MI FEL

Kum 2025 kan lo thleng leh ta reng mai! Pathian khawngaihna a ni. Hun thar ṭha zawk beisei ila. Min hruaitu, Pathian chibai bûkin lâwmthu i sawi ang u. Kum a lo thar a, hun thar kan lo thlen hian mihringte hi phûrna leh beiseina tharin kan khat bawk ṭhin a, kan hman ṭangkai thiam a ṭha ang. Kan nun thlir lêtin, mahni inenfiahna hun ṭha ni hmasa se la; siam thara awmin, hmasawn kan ngaihna laite pawh hmuh tum ila. A pawimawh berah chuan Pathianin kan tana a ruat, ‘a ṭha ber’ chang turin i inbuatsaih thar leh ṭheuh ang u.

Sam 37:25 kan en chuan Davida khan mihring nun leh dam chhung hun a zir chhuak ṭha hle. A nun leh hun hman liam takte a thlir lêt a, “Naupang ka lo ni tawh a, tûnah tar ka lo ni ta a. Nimahsela, mi fel chu kalsana a awm ka hmu ngai lo va, a thlahte chaw khawn pawh ka hmu ngai hek lo,” a ti hial a ni.

Kum thar, hun bul kan ṭan mek lai hian Davida zir chhuah tak nun hi kan zir thiam ve a ṭha ang. Pathian chu kan tana ṭanpui vartu hnai reng, engtik lai maha min thlahthlam ngai lo, kan kianga awm reng a ni a. Kan mamawh ang zela ṭanpuina pawh lei leh van siamtu hnen aṭanga hmu ṭhin tur kan ni. Pathian malsawm tlâk nun erawh kan mamawh hle ang.

Davida khan harsatna leh manganna, thimte hi a hmuh hmaih lo. Nun hi chhel taka beih fan fan ngai a nihzia pawh a chiang hle. Tuar ṭhin a ni. Mahse, hahchawlhna leh hlimna, lungawina hlu ber berte pawh a hmu nawn ve fo bawk. Pathian chu a rinawm a, hun lawmawmah chauh ni lovin, a thim ber laiah pawh a lo awm a, a hmu leh ṭhin (I Lalte 8:12).

Pathian chu eng hun leh dinhmunah aṭang pawhin belh tlâk a ni. Keimahni leh kan nun chu eng pawh ni se la, hlimnaa khat a ni emaw, harsatna leh manganna tuam vel pawh a lo ni palh thei e–Pathian erawh chu Imanuela ni turin a lo tel ve zel a. Hei leh chen hi min hruai tawh a, a rinawmzia pawh kan hmu fo. Chuvangin, he hma hun ṭha zawk min pêkah hian min hruai zel ang.

Davida chuan, “Mi fel chu kalsana a awm ka hmu ngai lo...” a ti a. Pathian chu amah thlanga hmangaih bertute tan an ṭhatna tur zawk zela engkim hmanga hna ṭha thawk ṭhin a ni (Rom 8:28). Chutiang chuan, a mi felte chu eng dinhmunah pawh, khawvelin a phatsan châng pawhin anmahni, chhungkua leh thlahte nen lam a thlahthlam ngai lo. An mamawh ang zela chhawmdawlin a rinawmzia a hmuh thartir leh ṭhin.

Imanuela hi tâwp thei a ni lo va, a khawngaih thil thlawn pek pawh kang chat rual a ni lo. Pathian hmangaihna hian keimahniah chhan leh vâng a nei lo, amah hi hmangaihna a nih zawk avanga min hmangaih a ni. Mi fel kan ni ve thei a nih chuan Pathian rinawm hi kan chanvo ve tur bawk a ni.

Jabeza chuan, “Aw, mal mi sâwm ngei ngei la, ka ramri hi mi zauh la, i kut chuan mi awmpuiin lungngaihna ka chungah a thlen loh nân sual lak ata mi thiar fihlim ang che,” tiin an hun laia thil ṭha ber ber a dil a, Pathian duh zâwngin a ṭawngṭai a ni. Lei hausaknaah a tâwp mai lo, sual lak ata venhim a dil tlat. Pathian lung tiawiin ṭawngṭaina hlawhtling kan hmuh tak ngei hi (I Chro. 4:10).

Pathian hi ringtu sual kalsan zelte nunah a lawm a, rinna hi ringtute felnaa ruat a ni bawk. Chutiang chuan piantharna hi bul ṭanna ṭha ber a ni. Amah ringtute Chhandamtu hi beisei tlatin he kum tharah hian eng dinhmunah pawh Isua ṭantu ni thar zel ila, Pathian ngaiha mi fel, mi vannei ber kan lo ni ve thei dawn a ni.

- H. Lalroluahpuia