Designation Plate paih rawh u!

Aizawl Post chan­chinbu-a Mizoram Chief Secretary hlui Pu M Lalmanzuala article ka chhiar khan tun hnaia designation plate inhnialna awm hi a rawn sawifiahin tunlai ṭawngkam takin a rawn 'paihthla fai ṭhak' ni berin ka hria.

Tuna Chief Sec­retary-in designation plate a duh lova, amah pawhin a tar lo a, Chief Secretary hluiin a lo pian chhuah dan a sawi tawh bawk a, Chief Secretary aia lal lo zawng hi chuan in motor-a in office-a in nihna in tar kha pawt thla sap sap teh u.

Amah Pu Man­zuala ziaka a lan danin eng dan mahin designation plate tar tur hi a ti lova, tar loh mai tur a ni. Hei hi chapona lan chhuahna a nih thu a sawi a, kei pawhin a dikin ka hria. Officer tam tak hi chuan an hmaa mite ziah vangin an ziak ve mai mai a nih ka ring a, an motor-a an office-a nihna inbel hi a ṭulna leh ṭangkaina a awm lova, mahni office pawn lama office-a nihna tar kulh duh khawpa mi intivei an ni tih an inhriat loh vang a ni ngei ang. Mahse hei, tunah chuan an inhre ta bawka pawtthla rawh se.

Chief Secretary ber pawhin a tar lohlaia Joint Sec­retary, Deputy Sec­retary tih velin an lo tar ve vel hi chu zahthlak deuh asin. BDO, SDO, EE, SDEO leh eng officer tenau ho phei hi chuan a ranga ranga an motor-a an designation plate hi pawtthla se a ṭha ang, danin 'tar tur' a tih pawh ni hlei lo mahni thua lo tar ve kuau mai hi zahthlak a nia.

Pu Manzuala ziah dan phei chuan tuna VIP Light kan tih ang pawh hi a lo chhuahna chu DC-te'n chhiah an khawn ṭhin lai thil daih a lo ni a, amah ngei pawhin VIP light paih hi a lo rawt tawh a ni awm e. VIP light vuah loh hlau officer leh politician tam tak an awm thute pawh ka la hre lehzel bawk a, lansarh leh lal hi kan lo thlahlel hlawm chu a nih hi.

Tunah chuan designation plate tar hi a zahthlak tih Chief Secretary hluiin a sawi a, Chief Secretary ṭanglai pawhin a tar duh lo bawka chuvangin Chief Secretary aia lal lo zawng sorkar officer chuan in motor-a office-a in nihna ṭul lem loa in tar kha pawt thla tawh rawh u le.