Mobile & Internet service chhia

Tunlai hian mobile phone aṭanga inbiak tlang a harsa em em mai a, inbiak laklawh laiin, sawi tur reng reng pawh kan sawi zawh hmain a tawp a, mi call tlang a har em em bawk. Chutiang deuh bawk chuan internet hi, 3G emaw, 2G emaw, broadband pangngai emaw pawh a chak tawk lo hle a, duh ang hi a en hleih theih loh fo mai. Broadband bik hi chu tlemin a ziaawm deuh.

Hetiang taka ser­vice chhe mai hi chu emergency thilah ngat phei chuan a pawi thei hle a, a hahthlak a, tun­lai khawvela kan nun tam tak heng thila a innghah tawh hnuah hi chuan nunphung nasa takin a tikhaihlak a ni.

Mizorama hetianga service hrang hrang a chhiat em em lai hian phai ram nena kan chawi zat a inang reng tho mai a, service a chhiat avang hian kan chawi tlem phah hauh bawk si lo. A bikin Airtel hi a chhe zual emaw tih mai tur a ni. Mi ṭhenkhat chuan net pack-te an thun a, service a chhiat avangin an hman tur ang pawh hmang zo loin, a liampui a, sum engzat tak chawi thlawn ang i maw ka ti.

State dang nena sum chawi zat inang renga hetiang taka mobile phone service provider-ten mipui mamawh ang an phu­hru zo lo hi chu Mizote zah lohna emaw, an thawh ṭhat peih loh vang emaw a nih a rinawm a, hnam ang pawh hmalak hi a ngai a ni mai lo maw? Kan mamawh vak loh thil tam tak kan buaipui a, ṭul loah hun kan seng a, kan mamawh leh a tel loa awm theih loh ang hial hi kan ngaih­thah deuh ṭhinin a lang.

Innghahna tur dang kan nei tawh lo, kan hmang a, a loin kan awm thei tawh lo a ni ber. Chumi chu an hria ni awm taka mipuitena kan mamawh ang tak tak pawh phuhru tum lo ang tak service provider-ten mipui min ching vel hi chu ngaimawh tham niin ka hria. Service a chhiatin, technical thil emaw, eng emaw vang a nih leh nih loh mipui hriattir awm hauh si lo hi chu Mizote min zah lohna leh hmuhsitna a ni thei mai lo maw.

Hmun danga an chawi leh sên ang zat tho kan sên laia a hmantlak mumal lo ṭhin hi chu a lawmawm lem loh ṭhin. Hmun dang angin Mizote hi kan phunchiar lem lo a, kan rilru a ngil viau. Chu chu remchangah hmangin tih ṭhat peih lohah an tlak pawh a ni thei, chutiang a nih chuan a thinrim thlak viau a ni. Kan rilru ṭhatna remchanga hmanga min kal pah mai mai hi a dik lo.

Mizotena sum tam tak kan hmanna leh kan insennaah hian hmun danga kan sen zat tho seng angte neih ang neih hi kan chanvo a ni a, kan chanvo ang pawh hi heng service provi­der-ho hian min chhuhsak an tum em ni tih mai a awl. Tlawm­ngai pawl leh ram hruai­tute inrawlhna tur pawh niin alang. Hma lakna atan a va ṭha em.