THE GREEN INTERNET
Hmasawnna tura kutthlâkna chi hrang hrang avangin ram leilung pianken hausakna (natural resources) a kiam zel a, chutih rualin khawvel bawlhhlawhna (pollution) pawh a nasa tial tial. Chuvangin ram leilung pianken hausakna renchem leh hlawk zawka hman kawngah te, hmasawnna vanga pollution lo awm ṭhinin sik leh sa a tidanglam lutuk tur venna kawnga hmanrua duan chhuah te leh hmalak dan tura ruahmanna mumal siamchhuah te chu mihring tan chona lian a ni chho zel a. Kawng hrang hranga hmasawnna tlo (sustainable development) a lo awm theihna tura hmalakna chu awm mah se internet lama hmalakna chauh i han thlurbing dawn teh ang.
Internet vanga environment-a nghawng awm thei zirchianna hi kum 2014 khan Greenpeace International chuan neiin, “Clicking Clean: How Companies Are Creating the Green Internet” tih hi thupuiah an nei a. Hei hian zirchian a tum ber chu internet ṭangkai taka hmangtu company liante hian renewable energy aṭangin nge kawlpetha an hman non-renewable energy aṭangin tih a ni ber. Amazon pawhin an web services chawmna tur kawlphetha siamna wind turbines 60 an nei mek a, hei hian cloud computing services hmangtu Fortune companies 500 zet a huam a ni. Amazon hian kawlpetha hmanga internet tihnun kawngah helama nasa taka hma lo la tawh - Apple, Google, Facebook, Salesforce, Rackspace, Microsoft leh company
ṭhenkhat hniakhnung a zui ṭan mêk a ni. Tichuan, renewable energy hmanga internet tihnun hi “Green Internet” an tih awmzia chu a ni ber. Hemi atan hian thli chakna (win energy) leh nizung chakna (solar energy) chu hman uar a ni.
Internet hian kan nitin nunah hmun pawimawh tak a chang tawh a, mah se internet hmang tur hian kawlphetha tam tham tak hman a ngaih avangin environmental cost sang tak a awm phah a, 'cloud' siamtu data centers leh telecom networks hian fossil fuels aṭanga siam kawlphetha an hmang ṭeuh ṭhin a, chuvang chuan sik leh sa tidanglam thei carbon dioxide (CO2) leh greenhouse gas dang boruakah a chhuah phah nasa ṭhin hle a ni.
Hei vang hian renewable energy aṭanga kawlphetha neih kawngah internet hmangtu company liante chuan ṭan an la a. Google phei chu kum 2007 aṭang tawh khan sik leh sa tidanglam thei boruak (greenhouse gas) tichhuak lo - carbon neutral company nihna pêk a lo ni tawh a ni. Green Internet lama hmalakna hi conservation of resources nena kalkawp tlat a niin data centers an servers chhia reng reng pawh thlawn darhin thir, plastic, copper, etc. te chu hman nawn (recycle) tura tih leh vek zel an ni ṭhin. Khawvel changkan zel ruala hun hmang ve mêk keini pawh hian hmasawnna tlo nei thei turin sustainable development goals (SDGs) kan tuipui a hun ve tawh khawp mai.