NEP 2020 HNUAIA STATE UNIVERSITY DIN TUR CHUNGCHANG HI NGAIHTUAH CHIAN A NGAI

October 30, 2024 khan Mizoram State University ‘draft bill’ chungchang Minister hovin sawiho a ni a; House-a put lut a nih theih nan Cabinet ngaihtuah tura dah a ni. Sawrkar thuchhuah tarlan danin, state university thar hlak din a hautak dawn avangin state college thlan bik pali (4) chu sâwi khâwmin cluster university neia Mizoram State University din tura ruahman a ni. Cluster university pahnih–Srinagar leh Jammu entawna duan a nih thu tarlan a ni bawk.

Cluster university pahnih Srinagar leh Jammu te hi ‘The Srinagar and Jammu Cluster University Act, 2016’ hnuaia din a ni. RUSA scheme hnuaia din niin, constituent college panga ve ve an nei. RUSA scheme hnuaiah khan state college-te tihchangkan nan cluster university ruahman a ni a; hemi atan hian sum tam tak dah a ni nghe nghe. State ṭhenkhat pawhin cluster university an din nual. Cluster university din chhan tam ber hi chu college changtlung zawk neih theih nan tih a ni.

RUSA scheme hnuaia cluster university leh NEP 2020 hnuaia cluster university/college-te hi an kalhmang a inang lo tih hriat a ṭha awm e. RUSA thar PM-USHA (June 2023) leh accreditation system thar (NAAC 2024) nen pawh a inrem chiah tawh lo bawk. Hetiang a nih avangin university leh college kalphung thar NEP 2020 leh UGC Guideline (2022)-te ruahman dan tlangpui hriat chian a pawimawh a, tawi deuhvin tarlan kan tum a ni.

NEP 2020 RUAHMANNA

NEP 2020 hian India ram zirna sang–university leh college-te siamṭhat nan rawtna tam tak a siam a. NEP 2020 para 10-naah hian zirna sang kalphung sâwi khâwm leh sawh ngheh dan tur tarlan a ni. Policy thar hian India rama university leh college zirna darhsarh leh chîrî lutuk hi a ngaimawh hle a; hengte hi hlawm khawm a, sawh ngheh a, zirna hmun lian tak, subject chi hrang tam tak zirna hmun ‘multidisciplinary university/college’-ah emaw, ‘higher education institution (HEI) cluster/knowledge hub’-ah emaw siam a tum a ni.

University hi chi hrang pathum–research-intensive university (RU), teaching-intensive university (TU) leh autonomous degree granting college (AC)-te awm tura ruahman a ni. Research-intensive university chu zirtirna leh research tihna hmunpui a ni kawp ang. Teaching-intensive university hnuaiah zirtirna lam an uar ang a, research lam pawh an kalpui tho ang. Autonomous degree granting college-te chu zirna chi hrang, pêng tam tak zirna niin, undergraduate zirna hmunpui an ni ang.

College-te chu sâwi khâwmin emaw, subject dah belhin emaw, multidisciplinary institution-ah siam tur a ni a; graded accreditation system hmangin mahnia degree pe tlak ‘autonomous degree granting college’-ah hlankai tur a ni. Multidisciplinary college-a siam tawh, mahnia degree pe phak lote chu university hnuaiah constituent college-a dah tur a ni. RUSA scheme hnuaia degree college-te sâwi khawm a, cluster university hnuaia direct-a dah ang kha a ni lo.

Kum 2040-ah chuan India ram chhunga zirna sangte hi multidisciplinary institution niin, zirlai tam tak awmna hmun a ni ang. College-te chuan kum 2030-ah multidisciplinary institution ni turin ṭan an la ang a; district tinah pakhat tal a awm hman beisei a ni.

Affiliated college leh thlûr khat chauh zirna (single stream HEI)-te chu multidisciplinary institution-a siam (transform) a, zawi zawia tihtawp (phased out) tur a ni. Affiliated college-te hi kum sawm panga (2020-2035) chhungin multidisciplinary institution-ah thlak a, graded accreditation system hmangin autonomous degree granting college-ah hlankai tur a ni. State sawrkar leh affiliating university-te chuan affiliated college-te chu vil zuiin, autonomous college ni thei turin theihtawp an chhuahpui ang.

UGC RUAHMANNA

Kum 2022 khan UGC chuan NEP 2020 duh dan anga university leh college-te multidisciplinary institution-a siam dan tur kawng thumin a ruahman a; chungte chu:

(i) university/college-te thawhhona (academic collaboration)

(ii) inzawm khawmtir (merger of HEIs)

(iii) department hawn belh (adding department).

Pakhatna–college te thawhhona chungchang bik hi sawi zui ta ila; kawng thumin ruahman a ni.

(i) Dual-major degree atana thawhhona: Subject thlûr/pêng khat chauh neite chuan college lian zawk thawhpuiin, subject tam zawk zirna an nei ve thei ang. Multidisciplinary institution ni sate’n subject/programme hawn belhin huang an zauh theih bawk. Entir nan, B.Ed leh B.A inkawp zirna siamin, B.A., B.Ed (Integrated Teacher Education Programme-ITEP) hawn theih a ni. Hawn phalna leh degree hi affilliating university-in a pe ang; professional course hi professional council pek tur a ni thung. Institution-te hian thawhhona thuthlung an ziak ang.

(ii) Dual degree atana institution pahnih thawh dunna: Dual degree (entir nan B.Tech & M.Tech) pe tura thawhhona hi institution pahnih inkarah siam theih a ni. Degree hmasa zawk hi host institution-in a pe ang a, degree dang hi partner institution-in a pe thung ang. Thawh dunna thuthlung ziakin, phalna (state, university, regulatory body) aṭangin lak tur a ni. Entir nan, IIT Jammu leh IIM Jammu te chuan thawh dunna thuthlung siamin, IIT Jammu-in B.Tech degree, IIM Jammu-in MBA degree a pe dawn a ni.

(iii) Cluster of college: College hrang hrangte hlawm khata dah khawm tur a ni. Zirna peng khat chauh nei leh college lian zawk thawhho theihna tur a ni bawk. Zirlaite’n cluster college hnuaiah parent college leh partner college aṭangin an zir kawp thei ang. Academic Council leh Finance Committee an nei ang a, university hnuaiah affilliation an nei ang. Admission te, examination te, result leh degree-te chu university-in a pe ang a; state sawrkar college an ni zui zel ang. Thawhhona thuthlung ziah tur a ni bawk.

Cluster college enkawltu Board of Directors siam tur a ni. Zirna peng hrang hrangte chu an awmna university statutory body hnuaiah an awm ang. Board of Directors, Academic Council, Finance Committee leh Curriculum Development Committee-te nei hrang mah se, affilliated college angin an awm rih ang. Hun eng emaw chen hnuah cluster of college-te chu college pakhat (single unit) angin affilliation pek tur a ni.

Multidisciplinary institution anga an insiamrem hnuah ‘graded accreditation system’ hmangin ‘autonomous degree granting college’-ah hlankai tur a ni. Grading an neih dan azirin research intensive university emaw, teaching-intensive university emaw an ni zui thei ang.

ACCREDITATION SYSTEM THAR

NEP 2020 duh danin university leh college-te tehfung thar ‘graded accreditation system’ chu NAAC chuan January 27, 2024 khan a tichhuak a. Accreditation chi hnih Binary Accreditation leh Maturity-Based Graded Accreditation siam a ni. Binary Accreditation hnuaiah hian college leh university-te chu accredited tih emaw, not accreditated tih emaw chauh pek tur a ni.

Maturity-Based Graded Accreditation hnuaiah chuan tehkhâwng level 1-5 thleng a awm. Level 1-4 chu tualchhung university tehkhawng tur a ni a, level 5 chu international level tehkhawng tur a ni thung. Binary Accreditation hi June 2024-ah hman ṭan a ni a; Graded Accreditation chu December 2024-a hman ṭan tur a ni bawk. Accreditation system thar hnuaiah accreditation nei turin Mizoram college-te chu NEP 2020 duh dan anga an insiamrem a ngai dawn a ni.

STATE SAWRKAR TIH TUR

State university thar tur ruahman leh NEP 2020 duh dan anga state sawrkar college-te sâwi khâwm a, multidisciplinary institution-a siam leh autonomous degree granting college-a hlankai hi state sawrkar kut a ni. UGC ruahmanna anga hmalak a him ber ang.

UGC ruahmanna angin affilliated college ṭhenkhat hi dual-major degree (BA, B.Ed, etc) zirna turin sâwi khawm theih a ni. College ṭhenkhat, department hawn belha tihlen mai theih an awm bawk. College tam zawk erawh hi chu cluster pali emaw, panga emaw a sawi khawm a, multidisciplinary institution atan ruahman tur a ni.

Multidisciplinary college, autonomy nei phak lote’n university hnuaiah constituent college nihna an dil thei ang a, university nen inremna fel tak ziak tur a ni. College pali chauh thlang chhuak a, constituent college-a dah a, state university din tum hi NEP 2020 leh UGC kaihhruaina nen a inmil lo deuh niin a lang.

College sawi khawmna dan (act/regulation) hi siam ngei tur a ni. Cluster college kalhmang tur te, Board of Directors, Academic Council, Finance Committee leh Curriculum Development Committee din dante ruahman tur a ni.

State university din turin NEP 2020 duh dan angin ‘State University Act’ siam tur a ni a, State Assembly-ah pass tur a ni. University ṭha tak din hi Mizo hnam tan a pawimawh em avangin ngun taka ngaihtuah a, ruahman tur a ni.

TLANGKAWMNA

NEP 2020 hnuaia din autonomous degree granting college-te chu university-a ngaih an nih tak avangin cluster university hranpa din kher a ṭul lo niin a lang. Constituent college ni turin multidisciplinary institution nih hmasak phawt a ṭul bawk. Mizoram mamawh chu state university pangngai, post-graduate zirna, research tihna hmunpui leh constituent college-te enkawl thei a ni. Mizoram collge-te chuan constituent college nih tum mai lovin autonomous degree granting college ni ngei tura ṭan lak a ṭul hle dawn a ni.

References: (1) NEP 2020, Ministry of Education (July, 2020); (2) Guidelines for Transforming Higher Education Institution into Multidisciplinary Institution, UGC (September, 2022); (3) PM-USHA Guidelines, Ministry of Education (June 2023); (4) Major Reforms in Accreditation of Higher Education. NAAC (Press Release Dated 27 January, 2024)

- Prof. Vanlalchhawna