Krismas ṭah nan maw?
Kum tawp dawn hnaiha zing ṭawngṭai thupui pakhata ka sawi ve ziah chu, ‘Hunpui dawn hnaiha mitthi kan neih loh nan,’ tih hi a ni. Ka hmuh leh thlir dan hi dik min tihpui lo in awm nual mai thei; chutih lai chuan, dik min tihpuitu tam tak in awmin ka ring. Kum khat chhunga kan hunpui ber Krismas hi lusûn khawhar chhungkua tam takte tan ṭahna hunah kan hmang ṭhin tih hi. Kei ngei pawh hi chhanchhuaha ka awm hma chuan ka ni tho mai, chhungkuate pawhin kan lo tawng tawh a, eng nge ka la an zel dawn pawh ka sawi thei lo.
Mizo Kristiante hi he hun pawimawh takah hian ṭahna bâwihah kan tâng tlat niin ka hria a, hei hi Bethlehem-a Lal thar lo piang chungchang Bible thuin min puansak dan nena inpersan (opposite) tlat a ni; kan la sawi zel ang. Hetianga kan Kristian hunpui lai bera min ṭahtirtu ni awm deuhva ka hriat chu, kan hla pakhat:
Awmlai vei leh lusûn fate chan tâwk hi dáwn ve teh,
Hnutiang mual liam hnu ngaiin an ṭap e;
Par ang an lawm hnu he ni ropui lo thlen hian,
Chhungkim dar ang lenlai kha ngai zualin,
Ṭapin luaithlipui an nûl ngei ang. "
tih hi niin a lang.
He hla hi a thlûkte hi a ṭhain sak a lo nuam si a, biak inahte thlang ṭhin lem lo mah ila, Mizote rilruah a bet a, hmelmapa’n min bâwih nan a hmang ni berin a lang.
Kristiante hunpui Krismas hi ṭahna leh lusûnna atan a nih lohzia kan Pathian thu Bible-in engtin nge a lo sawi en thuak ila; Thuthlung Hlui leh Thuthlung Thar aṭangin tlemte chauh.
Thuthlung hluiah, "Mi, thim hnuaia kalte chuan êng nasa tak an hmu ta; thihna hlim rama awmte chungah ngei chuan êng chu a lo êng ta," (Isaia 9:11f); ‘Kan tan naupang a lo piang a’ tiin min hrilh zui a ni. Isaia-ah vek, "Vut aiah pangpar ṭhi hrui te, lungngngaih aiah hlimna hriakte..." tiin min hrilh bawk (61:3f)
Thuthlung Tharah hian kan hriat lar em em vek, "Mi tin ta tur Chanchin Ṭha lawmawm em em ka rawn thlen che u a ni," (Lk 2:10b) te, beram vengtute Pathian chawmmawi leh fak chung zela an kir leh thu te, Zakaria fakna thu te, Mari leh Elizabeti Pathian fakna leh chawimawinate kan hmu ṭeuh mai.
Aw le, kuminah hian Krismas kan lo hnaih leh ta. Chhungkaw dam tlanga awmte tan ai maha kan Pathian thuin a lo tarlan, "... thihna hlim rama lawmte chungah ngei chuan êng chu a lo êng ta," tih hi Krismas-in a rawn ken chu a ni tih hriain, lusûn khawharte pawhin Krismas hi nghakhlel takin i hmuak tlang teh ang.
A chunga kan hla thu tarlan hi Mizote hla ṭha leh ropui tak tak min siamsaktu phuah a ni a, amah zah leh ngaisang em em chung siin, kha lai châng kha ka han la chhuak ta a. Pu Rokunga (RIP, the grace and blessing of God be upon his soul) chhungte lainâte min lo hrethiam turin ka ngen e.
- Rev Biaka Chinzah