Dec. 31 zana halpuah hâl kha
Kum dang ang bawkin tun Krismas kumthar velah sawrkarin halpuah leh halmawite a khap leh a, khapna chu a hlawhtlin theih nan nasa takin ṭan an la a, YMA leh kohhran lamte pawhin theihtawp an chhuah a. Tun ṭum ang reng renga halpuah khapna bawhzui ṭhat leh YMA leh kohhran lam pawh an ṭan nasat hi a la awm lo hial mai thei. Mahse, khap rêm vek a ni lo a, tam tak hâl a ni. Chuti chung chuan kum hmasate ngaihtuah chuan ziaawm tak a ni a, kum danga hâl zat aṭangin 20% vel bak a nih ka ring lo ve ngawt a.
December ni 31, 2024 zan khan zan dar 10:30 vel aṭangin Aizawl khawpui chhungah ka kal kual viau a, zan dar 11:59 thleng khan halpuah ri vawi 1 chiah ka hria. Mahse, ka sanaah zanlai dar 12:00 a ri chiah a, a rawn puak dur a, a dangin a rawn zui ta zawt zawt a. Halpuah neite'n hâl hmasatu nih an hre ru deuh hlawm a, mahse, mi pahnih/khatin an han hâl takah kha chuan an hâl ta sup sup mai niin ka hria! Kum dangah chuan zan tir lam aṭangin a ri pheuh pheuh reng a, dar 11:30 vel aṭang phei chuan an hâl nasa viau tawh ṭhin.
Tun December ni 31 zana halpuah eng emaw zat hâl a ni kha opposition party ṭhenkhat mi leh sate chu an lawm ru viau niin ka hria. Sawrkar lai mekah halpuah khapna a hlawhtlin bik loh nan, halpuah hâl a nih ngei theih nan a ruk taka hmalakna pawh a awm nia sawi a ni.
MNF Gen. Hqrs.-a nihna pawimawh tak nei pakhat pawh halpuah an han hâl sup sup kha video-in thla a la a, "Aw... Halpuah hâl khap a ni, halmawi pawh khap a ni. Naupang hovin an lawm, mipuiin kan lawm..." tiin a au lauh lauh mai zu nia! An sawrkar loh hnuah chuan halpuah khap a ni chunga mi tam takin an hâl kha a lawm viau ni tur a ni. MNF sawrkar chhung zawnga Krismas kumthar hunpuiah halpuah khap a ni vek ve tho chunga nasa taka hâl a ni kha a lawm viau ve tho turah ka ngai.
Sawrkar ruahman anga kum 2013-a halpuah hâl a nih hnu khan kum tin Krismas leh kumthar bawrah sawrkarin halpuah leh halmawi te a khap ziah a, mahse, mipui lam chuan an hâl tho. Sawrkar lamin khapna chu bawhzui tang e, an ti lo va, an en liam mai mai. Halpuah haltute man tak tak a awm lo. Sawrkarin a hming chauhvin halpuah a khap a, khapna chu a hlawhtlin theih nan a bawhzui lo tluk a ni ber.
Halpuah leh halmawi vel khapna thupek a hlawhtlin theih nan leh mipuiin an zawm theih nan sawrkar hotuten theihtawp an chhuah kha a ṭha a, a lawmawm. Kum dangte ngaihtuahin, mipui pawhin an zawm ṭha viau. Thupek zawm duh lova hâl lui an awm erawh an tih theih piah lam a ni. Ar ven taka inven theih ni hek lo le.
Zu pawh khap a ni a, a tam reng tho; ruihhlo (heroin, etc) pawh khap a ni a, a awm reng tho, tunah phei chuan a hluar viau lehnghal; tualthah, rukruk, etc. pawh khap a ni, mahse, a khât tawkin a thleng ṭhin chu a nih hi!
- Lalduhmawia