Harhna leh Kelkang

Zoram dung leh vangah 'harhna' dilin kan ṭawngṭai a, a thlen dan leh a thlenna hmun thuah tu man thu kan nei lo. A petu thu a ni.

Jerusalem-a Pentecost ni-ah khan mi tlemtein harhna an chang a. Hun reilote chhungin mi 3,000 in an chan belh a, harhna chu Kelkangah mi pahnih khat hnenah a thleng ta ngei a. Kan dilna chhannaah pawh a ngaih theih ang chu. Mi sang tam takin an tlawh ta a, harhna chang mi engzat takin belh ve tawh ang maw. Israel ten Massia an nghak a, a lokal ta cheng a, an hai a. Keini pawh hian kan dil a, min pe ta a, kan ngaisang leh lawi si lo a ang hle.

Mission Veng saw Chanchin Ṭha fukthleng hmasa a ni a, Nazareth khua Lal Isua seilenna angah te pawh han chan ta ila. Tuna Kelkang hi chu Thlarau Thianghlim thlenna hmun Jerusalem kha ni mai awm a ni a. A nih leh Thlarau Thianghlim 'kut' hmang tura mi nuai tel an kal lai hian nang khawnge i awm ve le?

Kan Synod Speaker rualte pawh hian an duh ber chu harhna leh Thlarau Thianghlim ni ngei tur a ni a. Kan Speaker-te pawh hi Lal Isua kawng siala Johana a kal ang leh Paula'n Baptist turin min tir lo a, Chanchin Ṭha hril turin min tir zawk a tih ang dinhmuna ding kha an ni a. Kawrchung leh suit nalh tak tak nena siak nei kal ngat ngat chi a ni lo.

Johana phei chuan "Ka hnunga lokal tur chuan Mei leh Thlarau Thianghlimin a baptist ang che u a, kei erawh zawng a pheikhawk hrui phelh tlak pawh ka ni lo" a ti thlawt mai a nih kha. Lal Isua rawngbawl ṭan tirh pawh khan Johana hian a nghakhlel hle ni tur a ni. A hote tirin, "Lokal tura chu i ni nge, midang kan la nghak dawn?" tiin mi a tir hial a. Kan speakers leh rawngbawltu Upa, Pastor-te hlei hlei hi Thlarau Thianghlim baptistma nghakhlel tura ngaih an ni a, a pheikhawk hrui phelhtlak tunge awm ang. Johana hi a va tlawm ve le!

Pentecost ni a lo thlen dawn khan Thlarau Thianghlim hi Judai ram zawng zawng, Samari ram zawng zawng leh Galili ram zawng zawngah a thleng lo a, a pianna khua Bethlehem-ah a seilenna Nazaret-ah pawh a thleng hek lo. A thlenna hun leh hmun hi keini lo relsak chi a ni lo; tunge le Lalpa chu thurawn pe tawh ngai?

An aw chu benga hriat theih a ni lo a, chhun hian chhun hnenah thu a sawi chhawng zel a, aw hriat tur a awm lo. Pentecost ni khan Thlarau Thianghlim chu a ṭe chel chul lo, mei, lei anga lang khan mitin a dek mai a, a lo changtu mihring lam kha erawh chu zurui emaw tih khawpin an ṭe teng tung mai a ni zawk. Thlarau dawng ve loin an hrethiam lo, an uipui tuilian thlir ngawt mai a ni. Nang i uipui tuilian thlir dawn nge Thlarau Thianghlim chengtu belhchhah nan i tel dawn?

Kelkangah pawh hian a hring a hranin Lal Isua hmel i hmu lo ang a, Thlarau Thianghlim pawh a au luah luah lo ang. Kelkangah chuan Thingsia, Fah leh Ṭhil thing karah Kross i han hmu ang a, a Kross lah chu nalh danglam bika chei a ni hek lo. Mahse, chuti chung chuan Thlarau Thianghlim dawngtu mihring lam chu an khat liam si.

Lal Isua mipui tam takin an zui a, chung zinga hmeichhia kum 12 thiput chuan a puan hmawr a dek a, a dam si. He nu hi a lo tel ve tih pawh Isua hian a hre lo. Mahse a hnen aṭangin thiltihtheihna a chhuak si; chuta ṭang chuan he nu hi a hre ta chauh a ni. Isua zuitu zawng zawng hi chhandam an ni lo a, tihdam an ni hek lo. A thiltihtheihna leh a thiltih pawm, A malsawmna duh Isua duh tel lo a awm theih.

Isuan a thlarau Kross lera a thlah lai khan mipui tam tak, puithiam lal leh sipai an awm. Chung zinga sipai za hotu chuan Isua chu Pathian fapa a nihzia a hre tlat. Midangin an hre ve si lo. Kelkangah i kal a, Thlarau Thianghlimin hna a thawk a, chu chu i dawng ve lo a nih chuan Thlarau Thianghlim leh Pathian dem mai loin nangmah in en let ang che.

Lalpa vantlang zingah i aw hre theiah min pui la tih hi kan ṭawngṭaina ni fo rawh se - Amen.