MIFCO BYE BYE LE!

Kan Mizoram sorkar cabinet meeting thuchhuak ang chuan MIFCO chu tih tawp a, mimal kuta awm tur a thupek chhuah a ni tawh a. Thu rinawm tak
aṭanga hriat dan chuan tun July thla thleng hian a thawktute pawh an hlawh siam sak a ni a. Hetiang a nih chuan August thla
aṭang hi chuan tawp tawh mai tur emaw, mimal kuta awm tawh tur a nih hmel hle awm e. Heting a nih vang hi a ni chek ang chu maw tun July thla laihawl vel khan Farewel Picnic pawh an nei tawh a ni awm e.

Chhingchhip khua hi chuan MIFCO hi an ngheng hnaiin, an Industry lian ber pawh an khaw chhunga awm a ni bawk a, an chhawr hle a. An thlai tharte pawh an thar ang ang lo lei saktu a ni a, heti chung hian ngaiah an neih a, a ṭangkai dan hi an hre thiam pha vak lo a ni ber awm e. Kumin zet erawh chuan a ṭangkaizia an hre chiang ta hle mai a! Lakhuih a lo thar a, tih laiin an hralhna ber MIFCO lah chu han lei thei dinhmunah a ding rih si lova, hralhna tur hre lovin an hawi hai reng mai chu a nih hi. An behchhan ber MIFCO lah hun khaihlak laiah a ding miau si a, chuvangin an lakhuih pum
ṭha ve tak takte chu Rs. 10/- te, a aia tlawmten an hralh ta mai mai a. Kuthnathawktute ber hi an khawngaihthlak a nih hi! An lakhuih rahte motor an chil tir leh mai ang tih pawh hlauhawm tak a ni e!

Ka han sawi duh ber chu he MIFCO a hnathawktute hi a hmunah quarters luahin an awm hlawm a. Chhungkaw 12 vel an awm a, heng chhungkuate hi kum 30 dawn thaw, nupui fanau nen an awm tawhin, Chhingchhip khuaah an inngai nghet hmiah tawh a ni. Tuna an fate nupui pasal nei hial tawhte pawh hi helai, Chhingchhipa piang a, seliante an ni hlawm a. Hmun dang han kalna tur an nei hran tawh lo. Anmahniho lah hi ringtu ṭha tak tak vek an niin, Kohhran lamah pawh inhmang tak tak vek an ni a, tihrualin khawtlang thil dangah pawh an inhmang em em vek a. NGO lamah pawh Chhingchhip ti mawitute an ni hlawm a ni. Hetiang ni si hi an thawhna ber mimal kutah a awm dawn ta si a, anmahni sawi dan chuan mimal kuta thawh zawm ai chuan Early Retirement Rules anga chhuah mai an thlang zawk hlawm si a. Hetia an chhuak a nih phei chuan kan khaw nu leh pa a kan lo dah ngheh hmak tawh si hi kan in bye bye mai a ngai dawn a ang ta hle mai a, an va uihawm dawnin an va ngaihawm dawn tak em. Anni hi Chhingchhip khaw tan chuan sum hnar pawimawh takte an niin, khaw chhunga sum leng vak ti tamtu an ni a. Han maipar thlawn tawl mai tur atan chuan an va han uihawm tak em!

Kan sorkar hotute leh a Board Chairman-te ai pawhin Chhingchhip khaw chhung mite hi chuan an chhungkaw dinhmun pawh an hre chiang em em zawkin a rinawm. Tuna hetia tih tawp teh hual tur atan chuan a hnathawktute inpekna nasa tak hi a pam hmai deuh chu a ni. Tih rualin kan sorkar pawh hian a thutlukna siam hi a rang teh thut lu deuh a ni lo maw le? Nikum lamahte kha chuan tihchangtlun dan ngaihtuah ni tur hial khan sawi kha a ni si a. Anni hnathawktute lahin thlamuang takin a tihchangtlun hun an lo thlir mek reng a. Kumin May thla bawr vel khan mimal kuta hlan tur sorkar berin a han ti ta thut mai kha a ni a, anni hnathawktute chu an va thlabar nasa tak em!

Khatiang teh thut khan thupek a chhuak ang tih ngaih-na reng an hre awm love! An hlawh pawh July thla thleng chauh siam a ni an han ti leh ta nghal a. An tan chuan khawvel a tawp a ni ringawtin, khaw eng pawh hmu ṭha ngam lovin an kimki reng mai chu a nih hi! Sorkar pawh hian he a thupek hi a tipuitling dawn a nih chuan dinhmun ṭha deuh zawkin chhuah tir thei sela a
ṭha hle awm e.

Tunah pawh mi in hnuai luah hawh tur an zawng sup sup mai a, he ti lo deuh hian tuna an quarters awmnaah hian thla 4/5 tal chu la awm tir theih ni se, hei hi a chhawrtute mawh pawh a ni ve lo maw le? A hnathawkte heti taka thlabara siam hi tih loh tawp tur a nih hmel em mai a!

Tin, han sawi takah chuan kum 30 lai lo thawk tawh, ta neiha nei ve tlat zingah hian Muster Roll a tun thlenga la awm reng hi pahnih/ thum vel chu an la awm niin sawi a awm a, a nih tak tak chuan hengte hlei hlei hi an dinhmun siam sak an va hun ve le! Early Retirement Rules-te hi an apply ve theih dan ngaihtuah pui ngei ni thei se, chu ti a nih loh chuan an chan hian maian chan pawh a tluk dawn nem le!

Sorkar hian thutawp a siamnaah hian hnathawktute dinhmun chhe lutuk lo hian siam ngei se ti hian MIFCO hnathawktu, Chhingchhip khua a inngai nghet tlatte hi kan bye bye ve a ni e.

- Patrick Z, Chhingchhip