Mizona an phum ral ta

Mizorama political party zinga member ngah ber chu MNF hi tiin politics intihre deuhvin an sawi
ṭhin a, a dik ka ring a. Hei vang hian inthlan apiangin an tling tihna a ni bik lo.

Neutral kan tihte hian an duh lam lam hi an titling thei a, chuvangin tunah Congress an tling a, Congress hi MNF aiin an tam tihna a ni chuang lo an ti. MNF-in member an ngah chhan chu 'Mizo' nihna vang a ni a, anni hi chu Mizo nen hian a inhmeh bik hliah hliah a ni. Chutihlai chuan tun hnaiah NEDA tih a lo piang a, BJP nihliap hnuaia a hlim nuama tel ve turin an lut ta a, an Mizo nihna 'bik' kha an luhpui niin a lang a, hei hi chu an tih fuh loh ka hlauh pui khawp mai.

Kum 2018-ah MLA kan inthlang dawn a, mipui hian tute nge lal dawn tih la hre lo mahse Congress hi an hne hun hunah MNF lam pawh an awn leh dawn tih a chiang a, duhthlan tur dang a awm chuang lo.

MNF-a kir leh tuma mipui rilru a inkau
ṭan deuh ruak ruaka a lanlaiin NEDA a lo lang a, Mizo mipuiin a lang apauva political party kan duh loh rawn ber BJP nen an inkaikuah ta tlat mai hi tal chhuak leh hram se an ṭhatpui zawkin a rinawm. BJP leh MNF hi inzawm anga a lan chuan, Congress hi Vai Pawl nia hriat avanga vote duh lotute hian MNF hi an iai hlauh palh ang tih a hlauhawm tawh a ni.

Mizote hi hnam la na deuh mai kan nihna chen a awm a, min awptu leh min chawmtu ber India pawh hmu ralkhat lui tlat, ram dang hmuna hmu tlat mi kan ni a, Mizona hi kan dah lian a, Indian nihna hi chu kan dah te hle a ni. Hei hi MNF chakna laimu a ni a, he 'hnam movement' ze ding kengtu an nihna hi mipuiin an ngaihzawm tak chu a ni a, chumi hre reng chunga BJP kaihhruai leh din NEDA an lut hi chu an tihfuh loh palh chuan a te zawngin an zuih tawlh tawlh ang tih a hlauhawm a, kum 2018 inthlan thlir hian NEDA aṭanga chhuah hi tum se an tihfuh zawk ka ring.

Congress hian hminghliauna lian-tham an nei lo hi ti leh ṭhin mah ila, an sorkar kaihhruai danah hian kum nga dang min kaihhruai leh chuan hmasawnna em em awm lovin kan kal ve leh bek bek dawn a ni mai a, Congress-a lungawi loten kan pan tur nia lang hian BJP hi lo insuihzawm pui lo zawk se chuan a fuh theiin ka ring a, tunah hi chuan kalna tur hre lo mipui hi kan hawi kual ang a. Third front an sawi chhen hi eng angin nge a awm dawn tih kan hre lova, kan ring ngam tak tak bawk si lo.

Mizoram enkawl thei turin Mizona thlarau tinung thei turin insiamṭhatna hun a la tlai lo a ni.

- Lalthansanga