Inthlei tura duan kan ni em?

Eng boruak danglam emaw thleng lo pawh ni se, thlasik boruakin min chîm a, min chênchilh tawh chuan, ka, kha, ga leh a, b, c hmangtute ai chuan a, aw, b hmangtute thinlung chu kaihthawh leh kaihharhin a awm nasa a. Chhunhan hmanga tu thuziak emaw kan hre hrang nalh ang mai hian min chhun vûttu hi a awm ṭhin.

Chutiang kâra khawvel mite seprawtui tur chu mahni nawmna, mahni nuam tih zawng, mahni duh dan bera hunpui chu huau huau nen a hman dunte a ni leh a. Pathian mite seprawtui tur erawh a nei leh nei lote inkar, mi awmthei leh mi awmthei vak lo, duh duh nei thei leh duh duh nei zo lote chanchin te, mi lian leh mi tête inkar zau lutuk chu Lal Isua tlawmna nun nen inrem thei lova an ngaih thute pawh he hun hian her chhuahpuiin, hulûm leh lailum a luah ṭhin.

Hetiang suangtuahna vak vel karah K. Hminga hla -

"Ram leh kohhrana hruaitu mi rawnkai te,

Zahawmna dawhsana dinga felna hmaikawr vuah a;

Biakbuk thianghlimah leh

Pisa ropuia a fawng vuantu chanchang,

Thiltitheitu nih vanga dik lohna thup ching te,

Rawngbawlna sang chelh vanga dik bera inngai,

Thihna hmaah angkhata kûn za ṭheuh tur hi,

Tu nge inthlei thei?"

tih chuan rilru a vawrh vir nasa hle bawk.

Thihna hmaa kûn za ṭheuh tur chu inthlei loh a ṭha ka ti, ka pawm thlap, ka amen thlap! Mahse, hring fate nun zia leh zeizia hi chîk la, a tak taka kan khawsa zia erawh North Pole leh South Pole ang maia inpersan a ni thung. Leiah pawh, vânah pawh, kumkhua leh chatuan atan kan inthlei mek a, kan inthlei zel dawn chu a ni zawk si.

Thlei hi a va ngeiawm, engah nge a lo awm kher kher, engah nge kan lo inthlei kher kher ni?

I thiam zawng emaw, i theihna zawng emaw, i chemkalna lam zawng emaw chu a hrang mai thei a. Tuipuia sangha mantu an awm a ngai a, an chuanna tur lawng tuktu pawh an awm a ngai. Footballer an awm a ngai a, an pet tur ball leh bun tur boot siam chhuaktu pawh an awm a ngai. Doctor an awm a ngai a, an enkawl tur damlo pawh an awm a ngai. Chung chu hai theih a ni lo.

I bul leh velah, i khawsakna hual velah khan tu emaw chu–mihring mihrinnaah pawh chuanhnuai leh chuanchung chu an dinhmun azirin rilruin i thlei a. Hmelṭha leh hmelchhia pawh i rilruin i thlei a. I fate zinga fel leh sual chu sawi lo mah la, i rilruin i thlei a. I ran vulh zinga sawngnawi deuh ai chuan chaw duh leh hap bawrh bawrh thau kûng chu i duat zawk ang. Khawtlangah pawh pa challang chhiat tâwk leh pachhia chhiat tâwk chu dan narânin kal reng mah se, hmuh dan chin kan nei a. A inhmang ṭha hman chu, ‘A ni chu a fel’ tih a nih laiin, inhmang ṭha lo chu ‘A ni chu a inhmang ṭha duh lo’ tiin kan thlei leh tho tho.

Hna sang thawk emaw, khawsakna ngêlnghet zawk kan dah sang a, ani chu a chher tlak kan tih laiin, mihring ve tho, nun tluang leh fel em em, zir sang lem lo chu kan dah hniam deuh mai thei. Kohhran huangah pawh mahni fel fela fel, inkhawm taima leh inzir taima tâk ai chuan khawvel hlawhtlinna nei, thiam bawk, hre zau bawk, khawsakna ngêlnghet zawk chu kan dah sang zawk a, chhawr tlâkah kan ruat zawk châwk–nang pawn i rilruin i dah sang zawk.

Kan inthlei vang hian mi rilru kan tina mai thei a, mi thinlung kan hliam thei bawk. Mi chhûngkua kan tina mai thei a, mi khawtlang leh kohhran kan tina thei bawk. Chu aia pawi chu min siamtu kan tina–kan karah remna palai hna thawk loin inrem lohna palai hna thawkin kâr khî a siam a, a tuartu chu nang leh kei kan ni mek a ni.

Sim tâng e, tih tum kan awm lo va. A ṭha lo, hnualsuat ang u, tih tum lah kan vâng. Mahse, kan nunphung leh khawsa zia hian inthlei chu a keng tel tlat si a nih hi tir'u?

Heti teh nuai kan ni si a; kan duh emaw, kan duh lo emaw, rorel hunah chuan ringtu leh ring lo chu ding leh veiah chatuan atan thlei hran kan la ni dawn. Lei ninawmah pawh kan inthlei kumtluan bawk. Chutih ahnu, hring fate hi inthlei lo tura duan ni loin, inthlei tura duan rêng kan lo ni zawk lo maw?

- Lalsiamkima Samte