Kum tharah nun thar nen

Kum hluiah chuan kan thil tih zawng zawngte chu hunin a liampui zo tawh a, kum tharah chuan a tharin kan nunna chuan bul a rawn ṭan leh dawn a. Hunbi siamtu ni aṭanga êng lo chhuak chuan kum thar takah chuan kum thar tuk duhawm tak, ni eng mawi tak kan tan malsawmna kum inṭanna a rawn her chhuahpui ṭhin.

Kum hluia kan thil tihte zingah mi tana ṭha lo kan tih ṭhinte bakah, keimahni tan ngei pawha thil ṭha lo kan tihte chu kum tharah chuan kan bansan a ṭul a. Thil ṭha kan tihte erawh chu kan chhawm zel ang a, thil ṭha dang tih tur kan zawn belh ang a, chu chuan kan nun a tivul zel dawn a ni.

Thil siam dang zawng zawngte chuan kum tharah chuan ni chhuak thar avanga malsawmna an dawnte chu an bula awmte hnenah an pe chhuak leh ṭhin a. Keini pawhin kan bula mite hnenah malsawmna kan dawnte chu sem chhuak ve zel ila; chu chu min siamtu duh dan a ni a, min phût tlat chu a ni.

Ni aṭanga mei alh hlawm lo chhuak khawvel êntu chu a thar zelin siamtuin a din a, khawvela thil awm zawng zawngte hi ni chhuak tharah chuan siam thar zel kan lo ni a. Kan lungphu chuan taksa thar kan neih lehna turin second tin hian thisen ṭha lote a rawn siam ṭha a, taksa thar leh chakna thar a rawn indin ṭha leh zel ṭhin.

Hun tharah chuan kan rilru leh nun dante pawh a thar zelin kan la tawn ngai loh hunah chuan kan lut zel a. Thil hluite chu a lo ral a, siamtu zarah a tharin a rawn inthlak zel a ni.

Mupui pawh van laizâwlah thla zâp lovin a taksa rit tak chu a kânpui char char thei ang hian, kum thar chuan taksa thar leh rilru thar, tumruhna nen kan natna khum aṭangin tho chhuak ila. Khûp zawi avanga kan tiang hawlte chu dah ila, Lalpa chakna ringin taksa tharin pên chhuah i tum ang u. Chu chu kum lo tharin min phût chu a ni.

- H. Neihchungnunga, Durtlang