Mizoram leh career guidance

Mizoram district hrang hrang ka fang a, ka thil hmuh chhuah hian ka rilru a tina hle. Nu leh pate ka kawm­naah i fate enge i zirtir dawn tiin ka zawt ṭhin a, chhanna mumal min pe thei ngai lo. A tam zawk chhanna chu kan fanu/ fapa hi kan hmuh phak loha kal kan phal lo, college kal ve mai mai rawh se tih te a ni.

Vairengte kan pel chiah a, nu leh pate kan kawm ve thung chuan an fate zir tur an lo ngaihtuah lawk deuh vek bakah zirnain ṭha te pawh an lo bel chiang vek ṭhin a lo ni. Hetiang hi kan dinhmun a nih avangin career guidance kan mamawh mang e.

Zirlai naupang tam tak hian 10+2 an zawh hian enge job oriented course an zir theih tih pawh an hre ngai lo, a rilru nat thlak hle.

Career guidance ṭha tawk nei a, kan zir­laiten tum mumal tak neia lehkha an zir loh chuan Zoram hi tih hmasawn a har dawn mang e. Lehkhathiam hna hmu lo kan insiam tam mai chauh dawn a ni. Mizo naupangte hian professional course emaw job oriented course te hi thlang thiam­in tun aiin zir nasa teh se.

Pawl 12 pass hnua professional course hrang hrang zir theihte a tlangpuiin han tarlang ila:-

10+2 Arts zawha zir theihte: B.Sc Air­lines, Tourism And Hospitality Manage­ment, BBA, BCA, B.Sc Fashion designing, LLB, Bachelor of Hotel Management, Company Seretary, B.Sc Interior Decoration, General nursing. Heng bakah hian bank clerical exam leh NDA exam te pawh an pe thei a ni.

10+2 Commerce zawha zir theihte: B.Com (professional), B.Sc Airlines, Tourism And Hospitality Mana­ge­ment, BBA, LLB, BCA, B.Sc Fashion designing, Bachelor of Hotel Management, Company Seretary, B.Sc Interior Deco­ration, General nursing. Bank clerical exam leh NDA exam an pe thei bawk.

10+2 Science zawha zir theihte: A chunga kan tarlan zawng zawng bakah Engineering, MBBS, B Pharmacy, B.Sc Agriculture, B.Sc Fishery, BDS, B.Sc Fo­restry, B.Sc Nursing etc.

A course awm kan tar­lang vek seng lo. Tin, kan course zir tur hi a demand te thlir a ngai a, demand sang zir a ṭha bawk. Ṭhiante zir ang zir ve ngawt tur a ni lo. Enge ka tuina ni a, zir ta ila thawhna a tam em tih thlir hmasak ṭhin tur a ni.

Khawvel chang­kanna sang zelah Air­lines, Travel & tourism te a ṭhang chak em em a, zirlaite tan heng job oriented course-te hi ngaiven nachang hriat a pawimawh.

State changkang chuan Airlines, travel & tourism hi an bawr tawh hle a, mamawhna pawh a sang chho zel a, hmalam hun atan pawh a ṭha. Career guidance mumal tak kan dawn a, kan course zir tur kan thlan thiam phawt chuan Mizo zirlai lehkhathiamte zingah hna hmu lo kan tlem phah ngei ang.