Capstan ka la zu thei a, ka hlim viau!

Ka thupui thlan hi Pu HK Bawichhuaka, Chief Executive Member hun (term) a tawpa ka va lena a thu lo sawi a ni a, ka theihnghilh thei lo.

Pu HK Bawi­chhuaka term tawpah khan ama in luah tur nei lo a nih avangin sorkar khan Rest House (a hnua Pu Thanglianchhunga In ni ta kha) eng emaw chen luah an phalsak ta ringawt a. Khatia mahni in luah tur nei ta lo, Rest House-a lut ta ringawt, ram hruaitu lu ber ni ṭhin si kha zanah ka va leng teh ang ka ti a, ka va kal ta a. Kan han titi chu heti hian ka zawt a, Hei u Bawih, in nu Thangliani hlawh ringawt in ring dawn ta a ni a. In lah i la nei si lo a, engtinnge in khawsak zel ang aw" ka ti ta ringawt a.

Ani chuan, "Bawla, Thangliani hlawh hi a lo la kal zel ang a, tunah tak hian cheng sang hnih chiah kan la nei a. Capstan ka la zu reng thei bawk a. Pathian zarah kan lungngai lo asin. Kan la hlim ve khawp mai" a ti ta a. Khati anga rilru a pu kha ka lawm hle a. Ka hawn dawn chuan he thu hian ka thlah a, ka mangṭha ta hlawm a, "A nih ka haw ta ang a. Inhmun chu zawng vat la, in sa ve vat ang che" ka ti a. Pi Thangliani khan a lo nawr ve pawh a ni ang e, Electric Power House kawng hnuaiah in an sa ve ta a, tuna an luah lai saw a ni nghe nghe awm e.

Ka rilrua a awm reng ṭhin avangin ni khat chu ka va leng a. Pi Thangliani pawh chu ka va hmu a. Darkar khat vel ka len hnuah ka haw a, tunah chatuan ramah min kalsan tawh a.

Pu Bawichhuaka kha entawn tlak a nihna a tam khawp mai. Pandit Jawa­harlal Nehru, India Prime Minister hmasa ber khan, Reid House, khatihlaia MDC te Session neihnaa Ja­nuary ni 4, 1953 zing dar &;45 a District Council Mem­ber hmasa ber hmaa a thurawn "Thil eng pawh, te takte thlengin lawmman engmah beisei loin thawk zel ang che u" a tih zawmtu dik tak chu Pu HK Bawichhuaka kha a ni.

Ka hre chiang a, thil a tihin lawmman a beisei ngai lo.