Changkanna phêna chhiatna

Khawvêl changkànnain Zo fate rilru sûkthlêk pawh kawng hrang hrangin a her danglam nasa hle a. Hei hian a ṭha záwnga hmasâwnna kawng hrang hrang min thlen rualin, a ṭha lo záwnga mi tam zâwk rilru ngaihtuahna a her danglam avangin kan fimkhur a ṭûl hle.

Ni tin kan nuna a tel lova kan awm theih reng thilte hian kan sum tam tak a ei ral a. Hêng–incheina uchuak lutuk, dinhmun phû lova incheina hmanraw chi hrang hrang te, ruih theih thil chi hrang hrang te, zûk leh hmuam chi hrang hrang te, lirthei man to leh changkâng tak tak, zu leh sa hmun panna atana lei mai maite bâkah thil dang tam tak pawh a awm. Hêngte hian ṭûl lovah sum tam tak a ei ral a, a tel lo pawhin kan nung theih reng tho a, a tel lo hian kan màwi loh phah chuang hauh si lo.

Hêng, a tel lo pawha kan awm theih rengte kan ngaihnat luatah kan rilru kan tihah phah a, nasa zâwka hna kan thawh a lo ngai a, thawh chhuah tam har si, ṭûl lova hman mai mai atan chuan a uiawm duh khawp mai! Kan ram dinhmun phû lova thil man sáng uchuak tam takte hian kan ramah harsatna tam tak min thlen a, ngaiah kan nei ang tih a hlauhawm hle mai!

Chûng thil ṭha lo zawng zawng pumpelh tùr chuan mi tinte mahni dinhmun mila nun dan kan thiam a, kan mamawh, a tel lova kan nun theih loh thil pawimawh chauh ngaihtuah a, kan phu tâwka lungàwi thiam a pawimawh. Ṭhenawm pain pheikhawk cheng sing tél man a bun avang ngawta a bun ang bun ve kan tum chuan kan neih sumin a tlin lo vang a, kan buai phah ang. Ṭhenawm nuin zungbun cheng nuai tél man a bun avang ngawta a bun ang bun ve kan tum chuan kan buai phah theih bawk.

Ṭhenawm pa leh ṭhenawm nu nu leh pate khan thla khatah cheng nuaih tél an hlawh a, kan nu leh pate'n thla khatah cheng sâng tam pawh an hlawh phâk lo va. Anni'n thla khatah cheng sing tam an hlawh laia keini'n cheng sang tam kan hlawh phâk loh chuan, an khawsak mila lo khawsak ve ngawt chu a rem hauh lo vang. Chu an thil neih ang nei ve thei tùr chuan kan sum leh páiin a tlin lo va, neih ve ngei kan tum tlat si a. Chu kan thil tum tipuitling tùr chuan keimahniah setana thlèmna, a ṭha lam rêng rêng awm hauh loh thil sual tih duhna kan thinlungah a lo lût a. Kan thil duhzáwng ang zêlin min bei a, kan mamawh kan neih theihna a nih phawt chuan mahni taksa hralh mai duhna thinlungte kan lo pu a. Rûkrûk duhna thinlungte kan pu a, sualna chi hrang hrang tih duhna thinglung mai ni lo, tualthah hreh lohna thinlung put mai piah lamah, kan nun beidawngin mahni nunna hial lak pawh kan hreh loh phah fo ṭhin.

A hausa an hausain, sum neiin an nei tam si a, sum nei loin sum neite awm dan ni tin kan hmu ve si a. Dam chhúng khawsak a harsa si! An bul ṭanna hriat tur mumal tak awm lova vawi leh khata hausa ta thut lah an tam mai si a. Chutiang chu nih ve tumin kan han bei a, kan tisual a, kan tana chhiatna tùr thil a tàwpa tàwpah kan ti leh nge nge ṭhin. Awhna sualin min man a, awm ngaihna hre lo, awm loh ngaihna awm si lo he leiah nun beidawng takin hun kan hmang a. Tih tùr leh tih loh tùr pawh hre lovin nî kan hmang ral ṭhìn. Keimahni ber kan chian miau loh avangin a ṭha záwnga hmasâwn ngaihna rêng a awm lo fo mai!

He lemchan tual zâwl zau takah hian mi tin mai hian lem kan chang a, lem chang thiam deuhte’n fak an hlawh a, chawimawi an hlawh a, lawm an hlawh tel ṭhin. Mi thil ti theite bawkin mi thil ti theitea hmélhriat ṭha an neih avangin hna lák nikhuaah pawh mi retheite tan kawng a zîm tual tual tawh a; hei hian mi tam zawkte nun tibeidawngin sualna chi hrang hrang a pun phah a ni.

Sumdawnna kawngah pawh ni se, mi hausa ṭhenkhatte'n mi retheite hmang ṭangkaiin, mi retheite kut hmangin rûl kua an zen a, an mi manate hi an rethei duh khawp a nia; a hlâwkna erawh mi hausate bawkin an tél ṭhìn. Chhúng leh khat, nupui fanau nei kan nih tawh avangin kan hmangaihte tan eng thil pawh tih kan hreh loh phah fo a, kawng dang zawh mai tur hriat a harsa ṭhin. Kan ram hian mi retheite hmakhaw ngaitu ram hruaitu kan mamawh a, kan ram tluchhe mek tungding lehtu kan mamawh.

Zo fate Jerusalem kulh hi a chim mék a, chhan hman a la awm a nia. Hawh u, Nehemia ang khan mi dang kovah dah mai lovin, mahni kovah dah ngam ila, ṭan i la tláng teh ang u. Jerusalem siamṭhat hna a thawh lai khan Sanbalata leh Tobia te khan an tibuai a, tihchhiat an tum ngar ngar a. Mahse, Pathianin a ṭanpui a, Jerusalem kulh a siamṭha leh angina, Zo fa mi thiam tak takte’n Zoram hi a lo ropui a, a par vul zel theih nan te, hnam inlungrual, hnam taimà, hnam inhmangaih, sual zalen lohna ram, Zoram nuamah i siam ang u.

- Centenary C. Lalzahawma