Kawngpuiah Office-a kan nihna tarlan
Motor-a Designation Plate tar leh tar loha inhnialna awm ṭhin hi ka thênga thâwngah a thawk vak lova, a duhin tar se a hnawk ka ti lova, tar ve lovin lo sawisel hi a ṭul ka tih loh zawng a ni.
Tuna ka ngaihdan thar ni ta erawh chu hman nia kan chhiar "Designation Plate hi mahni office-a nihna kawngpuia tar ang a ni," tih kha a ni ta a. Motor-a Designation Plate tar hi a ṭul lo tih hi ka thutlukna thar a ni ta.
Keia sawi tum ve ber zawk chu midang ngaihtuah dan lo zawng a nih ka ring a, Designation Plate kan tar hian eng nge sawtna a neih? tih hi a ni ta a ni. Office-ah hi chuan mahni room bangah ṭheuh hian Designation Plate hi an tar ngei turah kei chuan ka ngai a, mi office-a va kal hian an awmna hriat mai loh chuan kan hawi buai rei thei hle a ni.
Hei bakah hian thingtlang aṭanga office dawr tur tan phei chuan office-a luh hi thil zahthlak a tling a, hmelhriat loh hlir an lo ṭhu khup a, a zamawm duh hle ang a, kan kalna tur room ber hriat loh phei chu a luhaithlak a ni. Designation Plate an lo tar chuan kan kal duhna awlsam takin kan pan thei a, office-a mahni room luh dawna Designation Plate tar hi chu a inhmeh bakah a ṭul a, compulsory ni se a ṭhain ka hria.
Motor-a tar hi chu a chunga ka sawi tawh ang khian, "Hei, kei hi ka office-ah Joint Director ka ni a, nangni kawng kama lo awmte khan lo hre ve rawh u," an tihna ang a ni ta. "Kei hi SDEO ka ni ve a, kei pawh DAO lai ka ni ve tawh a, kei phei chu Director ka lo ni luah tawh a, Joint Secretary ka nih tawh hi," an tihna angah ngai ta ila, a sual loin ka hria.
Aizawl kawngpuia, "Chumi khaw BDO" tih an han tarte phei chu a va han inhmeh lo em! Aizawl BDO tih thu awm si lo, mahni thawhna khaw BDO Aizawl khawpui thlenga tar hi ṭul lo ka tih zawng tak a ni ta a ni. A tirah chuan an duh leh tar mai mai se a hnawksak lo ka ti a; amaherawhchu an khel an khel takah chuan Designation Plate hi motor-a tar chi ni lovin office-a tar chi a nih tak zawk hi ka ti ta a ni.
Chief Secretary-in Designation Plate a motor aṭangin a la thla an tih hi kan han fak vak vak mai pawh a, fak vak tur pawh a ni bik em ni, ani pawh a motor-ah Designation Plate tar se, "Hei Chief Secretary lai ka nih hi," tiin kawng kama mite a va hrilh a, awmzia a nei chuang lova, a tih tur dik tak tiin a fin vangin a Designation Plate hi a pawthla a ni mai lom ni?