Halpuah ka hâl ve dawn lo

Kan sawi ṭhin, kan sawi leh dawn. Kumin Krismas vuakvetah halpuah leh a kaihhnawih khap a ni a, Central YMA leh sorkar mi rawih police-te'n chu khapna thupek chu an kengkawh a, zawm pawh a hlawh dawn viauin a lang. Sum sên thlawnna mai mai, hriselna atana hlauhawm lutuk heng puak thei thil khap a ni hi a lawmawm a; kei pawhin ka zâwm dawn a, ka hâl ve dawn miah lo.

Kum tin deuhthaw halpuah leh a kaihhnawih hâl hi khap a ni a, lak luh aṭang rênga khapin police-te'n an veh reng a, an man nual tawh nghe nghe. Mizote hian khap a nih hian eng vanga tih luih kan châk tlat ṭhin ni le? Khap ni lo mah se, mi hrisel lote'n an tuar nasa a, a hnu lawkah thihpui pawh an awm nawk ta ve ang. Ar takngial pawhin an ngeih loh heng zên rimchhia hi mihring tan chuan ngeih har tak tur a ni.

Chuvangin, khap a nih vang pawh ni loin, taksa lama mi bawrhsâwm zawkte ngaihtuah chunga hâl loh mai hi kan tih tur a ni dawn lawm ni? Tun hma deuh aṭang khan mi ṭhenkhat, thâwk lama harsatna neite chu Kulikawnah an chhungte bêlin an veng an kalsan hial ṭhin a, tunah pawh a la nih a rinawm. Hetiang kawngah hian Kulikawn mipui an an fakawm ngawt mai. Sorkarin a khap hma aṭangin, ṭhangkhat lian zet an hâl tawh lo a, veng fakawm tak chu an va ni tehluh em! Veng dang hian i entawn teh ang u.

Halpuah leh a kaihhnawih hi vaihlo intihhlimna mai mai a ni a, kan Kristianna leh kan Krismas nen inkaihhnawihna a nei hauh lo. Heti chunga mi tam takin, "Kumin chu hâl lo hram se aw, kan hriselna a pan ropui tawh si a, a manganthlak em mai," an tih lawm lawm pawisa miah loa hâl khum chu a ngilneih lohthlak em mai. Lung lam ṭha lo leh chuap lama harsatna nei, thâwk harsate tan a hlauhawm.

Kohhran lam hi duh aiin a ngawi thei mah mah. Khaw nge Mizoram Kohhran Hruaitu Committee (MKHC) leh hman ni lawka an din Council of Churches in Mizoram kha le? Biak inah pawh hian zirtirna leh thu ṭha sawina a awm a, a hun bawk viau mai. Mahse, khawi kohhran leh Synod emaw, Baptist kohhran emaw pawn hetiang khapna zawm tur hian thu an chhuah awm reng reng ka hre lo a, kohhran inkhawmah pawh an puan awm ka hre bawk hek lo.

Sorkar sum (revenue) lak luh vena tur zu zawrhah tai pâwng pâwngin Synod leh Baptist hruaitute an au a, sorkar chungah kohhran a awm ta em maw ni tih mai turin a control tlat a. Tun sorkarah leh a hma MNF sorkarah pawh sum harsatna tam tak kan tâwk mek a, oil aṭangte'n chhiah lâk a pun phah a. Chuti chung chuan kohhran hian 'aw' a chhuah duh der si lo. Inthlan dawnah thuchhuah an nei leh ngei ang a, a bikin zu zawrh loh lam a campaign leh ngei ang. Thliarkar rilru pu kohhran kan ni ber e. Kohhran kan sawisel thui dawn tlat, tâwk teh se.

Kan thupui halpuah leh a kaihhnawih hâl lui ṭâlh awm lo ila, Mizorm Kristian ṭha inti awm khawmnaah hian. Kei chuan a rim pawh hnim/hîp ka tum lo a, min hâl khum a nih vaih erawh chuan ka thinrim ve mahna!

- Lal Rinmawia