Mizote hi siamṭhat theih kan ni lo em ni?

CM zahawm tak Pu Lal Thanhawla'n ni 17.6.2016 MPCC Political Session-ah NLUP chu Policy ṭha ber, khawvelah pawh chhuan tham a nih thu a sawi a. He NLUP hi kum 20 dawn an kalpui tawh a. (1984-2016) BPL lah kan tlem chuang lova, kan chaw rinpui berah kan intodelh lo em em a, thla thum ei chauh kan thar a, vawk nise Dan pawisa lovin a sang tel Myanmar
aṭangin kan in supply tir a. Bawng nise Shillong Bawng ṭha vak lo lei a ngai a, Purun, Tel, Kawlhai, Lakhuihthei, Tomoto, Purun var, Dal, Vaimim, Wheat vai, Alu, Parbawr, Sangha, Kaikuang-ah tal pawh kan la intodelh lo nasa hle mai.

Khawvel huap pawha Policy ṭhaa ngaih ṭhangkhat lian kan hmang chung pawha kawng tam taka kan la intodelh lo fo hi chu Mizote hi kan lo thatchhe hle emaw, kan rem hre lo hle emaw tihngaihna kan awm lo a ni ngei ang. Amah Pu Hawla vekin vawi tam tak Pathian programme-in kan kal a ti ṭhin a. Khawvela policy ṭha ber, Pathian programme a kal bawk si heti em ema ei leh bar lama kan la ngelnghet lo si hi chu mipui mawh a ni ngei ngei ang.

Pathian hian a programme hi Mizote tana tuipui lo em ni ang le. Kan chaw rinpui ber buhfai nise kan eikhawp thar a hneka mi state thar sa pawh kan semrual thei lo hi chu mipui leh ram hruaitute inenfiah vat vat a va ṭul em! Tuikuk Pathian siam theih loh tihte kan sawi ṭhin a (an huatthu ni lo se) an lo fing daih zawk a nih hmel.

MNF kum 20 rammu te lo haw khan Rs. 40000/- vel pek an ni a, Tuikuk ho chuan Rs. 80000/- leh kum khat a thlawna chawm pawh an la iai a ni a. Pathian programme an tih meuh pawh kan dinchhuah pui thei lo hi chu mipui thiam loh nge a policy ti veltute thiam loh? Pathian hming lamtute hian kan timualpho nasa hle a ni lo maw?

Kum 5 ah kha chuan a la fiah loah ngai ila, ṭhangkhat lianah pawh ngel-ngheh phah nan kan la hmang thei lo a nih chuan inen let kan va ngai nasa em!

Power-ah phei chuan MW 20 pawh kan la siam chhuak ṭha
ṭhum lo a ni a. Kum 40 chhungin MW 20 kan siam thei tawk lo ni ta se, kan mamawha MW 100 nei turin kum 200 kan duh dawn a, khawvel huap pawha policy chhuanawm hi kan ṭhatpui lo a nih chuan special policy, kan ram ṭhatna tur ngaihtuah tlan a hun hle a nih hi.

- Rualkhuma Hmar