Zu chungchang hi

Kan sorkar hian Mizoramah zu zawrhna tura hma a lak aṭang tawh khan mi tam tak leh Kohhran ṭhenkhatten an buaipui em em a, buaipui loh tur kan buaipui em aw ka ti.

Kan buaipui ber tura keiin ka lo ngaih ve chu khawvel chhandamtu thu mi chah hi a ni a, kei pawh zu in loin ka awm thei tho a, eng ang pawhin tam mah sela ka nun a tibuai lem lo. Rruihtheih thila inhmang leh nulat tlangval kawnga inhmang leh inkhawm ngai lote hi tu mawh nge ni ang? Kan Pastor te ṭheuh hian Thlarau bote hi an ngai pawimawh tawk lo em ni aw! An bialte tlawh a, heng mite inah hian chawlhkar khatah vawi khat tal an ṭawngṭai sak em?

An bial fanna hun pawh an nei tawh meuh lo a, an damlohte hian kan ṭhin se, in ṭha deuh leh ṭhutna nuam, nula hmelṭha deuh awmnaah lo chuan an kal hman meuh tawh lo em ni zawk? Krista Chanchin Ṭha kan buaipui dan hi in enfiah a ṭul hle lo maw? Sawi mai loin a taka thawh hi a ṭul tawh takzet a ni. Thu sawi la, kan tan a tawk e, tih hun kha a ngaihawm khawp mai.

I mawhphurhna i hlen chhuak lo a ni maithei, kan upate kan rawngbawltute hian an bial chhung hi thla khatah vawi engzat nge an tlawh? Pulpit a rawngbawla thu ṭha deuh deuh sawi hian awmzia a nei a, mah se in lama kal a, ṭawngṭaina leh nundan ṭha hrilh hian awmzia a nei viau zawk lo maw? Pathian thu hi a ṭha a, thil a tih theih dan hi an kiangah sawi la, Biakina kal ngai lote hnena Pathian thu hrilh hi a sawt viau bawkin ka ring.

Kohhran member 800 ni ta ila, mi 400 hi kan inkhawm ngai meuh lo maithei. Chutiang chu lo ni ta se, an in lamah kal kha a hlawk zawk mah lo'ang maw? Ram tinah kala Chanchin Ṭha hril tura tih kan ni a, kan thinlungah hian Lal Isua Krista hi lal ber se. Zu chu eng anga tam pawh lo zuar se kan thinlungah Lal Isua a lal ber chuan zu leh ruihtheih thil hian min tibuai miah lo ang tih a chiang.

Chuvangin, kohhran rawngbawlna lama mawhphurhna neitute hian pulpit a kan rawngbawlnaah hian duhtawk mai lo ila in lamah kalin hma thar lak dan ṭha leh hlawk zawk i ngaihtuah ang u.