Aizawl Civil Hospital leh mipuite
Mihring kan pianchhuah leh kan hun tawp lam hi damdawiinah kan hmang tlangpui a. Chumi inkarah pawh damlohna avangin Hospital hi vawi tam tak kan pan ṭhin. Kei pawh ni April 17, 2015 zan khan ka in tisual palh a, emergency-in zalaiah Civil Hospital-ah min admit a. CT Scan, X-Ray titute in kokhawmin rang takin a zan zanah a ṭul ang zawng zawng an ti a. Male Surgical-ah min admit a, nurse leh doctor-te an thiamin an fel a, emergency case-ah chuan an ṭuan a rang hle.
Kan nurse te leh doctor-te pawh zinga ward an fan bakah zan lamah pawh hmuh tur an awm zel hian min ti thlamuang a, a dik chiah chuan lei lama kan Pathian hmuh theih an ni ringawt mai.
Hospital-a thawktute hi fel hle mah se a dawrtu mipuite hian tih tur kan nei tih i hria ang a, faina lamah kan pui ve thei a ni. Hospital compound phiah fai lam a ni lo a, kuhva eina kawr leh thil eina kawr te paih mai mai lo ila faina kawngah nasa takin kan pui tihna a ni ang. "Fai hi Pathian anna a ni" kan tih chuan kan zawm mai a ṭha ang a, sweeper te tihah khek mai loin nang leh kei hian kan ti ve thei a ni.
Hospital-a in admit kan nih pawhin kan mutna bulah thil eina kawr dah mai mai lo ila, felfai taka chet a ṭha. Bathroom leh Toilet a kan kal pawhin fai ṭha takin chhuahsan zel ila, ke hniak lang keukuaua toilet chhuahsan te hi a mawi lo. Tui pawh a tam avang ringawta ṭul mang loa hman huau huau tur a ni lo, mahni in anga chet hi a finthlak ber. Visiting house-ah damlo kan tlawh a nih pawhin ring tak taka ṭawng loh tur a ni.
Civil Hospital hi Mizoram mipui zawng zawngin kan inṭawm a ni a, India ram civil hospital-ah chuan a ṭha ber pawl a ni hial bawk awm e. Chuvangin heng a hnuaia ka han tarlan te hi tih hlawhtlin theih ni se -
1. Emergency-ah Casualty kan pan a, X-Ray leh CT Scan te tih a ngaih hian inzawnna a thui lutuk a, damlo tan chauhna tham a ni. X-Ray leh CT Scan tihna hi Casualty bul hnaiah awm thei se.
2. A bul hnaiah doctor, nuse leh thawktu dang quarters hi sak ni se. Zana emergency-ah pawh in koh zung zung theih turin.
3. Nurse duty an indaih lo hle a, a bikin zan lamah ward pakhatah nurse pakhat an duty a. Injector a ruala tih a ngaih laiin a ṭhen hmanhmawh taka enkawl ngai an lo awm bawk si; staff nurse an indaih lo a nih pawhin nurse training lai a bikin final year zirlaite hi nigh duty a inchhawkin neih tir ve ni se - experience atan pawh a ṭha ang.
4. Hospital-a boral thingtlang lam mi Aizawla chhungte nei lo tana innghah lailawkna tur hall ang reng awm se; YMA ṭhutthleng tlem dah ni bawk se.
5. Hospital bulah motor park-na tur leh a enkawltu tur fel taka siam ni se.
6. Damlo pawh kan tam zel a, private ward tam deuh zawk siam ni se, a awm man te siamin Hospital inrelbawl nan hman ni se.
7. Damlo investigation tihna hi a hnuai lamah a ni a, inzawn chhoh nan step a te si a, electrict-a in khaichhohna lift hi siam ni se. Thawktute tan pawh a ṭangkai ang.
8. Damlo inzawn/ in pawm ut ut ngai loin Wheel-chair-a innawrna 'ramp' hi siam ve ni bawk se, a lawmawm hle ang.