Kan thlir liam leh ṭhin

Kum 2019 chho vel khan Mizo hmeichhia midum kawp hoten Mizo tlangval neih tlak in awm lo, in bialnute pawisa eisak chiah in thiam a, ruihhlo in duh si, tiin social media-ah an rawn post chuai chuai a. Midum hote chuan min care thiam a, Mizo mipa nen chuan inthlau tak in ni te an rawn ti a nih kha.

Ni e, an sawi hi a dikna chen a awm a ni. Mahse, hnam dang kawp ṭhinte hian in vul lai chhung, in par mawina a lo chuai ang a, eng atân mah an ti tawh lo vang che u. Tarkun thlengin an kawp dawn lo che u a ni a. Natnah ṭha lo HIV/AIDS positive neiin, in nunna hial in chân hunah zawng, in ngaihnêp tak Mizo tlangvalte hian in ruang kan lo hmuak ang a, in thlân kan la rawn lai dawn asin. In chhungte khawhar kan lo ṭhutpui dawn a, nangmahni vanga Mizo nula buanchaklo anga hminghliau nula fel tak takte hian in ruang chungah pangpar an la rawn dah ang a, mittui nen in ruang an la rawn thlah liam ang.

Aw le, kan ṭhalai, a bikin mipate hian kan hnam ral mek hi kan ngaihtuah pha zo lo va, vuak luhai ni lo, luhai theihna zawng zawng kan duh a ni ta ber mai!

Kristian ramah ngawlveite enkawlna hmun kan luah khat reng a, kan kawtthler tin maiah rûk hmang an ther fur a. Kristian chhungkaw campaign kan ti a, rûk hmang kawl reng siin rûkru kan ûm a. Kriatian chhungkua ni si lo khan Kristian chhungkaw pawimawh zia hahîpin kan au chhuahpui a. Pastor leh upa ten biak in aṭang bakin kan ram ṭhalaite sualna hi an vei tak tak lo va, an thlir a, an en liam a. Kan ram sualna hi an kut an kuangkuahsan a, a hreawm leh kawng bumboh min kawhhmuh a, mahni in lumah Bible min chhiarsan leh si a nih hi.

Sawrkhar hmasate pawh khan hna ṭha thawh an duh a, an tum lo a ni bik lo. Party worker-te zawk hian sum kuangbâng zût lovin, sum kuangbâng zawkin hna an thawk a, hna ṭha leh tlo a awm thei lo. Mahse, hei pawh hi kan hmu a, kan hria a, kan thlir liam leh ṭhin. Miin dik lo deuha thil a tihin social media-ah kan sêl luai luai a, siamṭhatu nih erawh a taka chet chhuahpuitu tur mi fel leh mi ṭha pên chhuak an awm si lo.

Kan ram, kan hnam chhan tur hian tlangval ṭhalaite Lalpa tawtawrâwt chuan min ko ta. Chu tâwtawrâwt kohna ri chuan Mizo tlangvalte min kaitho zo lo va; ruihhlo tâwnah kan zâm ral mek a, kan nulate’n pasal tûr an vân ta!

Kohhran tin biak in aṭangin ruihhlo ngaite tan kan ṭawngṭai mur mur a, a sâwt lem hlei lo va. Ngawlveite hian sim duhna leh tumna an neih chuan si loh chuan, Pathianin a ngheitir ngawt dawn lo. A chhia leh a ṭha, duhthlanna zalen min pe a, chu chu keimahni thlan tur a ni. Ṭawngṭai leh ngawt ṭhin hian korî a tu zo tawh lo.

Ruihhloin a salbeh mekte u, tuna in nun danah hian in lawm em? In lungawi meuh maw? Kan nun hluite hi kan la thlir let ang a, hlim hmelah mittui a luang leh ṭhin dawn asin. Ruihhlo lakah kan tawlhthlu a nih pawhin, kan tho leh thei a ni. Bazar hmun lûn laiah kan tlu palh a, rang takin kan tho leh ṭhin a; ngati nge thawh leh mai kan tum loh le? Tho la, ding ta che.

Pathian ta ka ni a, Pathian min siam chhan tihlawhtling tur ka ni, tiin infuih ila. Thil awlsam tak chu a ni hauh lo vang le. Kan tana ṭha lo tur kawng pawh kan zawh ngam a, kan ṭhatna tur leh kan chhungkua leh khawtlanga mi rin hlawh zo tawh lova min siamtu laka zalenna kawng zawh tur chuan, thih thâ tak meuha kan ṭan ve pawh a ngai a lawm.

Kan hnam ral mekah hian mawhphurhna kan nei a ni tih hre thar chung zelin, min tihreawmtu leh rûk min rûktirtu ruihhlo lakah hian Zo fate i harh mawlh ang u.

- Zothansanga, Chhiahtlang Kawnveng, Ph.no 9612333536