Kawng sir zahawmna tihbawrhbân

Tun hnai khan Excise & Narcotics force-te chuan Aizawl khawpui chhung kawngpui sira ruihhlo (drugs) lo ti ngâwng ngâwng leh zu lo in tuau tuaute an vai a, mi eng emaw zat an man a, case nei thei khawpa nung pawlawh pawh an awm nual a ni.

Kawngpui sirah mi pangngai kal lai ngeia ṭhukhawm lêt lêta zu in a, titi ta lâwng lâwng hmuh tur an awm ta fo. Excise force-te chuan thapui an han thawh a, kawng kam ṭawphnawk a ziaawm phah viau.

Mizote hi kan pi leh pu hunah chuan zu in thiam nia sawi kan ni ṭhin. Khang hun lai khan zu rui nih chu thil zahthlak takah an ngai a, tu mah rui chhia an awm ngai lo. Ṭhalaite ngat phei chu, ruih chu sawi loh, nu leh pa emaw, val ute hmuhah an rui ngam lo mai a ni lo a, an in ngam ngai lo. Tunah chuan a rui rui hi an chapo tawh mai ni hian a lang.

Kan Kristianna hian zu min huattir a, sap missionary-te'n zu chu sualah an puang hmiah mai a, khap a ni chho a, zu in mi chu Kristianah an chhiar duh lo. Chumi kal zelah chuan a nghawng a ṭha lo a nih hmel a, tun thlengin zu chu sualah kan ngai a, chuti chung chuan a in an tam em em reng bawk si. Sap missionary khan khap ta lo se, heti em em hian zu a hluhlâng lem lo mai thei a ni.

Mizoram state kan nih tirha state Chief Minister hmasa ber Pu Laldenga kha zu a ngaihdan an zawt a, sual a ni pawh a ti lo, a fak bawk lo, 'THIL' a ni a ti mai. Kha thil kha 'thil' lo ti ve zawm mai mai ila tun ang em em hian kan hlut lo ang a, sualah pawh kan ngai kher awm lo e.

Pu Lal Thanhawla sorkar khan zu an zuar a, kan hmang thiam ṭan dawn chauh tihah kohhran lam an rawn au ta a, sorkar loh hlauin MNF khan zu an zawrh zawm loh tur thu a puang a, a sorkar phah ta kha a ni a. Khang zu zawrhte kha han chhunzawm se chu 'thil' kan ti ve mai dawn a, heti em em hian zu in ṭhinte pawhin an la hluhlâng lo tur hi a ni a. Politics hi zawng a buaithlak a ni.

Zu khap a nih miau chuan state pawn aṭanga Mizoram boruak nuam rawn hîp a, tlang ram rawn fang duhte pawh an ṭit phah lo thei lo. Sikkim state hi han ngaihtuah ila; keini aia ram rem lo leh biboh lutuk, China leh India inrina Nathu La panna kawng phei chu thlep tam lutukin a kawng a inthlep a, a nawmna em em a awm bik lo. Mahse, khualzinte'n an thlakhlelh pakhat 'zu' zalen taka an zawrh vang mai a ni.

Hman ni khan Gangtok-ah kalin Nathu La kan va thleng ve ngial a. Zan li kan châm chhungin kawng sirah zu in emaw, zu rui emaw ka hmu miah lo. Drugs addict inhâwr khawm tuau tuau pawh ka hmu hek lo. A felfai em em mai a, zalen taka zu an zawrh avanga khawlaia rui kal pai ṭuang ṭuang hmuh tur an awm ve lo. Kan Aizawl khawpui ve zawng 'khap' hlir a nih vang hian ṭhalaite an chêp em a ni.

- Melissa Pa