fihlim ve leh dêr tawh mai. A hun lai kha chuan luck lo, michhia, vâk vâk ni mah ila, tunah chuan ka lawmna leh vanneihna a lo ni ta zawk.

Khawvel mite

Kristian ni ve lo zawng sawina a ni deuh ber a, chutih rual chuan Pathian duh loh zawng kan tih ṭhin leh ti ṭhinte, sim chuang lote sawi nan han hmang ila a ṭha awm e. Kan ramah chuan tihduhdahna rapthlak tak tak kan hriat ṭhinte kha a awm ve ngai lo, a awm ngai lo mai pawh ni mai lovin, inhmang ngai lo, inkhawm ngai lote chu kan ngainep hle ṭhin. Chuvang chuan, Kristian nih hi a nuam em em zawk a ni.

Hetih lai hian, kan chhungril nun erawh engtin nge a awm aw? A rah chhuah aṭangin kan hre thei ang. Ringtute kan hlim hlei thei lo, miin kan rawngbawlna te, thilpek kan pek ṭhin te, kan hnathawhte min faka min chawimawi zel loh chuan. Isuan Pharisai-te ṭawngṭai dan, rawngbawl dan a sawisel chungchangah khan heti hian a ti, “…nang chu i pindanah lut la, tukverhte khar vek rawh, tichuan, a ruka hmu ṭhintu che hnenah ṭawngṭai rawh,” a ti. Anni hi chuan an lawmman chu an la zo tawh, nang chuan nakina mi tur chu beisei rawh, tuisik no khat pawh a thlawn lo vang, a ti.

Sual a ngaizam lo

Mihringte hi chuan kan inchhui a, kan inen chiang a, chuta ṭang chuan a vawi khat tih sualna chauh a nih hi, hmun dangah hi chuan a fel em em hi, kan inti a; kan ngaizam, pawmzam mai ṭhin nia; a dik ve viau mai a ni. Thuthlung Hlui lamah chuan zawlnei ropui Mosia kan hre viau hlawmin ka ring; a hring a hrâna Pathian nen indawr ṭhin a ni. Mahse, a vawi khat tihsual zeuh avang khan Kanan ram kha a lut ve thei ta lo tlat a ni. Davida chungchangah pawh khan kan hmu leh a; Pathianin ‘Ka thinlung ang pu mi’ a tih ngat kha a ni a, mahse, tih sual ve zeuh avang khan hremna nasa tak mai a tâwk tlat a ni.

Aw le, hengte chu kum tam tak liam tawha mi alawm kan ti mai thei. Mahse, kha Pathian kha vawiina mi tho hi a ni, danglam ngai lo a ni. Rawngbawltu te, Mizo Kristiante i inbihchiang teh ang u. Kan rilru ngaihtuahte chiang takin min hmu reng a ni; lansarh duhna te, uanna te, chapona te kha.

Vawiinah chuan khawchhak mifing te, berampute leh Bethlehem bawng inte kan suangtuahnaah a lang uaih uaih ngeiin ka ring. Chutih lai chuan, nu leh pa lamte chuan kan fapa fanute kan ngaihtuah viau ang a, engtin nge an hman ang, thianghlimna hloh phah nan, zu in ṭan nan, ruihhlo tih nan an lo hmang mai ang a, tiin rilru kan lo seng ve ngei hlawm ang. Setana hian he hun remchang hmang hian mi tam tak a bum leh ngei dawn a ni.

Hman dan nuam tak, hlimawm tak, mahse, Isua tel si lovin kan hmang thei. Chutih lai chuan, hrehawm, hman dan ṭhing, ho tak, Isua tel siin kan hmang thei bawk. Amah ang taka siam kan nih avang hian Pathian meuh pawh hian duh thlan theihna kan neih, zalenna hi min zahsak ve hle a ni. Duhthlanna hmang sual, thihna avang hian Pathian hi a lawm lo reng reng, a hnen lama awm vek tur hian min sawm a, min nghak reng a ni. Chuvang chuan, tun Krismas chu, tih in tum tlang teh ang; hlim takin Krismas chibai vek u le.

- Lalchhandama Colney,

Chaltlang Lily Veng.

Ph – 9862982321