Krismas leh Mizote

Khawvel hunpui, Mizote’n nuam kan tih leh kan nghahhlelh em em mai Krismas kan thleng leh dawn ta reng mai. Khawnge Mizo ten Krismas kan lawm dante inthlir zau dawn teh ang.

Zoram khawvel tinghîngtu Krismas

Thla an sik a, khawlum chhêm boa a’n awm a, boruak a’n vawh chho hian chuan Mizote rilruah chuan Krismas a lo lang thuai a. Krismas lawm turin Zo fa tlang tinrenga mite chu kan phu suau a ni ber mai. He hunpui hian Mizo mipuite hi min tiphâwklêk a, kan Zoram khawvel hi a nghîng lawih a ni ber mai. Mizo tawh phawt chuan a rethei hausa, thingtlang chengker aṭanga khawpui thleng hian mahni khua leh veng lama Krismas hman loh hlauvin kan rilru kan sêng a ni.

Krismas tluka mahni khua, veng lama haw rûnpui hi kan nei kher awm lo ve. Inthlanah hian mahni khua lama vote thlak tura haw rûnpui ang deuh chu kan nei ve ṭhin a, mahse, Krismas tluka mahni khuaa haw kim hi kan nei ngai awm lo ve. Officer aṭanga mi ina inhlawhfaa awm te, sipai te, zirlai te, an thawh em em pawh kan hriat loh te, foreign lam aṭanga vairam leh thingtlang chengker ber aṭangtein kan haw khawm nguah nguah mai chu a nih hi maw. December thla tir aṭanga thla tawp thlenga haw tâwk lah bo lo. Sap hlain, “I’ll be home for Christmas (Krismas-ah chuan in lamah ka haw ve ngei ang) tih hla ang deuh hian, mahni veng leh khua ngeiah, khaw tê leh lian, changkang emaw, changkang lo emaw, mahni hmun ngeia hman loh hlau hian kan phu suau suau a ni ber mai.

Chu mai a ni lo, he hunpuiah hian sumdawng lian ber aṭanga zan lama ar bawp zuarte thlengin hlâwkpui ngei tumin kan inbuatsaih a. Zan dang a tam tehlul nen, thlasik khaw vâwt pawh zan dang a tam leh dawn tehlul nen, Krismas hnaih dawnah lo chuan ar bawp kan ṭhutpui peih lo va, Krismas a zo a, zuar zui pawh lan awm leh mang dêr lote hian Krismas kan ngaihhlutzia a tilang chiang viau awm e.

Tlang hrang hrangah hlimhlawp bâwlna kan siam a, naupang lawm aṭanga puitling lawm, carnival, fair leh concert tih vel a ri sup sup a; picnic leh advance christmas nen December thla hi chu kan her liam a ni ber mai. Kâwn chei thâwm te, zan hawklak lêng mai mai tawkte nen he hunah hi chuan Krismas hian hlimna leh lawmna hrang hrang hian kan rilru a luah khat chu a ni ber e. Krismas kan lawm zo a, kum thar kan lawm zawh meuh chuan, khua a vawt reng a, mahse, tu mah kan sâhâwk leh tawh miah lo nia. Hetiang taka kan lawm leh kan hlimpui kûtpui hi khawvel thil tak pawhin, a dang hi zuk awm ve miah lo va.

Mi tin nghahhlelh Krismas

Krismas hi Kristiante chauh hian kan lawm a ni lo va, khawvel hian an lawm a ni e, an ti ṭhin. Khawvel tana lo kal Lal hi khawvel mite hian lalah pawm ve chiah lo mah se, khawvel tan lal a nihzia tarlan nan khawvel hian a pian champhaah meuh hi chuan an lo lawm a ni ber e. Kohhran mite chuan biak inah programme siamin an hmang a, ruai nen hlim takin an hmang a. Thil mak deuh chu, he hunpui hi Kristian tak leh kohhran anga hmang ve peih miah lo pawh hian mi lawm thâwmah hian Krismas leh a behbawm hi nuam an lo tiin an lo hlimpui ve em em ṭhin nia.

Zoram khawvel hian Krismas lawm tura mi tin an buai karah hian Krismas thil leh a behbâwma buai ve miah lo, inkhawm pawh inkhawm peih lo, ruai pawh ṭheh peih lo, mahni in lum aṭanga ràlkhat thlira lo thlirte pawh hian Krismas hmang tura an insingsakna leh an buai suau suau karah hian hetiang boruak vel hi nuam an lo ti ve em em a. Inkhawm thawm te, zaikhawm thawm te, ruai ṭheh rite zawng zawng hi a takin tel ve peih lo mah se, nuam an lo ti viau zel a ni. Heng ho hian ruai an ṭheh ve peih pawh a ni lo va, an inkhawm ve peih pawh a ni miah lo; mahse, miin Krismas an lawm thawmah hian he hunpui hi an lo nghahhlel ve em em ringawt ni a. Hengte hlei hlei hian Krismas ropuizia a tarlang. Covid laia Krismas lawmna an reh duk khan heng ho hi an nunphung a buai ve lo; mahse, Krismas boruak reh kha chuan nuam zuk ti bik chuang lo va.

Chapchar Kût leh Krismas

Mi ṭhenkhat chuan Mizo ṭhalai zingah Krismas aiin Chapchar Kût hi nuam ti zawk an tam tawh angte’n an sawi ṭhin a, nuihte lam lam hi a za ṭhin. Tute emaw, khawvel taka nawmchen duh, sakhuana ngai thei lo, an duh dan taka Krismas lawm thei lo ṭhenkhat hian Chapchar Kût hi sawi ropui an tum vel mai mai a ni awm e. Krismas hi Mizote tihropui a ni lo va, khawvel hian nuam a ti a, an hlimpui a ni. Kristian taka rau tak lawm thei lo pawh hian nuam an ti viau a ni.

Krismas nawmna ber pakhat chu kan lo ur lâwk nasa a, kan lo hmuah nasatna hi a ni. Thlasik khaw vawt sûrh hi Krismas nen inzawm anga sawiin, ‘Krismas rim a nam’ tite’n kan sawi ṭhin. Krismas hian rim a nei lo va, khawvawt pawh hian rim hran a nei lo; mahse, thla a lo sik hian Krismas lam rilruin a hawi avangin Krismas rim nam angte’n kan sawi mai ṭhin a ni. Hetiang taka kan ur lâwk avang hian Krismas hi kan ngaihlu a, nuam kan ti ṭhin.

Hetiang taka kan ur lâwk hi hman nawm loh kan hlau a, ringtu ṭha tak ni lem lo, khawvel mite pawhin khawvel thilin nuam taka hman an lo tum bawk ṭhin. Krismas ur lâwk zan phei chu Mizote khawvelah a aia nuam leh chuang awm lo tur khawp kan helhhawlh ṭhin a ni a. Hman nawm loh kan hlauh lutuk avanga sual tihna remchanga kan hman nasat ber pawh a ni hial awm e. Hetiang taka kan hlut leh nawmchenpui zan hi a awm chuang lo. Chutiang taka chen tumte chuan an chen theih loh avang sawi hnâwm an tum deuh mai mai a ni e. Chapchar Kut, zan khat emaw lek zalen deuha lo lawm ṭhin nena tehkhin chi chu a ni lo deuh.

Hmânlai Krismas kha

Krismas kan sawi hian hmânlai deuha Krismas kha nuam kan ti deuh vek ṭhin. Mi ṭhenkhat chuan, “Khatih hun lai kha chuan lawm tur te, hlimpui turte a váng a, Krismas kha kan tan chuan a hlu bik a ni, tunah chuan keimahni tâwka hlimpui leh lawm tur hi kan ngah ta lutuk vang a ni ber,” an ti. Hei hi thui tak chuan a dik ve awm e. Mahse, tun hma lama Krismas an hman nawmna kha thil dang vang a ni lo va, Kristian taka an lawm ṭhin vang a ni. Tun hma chuan Krismas kha an ngaihlu a, an inkhawm ṭha a, lênkhawmte an uar a, hlate an rem mawi bik a, ruai ṭhehte an tam ṭhin vang a ni.

Thil chu a nih tur anga tih hian a fel mai a. Football chu pet tur a ni a, ben ṭâlh kan tum hian a buai a. Volleyball chu ben tur a ni a, kan pet fo chuan thil a buai ṭhin. Hetiang hian Krismas pawh hi Kristiante hunpui a ni a, Kristian taka lawm mai hian a nuam ber. Chapchar Kût hi Mizo takin hmang ila a nuam mai a, tih tunlai viau kan tum chuan a nuam tawh lo. Krismas pawh hi khawvel thil leh changkang deuh aiin Kristian takin lawm ila, a nuam mai a, kan hlimpui ṭhin. Inkhawm ṭha ila, lênkhawm uar ila, ṭha takin ruai ṭheh vek ila nuam kan ti ngawt ang. Mahse, tunah chuan kan duh duhin kan hmang a, khawvel thil takin kan hmang nasa lutuk a, a nuam kan ti ta meuh lo a ni. Chuvangin, tun lai khawvelah pawh hian Kristian takin, rau takin Krismas hmangtute hian Krismas chu an hmang nuam ber ngei ang.

Khawvel changkanna hian hlimhlawp leh nuam dang hi min pe zel a. Chutiang karah chuan Krismas pawh hian ngaihhlut a hlawh lo deuh deuh anga sawi a ni ṭhin. Nia, he hunpui aia zalen, hei aia hman nawm theih thil hi a lo chhuak fo mai thei e. Mahse, khawvel chhandamna tura Pathianin a fapa a rawn tirhna hi chu khawvel pumpui tan a nih miau avang hian Krismas hi chu a chuai tak tak dawn lo. Kan lawm dan leh kan hlimpui chin chu danglam ṭhin mah se, khawvel chhandamna tura thilpek a dawnna hi khawvel hian a hre reng ang a, a lawm zel dawn a ni. Hei hi Krismas ropuina tak pawh a ni awm e. Mizote rilruah ngat phei chuan Krismas hian thûk takin awmzia a neih avang hian nuam ti leh hlim taka hmang turin Krismas kan ngaihlut a, kan ngaih pawimawh a, Pathian duh dan taka kan hman zel pawh a ṭul hle âwm e.

- Dr C Lalengkima