Krismas urlâwk zan leh Krismas putar

Kan naupan lai, han ti ve khang lang ila, khang hun lai khan Krismas ni thlen hma chiah Krismas urlâwk zan a lo thlen a, min tiphûr ṭhintu leh kan en châk ṭhin leh a tûk Krismas ni zinga min tihlimtu leh min tilawm em emtu chu kan chhungte’n kan dawh thlâk tur naupang lawm chi hrang hrang min leisak, kan mutna bula kan dawh thlak dahna tur thleng kan lo dah lâwk a, kan dawh thlak tur kan en châk ṭhinziate kha min hriat chhuahtir ṭhin.

Fiamthua kan nu leh pate’n min hrilh ṭhin chu - nizana i dawh thlak kha Krismas putar pek che a nih kha tiin min hrilh ṭhin a (Mizoramah chuan Krismas putar hi a hranpain kan nei lo niin a lang). Tunlai hunah erawh chuan naupang tam zawkte hi chuan Krismas urlâwk zan (dawh thlak zan tia kan sawi ṭhin)-te hi thleng vat vat se tih nachang pawh an hre hlawm tawh lo ni berin a lang.

Khawvelin Krismas putar a hriat ṭanna hi kum zabi 3-na vel aṭang niin an sawi a. Krismas putar hming nia an sawi chu Nicholas niin, Turkey ram khaw zinga pakhat Patara an tiha lo piang a, chhungkaw hausa tak aṭanga lo piang a ni a, a têt laiin a pain a thihsan a, a pa hnen aṭanga a rochun thil zawng zawngte chu mi harsate hnenah a sem fai vek a ni. He Krismas putar hi a hnu lawkah bishop-ah hlan kai a ni a, ṭanpui ngai a hriat dan leh naupang a hmangaih dante chu an hre lar hle niin an sawi. Hun rei lo te hnuah Kristiante chu tihduhdah an tawrh ṭhin avangin a bibo ve ta a, mahse, a hnu lawkah man leh a ni ta tho a ni. Lung in aṭanga a chhuah hnu ni 6.12.343 AD khan a thi a, a lawina kohhran Cathedral Church an tihah an phûm ta a ni.

He Krismas putar hi a dam laiin mi dangte tana inhmang ral ṭhin a ni a, naupangte hnenah ei leh in tur bakah, an thawmhnaw hâk tur thlengin a sem ṭhin. He Krismas putar hian amahin a pe a ni tih hriat lohna turin a rûkin a pe ṭhin a, Krismas putar pek a ni tih an lo hria a nih pawhin, Pathian pek a ni tih ring turin leh hre turin a hrilh ṭhin a ni.

Ṭum khat erawh chu Constantine an tih hian a mumangah he Krismas putar hi a hmu a, sipai lal pathum, tihhlum tura an chungthu rel tawh chu a chhuah leh phah niin an sawi. Mi tinte’n Santa Claus tih hming kan hriat lar em em hi kum zabi 17-na lai vel aṭanga hman ṭan a ni. Santa Claus hi Krismas pa tih leh kum thar pa tihte pawhin Mizote chuan a hming hi kan ko thei awm e.

He Krismas putar hriat reng nan hian Krismas-ah mi harsa leh chanhaite hnenah Krismas thilpekte hlan ṭhin a ni a, Krismas putar lem kan neih ṭhinte hi mahni in chhungah târ liam mai lovin, he Krismas putar hmalakna hlu tak hi hre reng chungin mi harsate tan leh chanhaite tan malsawmna thlentu i ni zel ang u.

- George L Ralte