Remna Lal a piang ta

Kan tân Naupang a lo piang a, Fapa pêkin kan awm ta a; rorêlna chu a kokiah a chuang ang a: a hmingah chuan Maka, Remruattua, Pathian Chaka, Chatuan Pa, Remna Lal, an ti dâwn si a. (Isaia 9:6)

Lal Isua kan tana he khawvela a lo pianna hun Krismas chu kan lo chuangkai leh ta reng mai. Krismas kan hman chen a inang lo va, kan hman dan lah a inang na hek lo. A ṭhenin nawmchen nan an hman laiin, a ṭhenin Pathian Thlarauva khah nan leh Pathian nena an intawh ní-ah an lo hmang bawk a. A ṭhenin lusûn nan an hmang a, ṭhenkhatin lawmna ni atan an hmang bawk.

Tun huna kan thupui leh kan sawi tur ber chu, ‘Remna Lal a piang ta’ tih hi a ni. Thlasik a lo thleng a, boruak han vawt deuh var mai te, boruak thiang kâk maite hian a ti-Krismas bik riau hian a hriat a. A ni tak a, dik leh dik loh lam ka sawi dawn lo va, engtia lo zi chhuak nge a nih lam pawh hi sawi ngai ka ti lem lo. A pawimawh ber chu, he Krismas lo thleng hian kan nunah Isua’n lalna a chang em tih te, remna lal a nih angin m idangte nena inremna hun atan kan kalpui em tihte hi a ni. Kan lo ngei em em ṭhin te, inbe hleithei lo leh lo inhmelmâk tawh te, chhungkua inrem thei tawh lote inremna hun atan hman a van pawimawh em!

PATHIAN LEH MIHRING INKARA INREMNA

Pathian leh mihring inkara inrem lohna chu Lal Isua lo pianna hian a rawn thlakthleng ta a. Mihringina Pathian pawi a khawihna hi a thûkin ngaihdam theih loh hiala ngaih mai theih a ni. Nimahsela, Pathian hmangaihna thûk leh a khawngaihna ropui tak chuan Amah nena kan inremna tur kawng zawngin a Fapa duh tak mai chu he khawvela mihring bawhchhiatnaa khatte chu inrem lehna kawng a rawn zawng a ni. Kum 33 chhunga Lal Isua’n a tawrhna hi mihringte ngaih chuan thil theih loh tluk nimahsela, a pa thu awihin chhel taka tuarin remna kawng a rawn hawng ta a. Pathian chu a fapa thuawihna leh a tuarnaah lungawiin, fapa Isua neitu leh ringtu apiangte tana vanram luhna kawng hawnsakin, a fapa ringtu apiangte chu ngaihdamin kan awm ta a ni. Hremhmun rapthlak turzia ngaihtuah hian Pathian hnathawh ropuizia leh Isuan chatuana nun kan neih theihna tura a tawrhna rapthlakzia hi ngaihzam mai chi a ni lo.

REMNA SIAMTU KRISMAS

Krismas avanga khawvela thil thleng chhinchhiah tlak hi sawi tur tam tak a awm àwm e. Khawvel Indopui pakhatna (World War-I 1914) lai khan France ramah British sipai leh German sipaite chu an inkap nasa mai a, an ram chhan nana lu chhum bân chhum huam tak meuhin an inep a ni. Hemi kum vek Krismas lai pawh hian an indo chu a la tawp mai loh avangin an inbei chhunzawm zel a, Krismas nî tak chuan mak tak maiin sipai ralhrât leh rothap pui pui maite chu Krismas zungzâm chuan a zem tuiral ta tlat mai a. Ranthlenga nausen tlawm tak chuan chu’ng sipai rilru sak pui pui, thisen chhuak châka sahâl mekte chu a chhun tui ta zawih zawih mai. Sipai pakhat chu a insûm zo lo va, an riahbûk aṭang chuan Krismas hla a rawn sa chhuak ta phawng mai a, chu sipai khawhar hla sak chuan an ral lawka an hmelmate thinlung a dek ta tlat. An hmelma zing aṭang chuan an rawn zawm ve ta mai a! Chu darkarah ngei chuan nunna inlaksak tuma inepte chu remna palai Lal Isua chuan suih zawmin, kut thingin an inchibai a, remna Lal Isua avangin hmelma an lo inrem ta.

Hemi hnuah pawh hian Germany's 133rd Royal Saxon Regiment leh Britain's Seaforth Highlanders te chuan Krismas ní-in football hmanga inelna hlimawm tak an nei zui a, Germany lam hian 3-2 in an hnen nghe nghe a ni. Hmelmate chu inremna hruihruala suih zawmin an lo awm ta. Heng zawng zawng thlentirtu chu Krismas a ni. Krismas nia dik leh dik loh lamah buai lo ila, he Krismas-in a tum ropuizia zawk hi i ngaihtuah ang u.

MI DANGTE NENA INREMNA

Lal Isua’n, “Khawvelah hian rem lentir tura lo kal emaw min ti suh u; rem lentir tura lo kal ka ni lo va, khandaih lentir tura lo kal ka ni zawk,” (Matthaia 1:34) a lo ti leh daih mai bawk si a. Pathian thu hi a inkalh emaw tih mai tur a ni. Mahse, Isua’n a tum ber zawk chu - mi tu pawhin min lo huain min rem lo mah se la, keini erawh chuan remna thinlung kan put a, mi dangte huatna leh tihchhiat duhna paihthla a, kan thinlung hi a thianghlim a duh a ni. Mite’n min lo haw viau pawh ni se, kan huat ve duh tlat loh chuan hnehin an awm nge nge ṭhin.

Hmanlai aṭang tawhin ram leh ram indona kan hre tam hle. Tunah pawh hian ram hrang hrang indona, Ukraine leh Russia te, Israel leh Hamas te indona kan hre châmchî a. Burma ramah tualchhung buaina, Manipur-ah pawh state chhunga inrem lohna lian tak kan hre reng a ni. Ram chak zawkin ralthuam ṭha nen anmahni aia ram tê zawkte lo hneh pawh ni se, an thinlung erawh an hneh miah lo. Isua erawh chuan tlâwmna nun nena mite thinlung hneh hi a tum ber a ni. Tlâwmna nun nena mite thinlung hneh chuan hnuleh a nei lo va, mi dotute kha an rilru leh taksa nen hnehin a awm ṭhin a, chu chu Isua’n a tum ber a ni.

He Krismas lo thleng hian chhungkuaa inremna thlen se la, nupa inkarah tlâwm zawk nih hreh lova inremna thlen se; mi dangte nena kan inkarah inremna thlen se la a va ropui dawn em! Mi dangte nena kan inremna tur chuan keimahni ngei hi kan inhneh a, mi dangte huat lohna leh remna thinlung kan put tlatna hian Krismas-ina a tum chu a rawn tihlawhtling dawn a ni.

- Reuben Lalnunthara